Read tsonga Ezra 9 Bible Online

Ezra 9 - tsonga bible

Ezra 9

¹Timhaka leti, loko ti herile, tihosana ti ndzi tshinelela mina, ti ku: “Tiko ra Israele ni vaprista, ni Valevhi a va tihlawulangi eka vanhu va matiko, kambe va etisa manyala ya vona, va nga Vakanana, ni Vahiti, ni Vaperesi, ni Vayebusi, ni Vaamoni, ni Vamowabu, ni Vaegipta ni Vaamori.

²Hilaha va tekeke vana va vona, va va tekanisa ni vana va vona, kutani rixaka ra ku kwetsima, va ri hlanganisile ni vamatiko, ku dyoha koloko ku sungurile hi tihosana ta tiko ni valerisi va rona.”

³Kuteloko ndzi twile mhaka leyi, ndzi handzula banci ra mina, ni nguvu, ndzi hluva misisi ya nhloko ya mina, ni malebvu ya mina ndzi tshama ehansi ndzi ri ni gome.

⁴Kutani ku hlengeletana eka mina, hinkwavo lava rhurhumerisiweke hi marito ya Xikwembu xa Israele, hikwalaho ka ku dyoha ka vona, lava tlheleke evukhumbini. Loko ndzi ri mina, ndzi tshama hansi, ndzi ri ni gome ku kondza ku fika nkarhi wa magandzelo ya madyambu.

⁵Hi nkarhi wa magandzelo ya madyambu, ndzi yima kona eku titsongahateni ka mina, banci ni nguvu ya mina swi handzuriwile, ndzi khinsama hi matsolo, ndzi tlakusa mavoko ya mina eka Yehovha, Xikwembu xanga,

⁶ndzi ku: “Oho! Xikwembu xa mina, ndzi tsanile hi tingana ku tlakusa mombo wanga eka wena, Xikwembu xa mina, hikuva swivi swa hina swi andzile ehenhla ka tinhloko ta hina, ni nandzu wa hina wu kurile ku fika ematilweni.

⁷Ka ha ri mpfhuka wa vatata wa hina, hi tshama enandzwini lowukulu ku fikela sweswi hikwalaho ka swidyoho swa hina, hi nyiketiwile ni tihosi ta hina, ni vaprista va hina, emavokweni ya tihosi ta matiko walawo, hi nyiketiwa fumu ni ku bohiwa, ni ku onhaka, ni tingana, kukotisa namuntlha.

⁸Kutani sweswi, Yehovha, Xikwembu xa hina, xi hi tsetselela hi nkarhinyana, leswaku xi hi siyela masalela ma nga ri mangani, ni ku hi nyika mhandze exivandleni xa xona lexi hlawuriweke, leswaku Xikwembu xa hina xi tlhela xi rhendzeleta mahlo ya hina, ni ku pfuxa vutomi bya hina switsanana eku bohiweni ka hina.

⁹Hikuva hi makhumbi kunene, kambe evukhumbini bya hina Xikwembu xa hina a xi hi tshikanga xi va xi hi kombisa tintswalo ta xona emahlweni ka tihosi ta Peresi, xi hi hanyisa, leswaku yindlu ya Xikwembu xa hina yi akiwa yi pfuxiwa erhumbini ra yona, hi ta nyikiwa rirhangu etikweni ra Yuda na Yerusalema.

¹⁰Oho! Xikwembu, hi to yini sweswi, endzhaku ka mhaka leyi? Hikuva hi fularhele milawu ya wena,

¹¹leyi u hi leriseke yona hi malandza ya wena vaprofeta, u te: ‘Tiko leri mi nga ta nghena eka rona ku ri teka, i tiko leri nyamisiweke hi thyaka ra matiko ya rona, ma ri tatisile hi manyala ya vona, ku sungula emakumo man'wana, ku yisa emakumo man'wana.

¹²Oho! Sweswi, mi nga tshuki mi nyika vana va n'wina eka vana va vona, mi nga tekeli vana va n'wina vanhwana va vona, mi nga naveli ndzalo wa vona, ni loko xi ri xuma xa vona, ni siku ni rin'we, mi ta tiva ku kuma matimba, ni ku dya ku nona ka tiko, mi ta siyela vana va n'wina tiko leri, yi va ndzhaka ya vona hilaha ku nga heriki.’

¹³“Loko ku ri laha hi nga humelela hi leswo tala, hikwalaho ka ku endla ka hina ka ku biha, ni milandzu leyikulu ya hina (kasi wena Xikwembu xa hina, u hi tsetselele, a ku hi banga hi ku biwa loku ringanaka ni makhombo ya hina, u tlhele u hi hlayisela masalela layonghasi);

¹⁴hi nga tlhela hi tlula milawu ya wena hi ku yini, ni ku tipfanganyeta ni matiko walawo ya manyala, hi ku tekana na vona xana? Xana u nga ka u nga hi kariheli, u hi heta, u nga ha siyi ni masiyela, hambi wu ri lowu poneke xana?

¹⁵Oho Yehovha, Xikwembu xa Israele, u lulamile; hina, hi lo sala hi ri lava poneke kukotisa leswi voniwaka namuntlha. Hi hina kwala, hi yimeke emahlweni ka wena hi ri ni nandzu; hikuva hi nga ka hi nga hanyi emahlweni ka wena hikwalaho ka swona.”