Read tsonga II Tikronika 2 Bible Online

II Tikronika 2 - tsonga bible

II Tikronika 2

¹Solomoni a lerisa leswaku ku akeriwa vito ra Yehovha yindlu, ni yindlu ya yena ya vuhosi.

²Solomoni a hlaya vavanuna va 70 000 ku rhwala mirhwalo ni va 80 000 ku vatla maribye entshaveni, ni valanguteri va vona va 3 600.

³Solomoni a rhuma eka Hiramu hosi ya Tiri, a ku eka yena: “Leswi u swi endleleke tatana Davhida, loko u n'wi rhumerile mirhi ya kedari leswaku a tiakela yindlu ku tshama kona, u ndzi endlela na mina.

⁴Waswivo, ndzi lava ku akela vito ra Yehovha Xikwembu xanga, yindlu ku n'wi hlawulela yona, ku hisa emahlweni ka yena mirhi ya risuna, ni ku veka hi masiku emahlweni ka yena swinkwa swa xikombiso, ni ku n'wi humesela tiholokosta ta mixo ni ta madyambu, ni ta Tisavata, ni ta tin'weti letintshwa, ni ta mikhuvo ya Yehovha, Xikwembu xa hina: hi yona mfanelo eka Israele hilaha ku nga heriki.

⁵Yindlu leyi ndzi lavaka ku yi aka, yi ta va leyikulu hikuva Xikwembu xa hina xikulu ku tlurisa swikwembu hinkwaswo.

⁶Kambe i mani la nga va ni matimba ya ku xi akela yindlu xana? Hikuva matilo, ni matilo ya matilo ma nga ka ma nga xi eneli; kutani mina ndzi mani ku xi akela yindlu, loko yi nga ri ya ku hisa mirhi ya risuna emahlweni ka xona?

⁷Sweswi, wanga ndzi rhumela munhu la tlhariheke emitirhweni ya nsuku ni ya silivhere, ni ya koporo, ni ya nhumbu, ni ya scarlet, ni ya crimson, ni ya xivunguvungu, la tivaka mitirho ya swivatli; u ta tirha ni vatirhi lava nga na mina etikweni ra Yuda na Yerusalema, lava hlawuriweke hi tatana Davhida.

⁸Ndzi rhumele ni mirhi ya kedari, leyi humaka eLebanoni ni mirhi ya kipresi ni ya sandal, hikuva ndza swi tiva leswaku malandza ya wena ma tlharihile ku tsema mirhi ya Lebanoni. Kutani malandza ya mina ma ta va ni malandza ya wena.

⁹Va ta ndzi lunghisela mirhi ya ku tala, hikuva yindlu leyi ndzi nga ta yi aka, yi ta va leyikulu, ni ya ku saseka ngopfu.

¹⁰Kutani ndzi ta nyika malandza ya wena lama nga ta tsema mirhi tikore ta koro ta 20 000, ni tikore ta barley ta 20 000, ni tibati ta vhinyo ta 20 000, ni tibati ta mafurha ta 20 000.”

¹¹Hiramu, hosi ya Tiri, a hlamula hi papila leri a ri rhumeleke Solomoni, a ku: “Leswi Yehovha a rhandzaka tiko ra yena, u ku vekile hosi ehenhla ka vona!”

¹²Hiramu a engeta, a ku: “A ku khensiwe Yehovha, Xikwembu xa Israele, la nga endla matilo ni misava, hikuva u nyikile hosi Davhida n'wana la tlhariheke, la nga ni vutivi ni ku twisisa, la nga ta akela Yehovha yindlu, a ta tiakela ni yindlu ya vuhosi.

¹³Sweswi ndzi ku rhumela munhu wa vutlhari, la nga ni ku twisisa, a nga Huramu-Abi,

¹⁴n'wana wa wansati la humaka eka vana va Dani, kambe tata wa yena i munhu wa Tiri. A tiva ku tirha mitirho ya nsuku ni ya silivhere, ni ya koporo, ni ya nhumbu, ni ya maribye, ni ya mirhi, ni ya xivunguvungu, ni ya scarlet, ni ya ntsembyana, ni ya tinguvu ta crimson; a tiva ni ku vatla tinxaka hinkwato ta swifaniso leswi vatliweke, ni ku endla tinxaka hinkwato ta mitirho ya vatirhi leyi laviwaka eka yena. U ta tirha ni vatirhi va wena ni vatirhi va hosi yanga, Davhida, tata wa wena.

¹⁵Sweswi hosi yanga a yi rhumele malandza ya yona, koro ni barley ni mafurha, ni vhinyo, leswi yi swi vuleke.

¹⁶Loko hi ri hina, hi ta tsema mirhi ya Lebanoni leyo tala, hinkwayo leyi u nga ta yi pfumala; hi ta ku rhumela yona, yi tlutiwa hi lwandle ku fika eYopa, wena u ta yi tlhandlukisela eYerusalema.”

¹⁷Solomoni a hlaya valuveri hinkwavo lava ngi va ri etikweni ra Israele a ya hi ntsengo lowu Davhida, tata wa yena a wu kumeke; a va ri vavanuna va 153 600.

¹⁸A teka va 70 000 ku rhwala mirhwalo ni va 80 000 ku vatla maribye entshaveni, kutani a veka valanguteri va 3 600 ku tirhisa tiko.