Read tsonga Nehemiya 2 Bible Online

Nehemiya 2 - tsonga bible

Nehemiya 2

¹En'hwetini ya Nisani, hi lembe ra makume mambirhi ra ku fuma ka Ataserkisi, kakuloko vhinyo yi ri emahlweni ka yena, ndzi teka vhinyo, ndzi nyika hosi; kambe a ndzi nga si vusangana mombo emahlweni ka yena.

²Kutani hosi yi ku eka mina: “Mombo wa wena wu khwanyela yini, kasi a ku vabyi xana? A ku na ximbe loko ri nga ri gome ra mbilu.” Kutani ndzi tshuka ngopfu,

³ndzi ku eka hosi: “Hosi a yi hanye hilaha ku nga heriki! Xana ndzi nga tshika ku khanyana mombo ha yini, leswi muti wa masirha ya vatatana wu onhakeke, timbanti ta wona ti tshama ti tshwile hi ndzilo?”

⁴Kutani hosi yi ku eka mina: “U kombela yini ka mina-ke?” Kutani ndzi khongela Xikwembu xa le matilweni,

⁵ndzi ku eka hosi: “Loko hosi yi pfumela, ni loko nandza wa wena a kuma tintswalo emahlweni ka wena, u ndzi rhumela eYudiya emutini wa masirha ya vatatana, ndzi ta tlhela ndzi wu aka.”

⁶Hosi a yi ri ni nsati wa yona, a tshamisile ekusuhi na yona, yi ku eka mina: “Rendzo leri ra wena ri ta va ra masiku mangani-ke? U ta vuya rini xana?” Kutani hosi yi pfumela ku ndzi rhuma, ndzi va ndzi n'wi byela nkarhi wokari.

⁷Kambe ndzi ku eka hosi: “Loko hosi yi pfumela, a ndzi nyikiwe papila leri yaka eka tihosi ta hase ka nambu, va ta ndzi pfulela ndlela ndzi ko ndzi ya fika eYudiya.

⁸Kambe a ndzi nyikiwe papila leri yaka eka Asafa, mukamberi wa swihlahla swa hosi, leswaku a ta ndzi nyika timhandze ta ku endla timbanti ta tinyangwa ta khokholo ra yindlu ya Yehovha, ni ta rirhangu ra muti, ni ta yindlu leyi ndzi nga ta tshama eka yona.” Hosi yi ndzi nyika mapapila walawo hilaha voko ra vunene bya Xikwembu xanga ngi ana ri le ka mina.

⁹Kutani ndzi fika eka tihosi ta hase ka nambu, ndzi va nyika mapapila ya hosi, kambe hosi a yi rhumile valerisi van'wana va mavandla, ni vakhandziyi, va ndzi heleketa.

¹⁰Sanibalati, Muhoroni, na Tobiya, nandza wa Muamoni, va va ni gome hi ku tlurisa, loko va twa leswaku ku fikile wanuna la nga ta endla vana va Israele vunene.

¹¹Ndzi fika eYerusalema, ndzi tshama masiku manharhu,

¹²kutani ndzi suka nivusiku, ndzi ri ni vanhu va nga ri vangani, hikuva a ndzi byelanga munhu leswi Xikwembu xa mina xi swi vekeke embilwini ya mina, leswaku ndzi ya swi endla eYerusalema, kambe a ndzi nga ri na xifuwo ximbe, loko xi nga ri lexi ngi ndzi xi khandziyile.

¹³Ndzi huma nivusiku hi nyangwa ya Nkova, ndzi languta tlhelo ra xihlovo xa Dragona, ni tlhelo ra nyangwa ya Vulongo, ndzi languta rirhangu ra Yerusalema, hilaha ri mbundzuxiweke hakona, ni timbanti ta kona hilaha ti tshameke ti tshwile.

¹⁴Ndzi hundzela etlhelo ra nyangwa ya Xihlovo, ni le tiveni ra hosi; kambe a ku nga ri na laha xifuwo lexi ndzi xi khandziyeke xi nga hundzaka kona.

¹⁵Kambe vusiku byebyo, ndzi tlhandluka enambyeni, ndzi valanga rirhangu, ndzi tlhela ndzi ta nghena enyangweni ya Nkova, ndzi vuyisa sweswo.

¹⁶Tihosana a ti nga tivi laha ndzi yeke kona, ni leswi ndzi swi endleke; a ndzi nga si byela Vayuda, hambi va ri vaprista, ni vakulukumba, ni tihosana, ni van'wana vatirhi va ntirho.

¹⁷Kutani ndzi ku eka vona: “Ma ri vona khombo leri hi nga eka rona, hilaha Yerusalema, wu onhakeke hakona ni hilaha timbanti ta wona ti tshweke hakona; tanani, a hi pfuxeni rirhangu ra Yerusalema, hi nga ti tshama exisandzwini.”

¹⁸Kambe ndzi va hlamusela hilaha voko ra vunene bya Xikwembu xa mina ingi ri ri eka mina: ndzi va byela marito lawa hosi yi ma vulavuleke na mina, kutani va ku: “A hi sukeni hi aka,” kutani va titiyisa ku tirha ntirho wolowo wo saseka.

¹⁹Sanibalati, Muhoroni, na Tobiya nandza wa Muamoni, na Gexeme Muarabu, kuteloko va twile mhaka leyi, va tlanga ha hina, va hi hleka, va ku: “I xini lexi mi xi endlaka? Xana mi rhandza ku tiarisela eka hosi xana?”

²⁰Ndzi va hlamula ndzi ku eka vona: “Xikwembu xa matilo, hi xona xi nga ta hi pfuna hina, malandza ya xona, hi ta pfuka hi aka. Loko mi ri n'wina, a mi na ku averiwa, ni loko yi ri mfanelo, hambi xitsundzuxo eYerusalema.”