Read tsonga II Tikronika 25 Bible Online

II Tikronika 25 - tsonga bible

II Tikronika 25

¹Amasiya a sungula ku fuma loko a ri wa malembe ya 25; kutani a fuma malembe ya 29 eYerusalema. Vito ra mana wa yena a a ri Yowadana, wa Yerusalema.

²A endla leswi lulameke emahlweni ka Yehovha, ntsena ku nga ri hi mbilu hinkwayo ya yena.

³Kuteloko vuhosi bya yena byi tiyile, a dlaya malandza ya yena lama dlayeke hosi, tata wa yena;

⁴kambe a nga dlayanga vana va vona, hikuva a endla hilaha ku tsariweke hakona enawini, ebukwini ya Muxe, laha Yehovha a leriseke kona, a ku: “Vatatana va nga tshuki va dlayeriwa vana, ni vana va nga tshuki va dlayeriwa vatatana; kambe un'wana ni un'wana u ta dlayeriwa xidyoho xa yena.”

⁵Amasiya a hlengeleta Vayuda, kutani a va xaxameta hi tindlu ta vatata wa vona hi tindhuna ta khume ra madzana, ni tindhuna ta dzana, ti ri ta tiko ra Yuda hinkwaro ni ra Benjamini; a tsala ni hinkwavo va malembe ya makume mambirhi ni le henhla ka wona; kutani a va kuma va ri vavanuna lava hlawuriweke lava humaka nyimpi, lava tamelaka tlhari ni xitlhangu, va ri 300 000.

⁶Kutani a rhamba vavanuna va Israele va 100 000, ti ri tinhenha, a va hakela hi titalenta ta dzana ta silivhere.

⁷Kambe munhu wa Xikwembu a ta eka yena, a ku: “Oho, hosi! Nyimpi ya Israele yi nga tshuki yi huma na wena, hikuva Yehovha a nga tshami na Vaisraele, ni vana va Efrayimi hinkwavo.

⁸Kambe loko u famba na vona, hambi u tiya enyimpini, Xikwembu xi ta ku wisa emahlweni ka valala; hikuva Xikwembu xi ni matimba ku pfuna ni ku wisa.”

⁹Amasiya a ku eka munhu wa Xikwembu: “Ndzi ta endla yini emhakeni ya titalenta ta dzana leti ndzi ti nyikeke vandla ra Israele xana?” Munhu wa Xikwembu a hlamula, a ku: “Yehovha a nga ku nyika leswi tlurisaka ngopfu.”

¹⁰Kavaloko Amasiya a hlawula vandla leri humeke eka Efrayimi leswaku va timukela ekaya ka vona. Kambe va karihela ngopfu va Yuda va timukela ekaya ka vona hi vukari lebyikulu.

¹¹Amasiya a tiya mbilu, kutani a fambisa tiko ra yena enkoveni wa Munyu, a dlaya kona vanhu va 10 000 va vana va Seyira.

¹²Vana va Yuda va khoma van'wana va 10 000, va va yisa enhlohlorhini ya ntshava ya ribye, kutani va va hoxa ehansi; va phyandlasiwa hinkwavo.

¹³Kambe vanhu va vandla leri Amasiya a ri tlheriseke leswaku va nga humi nyimpi na yena, va ya hlasela miti ya Yuda, ku suka eSamariya ku fika eBet-Horoni, va dlaya vanhu va 3 000, va phanga ni xuma lexikulu.

¹⁴Amasiya, kuteloko a vuyile eku hlaseleni ka Vaedomu, a tisa swikwembu swa vana va Seyira a tivekela swona, swi va swikwembu swa yena; a khinsama emahlweni ka swona, a swi hisela mirhi ya risuna.

¹⁵Kavaloko Yehovha a karihela Amasiya, kutani a n'wi rhumela muprofeta la nga te eka yena: “U lavele yini swikwembu swa tiko leri, leswi nga ponisangiki tiko ra swona evokweni ra wena-ke?”

¹⁶Kakuloko a vulavula na yena, Amasiya a ku eka yena: “Xana va ku vekile wa huvo ya hosi-ke? Suka wena! Va ta ku dlayela yini-ke?” Kutani muprofeta a suka, a ku: “Ndza vona leswaku Yehovha u kanerile ku ku lovisa, hikuva u endlile mhaka leyi, kutani a ku yingisanga marito ya mina.”

¹⁷Amasiya, hosi ya Yuda, kuteloko a endla makungu, a rhuma eka Yowasi, n'wana Yowahazi, n'wana Yehu, hosi ya Israele, a ku eka yena: “Tana hi ta vonana, hi langutana hi mahlo!”

¹⁸Kutani Yowasi, hosi ya Israele, a rhuma eka Amasiya, hosi ya Yuda, a ku eka yena: “Mutwa lowu nge Lebanoni wu rhumile eka murhi wa kedari lowu nge Lebanoni, wu ku: ‘Nyika n'wananga n'wana wa wena, a va nsati wa yena.’ Kutani swiharhi swa nhova leswi nge Lebanoni, swi hundza, swi kandziyela mutwa.

¹⁹U vurile, u ku: ‘Waswivo, ndzi hlurile Edomu,’ kutani mbilu ya wena yi ku kucetele ku tidzunisa; sweswi, tshama ekaya ka wena! Xana u nga lavela yini khombo leswaku u lovisiwa, wena, ni va Yuda na wena-ke?”

²⁰Kambe Amasiya a nga n'wi yingisanga, hikuva mhaka leyi, a yi huma eka Xikwembu, ku va lovisa, hikuva a va lavile swikwembu swa Edomu.

²¹Yowasi, hosi ya Israele, a tlhandluka, kutani yena na Amasiya, hosi ya Yuda, va langutana hi mahlo, eBeta-Xemexe, lowu nga wa Yuda.

²²Yuda a hluriwa emahlweni ka Israele, kutani va tsutsuma, un'wana ni un'wana ekaya ka yena.

²³Yowasi, hosi ya Israele, a khoma Amasiya, hosi ya Yuda, n'wana Yowasi, n'wana Yowahazi eBeta-Xemexe, a n'wi yisa eYerusalema, kutani a mbundzuxa rirhangu ra Yerusalema, ku suka enyangweni ya Efrayimi, ku ya fika enyangweni ya yinhla, ku leha ka leswi mbundzuxiweke a swi ri swisungunhu swa mune wa madzana.

²⁴A teka nsuku hinkwawo, ni silivhere, ni swibya hinkwaswo leswi ngi swi ri endlwini ya Xikwembu, eka Obede-Edomu, ni xuma xa yindlu ya hosi, a khoma ni vanhu, kutani a tlhelela eSamariya.

²⁵Amasiya, n'wana Yowasi, hosi ya Yuda a hanya malembe ya khume na ntlhanu, endzhaku ka rifu ra Yowasi n'wana Yowahazi, hosi ya Israele.

²⁶Leswi seleke swa timhaka ta Amasiya, leto sungula, ni leta ku hetelela xana a swi tsariwanga ebukwini ya tihosi ta Yuda ni ta Israele xana?

²⁷Ku sungula hi nkarhi lowu Amasiya a fularheleke Yehovha, ku endliwe makungu eYerusalema ku n'wi pfukela, kutani a balekela eLakixi. Va rhuma vanhu lava n'wi landzeke eLakixi, va n'wi dlaya kona.

²⁸Va n'wi rhwala hi tihanci, kutani va n'wi lahla ni vatata wa yena emutini wa Yuda.