Read tsonga II Tikronika 35 Bible Online

II Tikronika 35 - tsonga bible

II Tikronika 35

¹Yosiya a endla Paseka ya Yehovha eYerusalema, va tlhava Paseka hi siku ra 14 ra n'hweti yo sungula.

²Kutani a veka vaprista emitirhweni ya vona, a va tiyisa entirhweni wa yindlu ya Yehovha.

³A byela Valevhi lava hlawuleriweke Yehovha, lava dyondziseke Vaisraele hinkwavo a ku eka vona: “Vekani areka leyi hlawuriweke endlwini leyi akiweke hi Solomoni, n'wana Davhida, hosi ya Israele; a mi na ku yi pinga emakatleni. Sweswi, tirhelani Yehovha, Xikwembu xa n'wina ni tiko ra xona ra Israele.

⁴Tilunghiseni hi tindlu ta vatata wa n'wina, hi mitlawa ya n'wina, hilaha ku tsariweke hakona hi Davhida, hosi ya Israele, na Solomoni, n'wana wa yena;

⁵mi tshama evukwetsimelweni, hi marhavi ya tindlu ta vatatana, ni ta vamakwenu, vana va tiko, mi landza mitlawa ya mindyangu ya vatata ya Valevhi.

⁶Tlhavani Paseka, mi tihlawula, mi yi lunghisela vamakwenu mi endla hi rito ra Yehovha leri nyikiweke ha Muxe.”

⁷Yosiya a nyika vana va tiko swifuwo leswitsongo, swi ri swinyimpfana ni swimbutana swa 30 000, xi ri xitlhavelo xa Paseka xa hinkwavo lava ngi va ri kona, ni tihomu ta 3 000, swi huma eswifuweni swa hosi.

⁸Tihosana ti humesela tiko, ni vaprista ni Valevhi, tinyiko hi ku rhandza ka vona: Hilkiya, na Zakariya, na Yehiele, tihosana ta yindlu ya Xikwembu, va nyika vaprista ku endla xitlhavelo xa Paseka, swinyimpfana swa 2 600 ni tihomu ta 300.

⁹Konaniya, na Xemaya, na Netanele, ni vamakwavo na Haxabiya, na Yeyiele, na Yozabadi, tihosana ta Valevhi, ti nyika Valevhi ku endla xitlhavelo xa Paseka swinyimpfana swa 5 000, ni tihomu ta 500.

¹⁰Kuteloko ntirho wu lunghisiwile, vaprista va yima endhawini ya vona, ni Valevhi va yima hi mitlawa ya vona hi ku lerisa ka hosi.

¹¹Kavaloko va tlhava Paseka, kutani vaprista va halata ngati leyi va yi amukeleke emavokweni ya vona; Valevhi, vona a va ri karhi va yevula.

¹²Kutani va veka etlhelweni tiholokosta, ku ti nyika eka mitlawa ya tindlu ta vatata wa vana va tiko, va ta ti humesela Yehovha, hilaha ku tsariweke hakona ebukwini ya Muxe va endlisa sweswo ni tihomu.

¹³Va sweka Paseka hi ku lerisa ka yona; va sweka tinyama leti hlawuriweke etimbiteni, ni le mapotweni, ni le mapaneni; va hatlisa ku ti yisa eka vana va tiko.

¹⁴Kutani va tilunghisela vona ni vaprista tinyama, hikuva vaprista, vana va Aroni, a va tirha ku humesa holokosta ni mafurha ku ko ku fika vusiku kutani Valevhi va tilunghisela vona ni vaprista, vana va Aroni.

¹⁵Vayimbeleri, vana va Asafa, a va ri endhawini ya vona hi ku lerisa ka Davhida, na Asafa, na Hemani, na Yedutuni, muvoni wa hosi; valanguteri va tinyangwa a va ri enyangweni yin'wana ni yin'wana; a va sukelanga mitirho ya vona, hikuva vamakwavo, Valevhi, va va lunghisele Paseka.

¹⁶Ntirho hinkwawo wa Yehovha wu lunghisiwa hi siku lero ku endla Paseka ni ku humesa tiholokosta ealitarini ya Yehovha hilaha hosi Yosiya a leriseke hakona.

¹⁷Vana va Israele lava ngi va ri kona, va dya Paseka enkarhini lowu, va endla ni nkhuvo wa swinkwa leswo kala comela hi masiku ya ntlhanu na mambirhi.

¹⁸Ku suka emasikwini ya Samiele, muprofeta, a ku endliwanga Paseka leyi fanaka na yona etikweni ra Israele, ni le xikarhi ka tihosi hinkwato ta Israele, a ku vanga na yin'we leyi nga endla Paseka leyi fanaka ni leyi Yosiya ni vaprista ni Valevhi va yi endleke, swin'we ni va Yuda ni va Israele hinkwavo lava ngi va ri kona ni vaaki va Yerusalema.

¹⁹Paseka leyi yi endliwe hi lembe ra 18 ra ku fuma ka Yosiya.

²⁰Endzhaku ka sweswo hinkwaswo, kuteloko Yosiya a lunghisile yindlu ya Yehovha, Neko, hosi ya Egipta, a tlhandlukela eKarkemixi, henhla ka Yufrata, ku ya lwa kona, kutani Yosiya a huma ku ya hlangana na yena.

²¹Neko a n'wi rhumela tintsumi, ti ku: “Ku ni mhaka yihi exikarhi ka mina na wena, hosi ya Yuda? A ndzi telanga ku lwa na wena namuntlha, kambe ndzi tele yindlu leyi ndzi nga karhi ndzi lwaka na yona; kambe Xikwembu xi vula leswaku ndzi hatlisa. Tshika ku lwa ni Xikwembu lexi nga na mina, xi nga tshuki xi ku lovisa!”

²²Kambe Yosiya a nga n'wi fularhelanga; a tihundzula ku n'wi pfukela, a nga yingisanga marito ya Neko lama humeke enon'wini wa Xikwembu; kutani a ta ku lwa enkoveni wa Megido.

²³Kutani vacopi va copa etlhelweni ra hosi Yosiya, kutani hosi yi ku eka malandza ya yona: “Ndzi tlakuleni, hikuva ndzi tlhaviwile ngopfu.”

²⁴Malandza ya yena ma n'wi tlakula, ma n'wi susa egolonyini, ma n'wi khandziyisa egolonyini ya yena yin'wana, ma n'wi yisa eYerusalema; kutani a fa, a lahliwa emasirheni ya vatata wa yena. Kutani va Yuda hinkwavo ni va Yerusalema, va va enkosini hikwalaho ka yena.

²⁵Yeremiya a thya risimu ra ku rila Yosiya; vayimbeleri va xinuna ni va xisati va vurile timhaka ta Yosiya etinsin'wini ta vona ku fika ni namuntlha; va wu endla nawu eka Vaisraele; kutani maswivo, timhaka leti ti tsariwile ebukwini ya tinsimu ta mikosi.

²⁶Leswi seleke swa timhaka ta Yosiya, ni vukhongeri bya yena, hilaha a landzeke marito ya nawu wa Yehovha,

²⁷ni mitirho ya yena ya ku sungula ni ya ku hetelela, maswivo, swi tsariwile ebukwini ya tihosi ta Israele ni ta Yuda.