Read tsonga Ezra 6 Bible Online

Ezra 6 - tsonga bible

Ezra 6

¹Kutani hosi Dariyosi a va byela leswaku ku laviwa endlwini ya mapapila ya tihosi ta Babilona, laha ku hlayiseriwaka kona xuma.

²Kutani ku kumiwa eEkibatana, emutini wa hosi, etikweni ra Mediya, papila leri songiweke, leri ngi ri ri ni timhaka leti tsariweke ta ku tsundzuxa leti nge:

³“Hi lembe ro sungula ra ku fuma ka Korexe, hosi Korexe yi vurile ematshan'weni ya yindlu ya Xikwembu eYerusalema, leswaku yindlu yeleyo yi tlhela yi pfuxiwa, ku va laha va nga ta tlhava magandzelo kona, ni masungulo ya yona ma ta pfuxiwa. Ku leha ka yona ku va swisungunhu swa 60; ku anama ka yona ku va swisungunhu swa 60.

⁴Yi va ni tinxaxa tinharhu ta maribye lamakulu, ni yin'we ya timhandze letintshwa; mali yo hakela yi ta huma endlwini ya hosi.

⁵Loko yi ri mitirho ya nsuku ni ya silivhere yi nga ya yindlu ya Xikwembu, leyi Nebukadnetsara ngi a yi tekile etempeleni ya Yerusalema, a yi tisa Babilona, a yi nehiwe yi muka etempeleni ya Yerusalema, evutshan'weni bya yona; u ta yi veka endlwini ya Xikwembu.

⁶“Loko swi ri tano, wena Tatenayi, hosi ya hase ka nambu, na Xetara-Bozenayi ni vanakulobye va vona va Afarsaka, va le hase ka nambu, mi titshamela etlhelo;

⁷mi tshika ntirho wa yindlu ya Xikwembu wu humela emahlweni; hosi ya Vayuda ni vakulukumba va Vayuda a va ake yindlu yoleyo ya Xikwembu exiteni xa yona.

⁸Kambe ku lerisa ka mina emhakeni ya leswi mi nga ta swi endlela vakulukumba volavo va Vayuda, leswaku yindlu yoleyo ya Xikwembu kunene yi akiwa, ndzi ri: Mali ya ndzuvo ya hosi leyi humaka ehase ka nambu, nyikani vavanuna volavo ku humesela ntirho hi mukhuva wa kona, va nga kanakanisiwi.

⁹Hambi swi ri leswi va swi pfumalaka, kumbe tinkunzi, kumbe makhuna, ni swinyimpfana swa tiholokosta ta Xikwembu xa le matilweni, hambi yi ri koro, kumbe munyu, ni vhinyo, ni mafurha ni laha vaprista va Yerusalema, va nga kombelaka hakona, a va nyikiwe hi siku rin'wana ni rin'wana, mi nga hoxi kona;

¹⁰va ta tiva ku humesela Xikwembu xa le henhla magandzelo ya risuna, kambe va ta khongelela ku hanya ka hosi ni ka vana va yona.

¹¹Ndzi lerisa ndzi ri mina, ndzi ku: Rito leri ra mina loko ri hambuxiwa hi munhu, mhandze yi ta hlomuriwa endlwini ya yena, yi yimberiwa, kutani a beriwa eka yona; yindlu ya yena yi ta hundzuriwa tala hikwalaho ka swona.

¹²Kutani Xikwembu lexi akiseke vito ra xona kona, a xi wisele ehansi hosi yin'wana ni yin'wana, ni tiko rin'wana ni rin'wana leri nga ta tlakusa voko ku hambuxa mhaka leyi, ni ku onha yindlu yoleyo ya Xikwembu leyi nga eYerusalema. Mina, Dariyosi ndzi swi lerisile; endlani hakona sweswi.”

¹³Kutani Tatenayi, hosi ya hase ka nambu, a ri na Xetara-Bozenayi, ni vanakulobye, loko va vona leswi rhumiweke hi hosi Dariyosi, va hatlisa va endlisa sweswo.

¹⁴Kutani vakulukumba va Vayuda va aka va tsakile va tiyisiwa hi ku bvumbha ka muprofeta Hagayi ni ka Zakariya, n'wana Ido; va aka va heta hilaha ku nga vula hakona Xikwembu xa Israele, ni hilaha ku nga vula Korexe, na Dariyosi, na Ataserkisi, hosi ya Peresi.

¹⁵Kutani yindlu yi hetiwa hi siku ra vunharhu ra n'hweti ya Adara, hi lembe ra ntlhanu na rin'we ra ku fuma ka hosi Dariyosi.

¹⁶Kutani vana va Israele, ni vaprista, ni Valevhi ni lava tlheleke eku bohiweni, va khangula yindlu leyi ya Xikwembu hi ku tsaka;

¹⁷eku khanguleni ka yindlu leyi ya Xikwembu, va tlhava tinkunzi ta dzana rin'we, ni makhuna ya madzana mambirhi, ni swinyimpfana swa madzana ya mune, ni swiphongo swa khume na swimbirhi swa mhamba ya swidyoho swa Vaisraele hinkwavo, hi ntsengo wa tinyimba ta va Israele.

¹⁸Kutani vaprista va vekiwa etinxaxeni ta vona, ni Valevhi emintlaweni ya vona ku tirha mitirho ya Xikwembu xa le Yerusalema, kukotisa leswi ku tsariweke ebukwini ya Muxe.

¹⁹Lava tlheleke eku bohiweni, va endla Paseka, hi siku ra khume na mune ra n'hweti yo sungula,

²⁰hikuva vaprista ni Valevhi a va tibasisile kukotisa loko ngi a ri munhu un'we, va tengile hinkwavo; Paseka yoleyo va yi tlhavela hinkwavo lava tlheleke eku bohiweni, ni vaprista, vamakwavo va vona.

²¹Kutani vana va Israele lava tlheleke eku bohiweni, va yi dya hinkwavo, lava aveneke ni mathyaka ya matiko, lava teke ku ta hlangana na vona ku lava Yehovha, Xikwembu xa Israele.

²²Va endla nkhuvo wa swinkwa leswo kala comela, hi masiku ya ntlhanu na mambirhi hi ku tsaka, hikuva Yehovha a a va tsakisile, ni ku kucetela mbilu ya hosi ya Asiriya, leswaku yi tiyisa mavoko ya vona emitirhweni ya yindlu ya Xikwembu, ya Xikwembu xa Israele.