Read tsonga Nehemiya 8 Bible Online

Nehemiya 8 - tsonga bible

Nehemiya 8

¹Kutani tiko hinkwaro ri hlengeletana erivaleni, emahlweni ka nyangwa ya Mati, kukotisa loko a ri munhu un'we va byela Ezra, mutsari ku tisa buku ya milawu ya Muxe, leyi Yehovha a yi leriseke Israele.

²Hi siku ro sungula ra n'hweti ya ntlhanu na timbirhi, Ezra, muprista, a tisa milawu emahlweni ka nhlengeletano ya vavanuna ni vavasati, ni hinkwavo lava ngi va kota ku twisisa.

³A hlaya kona erivaleni laha emahlweni ka nyangwa ya Mati, a sungula nimixo ku ko ku fika nhlekanhi, emahlweni ka vavanuna ni vavasati ni lava nga ni ku twisisa, kutani tiko hinkwaro ri rhiya tindleve ku yingisa buku ya milawu.

⁴Ezra, mutsari, a a yimile ehenhla ka tshala ra timhandze leri endleriweke enkarhini lowu; ekusuhi na yena, evokweni ra xinene, ku yimile Matitiya, na Xema, na Anaya, na Uriya, na Hilkiya, na Maaseya; hitlhelo ra ximatsi, ku yimile Pedaya, na Mixaele, na Malikiya, na Haxumu, na Haxibadana, na Zakariya na Mexulama.

⁵Ezra a phendla buku emahlweni ka tiko hinkwaro, a ungamerile tiko hinkwaro; kakuloko a phendla, tiko hinkwaro ri yima.

⁶Ezra a vonga Yehovha, Xikwembu lexikulu, kutani tiko hinkwaro ri hlamula, ri ku: “Amen! Amen!” va yimisile mavoko ehenhla, va korhama, va khinsama emahlweni ka Yehovha, va jovotela ehansi.

⁷Kutani Yexuwa, Bani, Xerebiya, Yamini, Akubu, Xabetayi, Hodiya, Maaseya, Kelita, Azariya, Yozabadi, Hanana, Pelaya, ni Valevhi, va hlamusela tiko milawu, tiko ri ri karhi ri yima kwalaho.

⁸A va hlaya buku ya milawu ya Xikwembu hi rito leri twalaka, va ri karhi va hlamusela, va twisisisa leswi hlayiwaka.

⁹Kutani Nehemiya la ngi a ri hosi, a ri na Ezra muprista ni mutsari, ni Valevhi, va dyondzisa tiko, va ku eka tiko hinkwaro: “Siku leri, hi leri hlawuleriweke Yehovha, Xikwembu xa n'wina, mi nga tshami enkosini, mi nga tshuki mi rila!” Hikuva va tiko hinkwaro a va rila loko va twa marito ya milawu.

¹⁰Va engeta va ku eka vona: “Fambani mi dya tinyama leti noneke, mi nwa leswo nandziha, mi rhumela lava nga lunghiseriwangiki nchumu swakudya, hikuva siku leri hi leri hlawuleriweke hosi ya hina; mi nga hlunami, hikuva ku tsaka ka Yehovha i matimba ya n'wina.”

¹¹Sweswo Valevhi va wisisa tiko hinkwaro, va ku: “Miyelani, hikuva siku leri, hi leri hlawuriweke, mi nga tshuki mi hlunama!”

¹²Kutani tiko hinkwaro ri suka ri ya dya, ni ku nwa, va rhumela van'wana swakudya, va endla nkhuvo lowukulu, hikuva a va twisisile marito lawa va ma byeriweke.

¹³Hi ra vumbirhi, tihosana ta tindlu ta vatatana wa tiko hinkwaro, ni vaprista, ni Valevhi, va hlengeletana eka Ezra, mutsari, ku ta dyondza marito ya milawu.

¹⁴Va kuma ku tsariwile emilawini leyi Yehovha a yi leriseke Muxe, leswaku vana va Israele va fanele ku aka emitsongeni hi masiku ya nkhuvo wa n'hweti ya ntlhanu na timbirhi,

¹⁵ni leswaku va fanele ku hangalasa ni ku rhuma xitiviso emitini hinkwayo ya vona ni Yerusalema, lexi nge: “Yanani entshaveni mi ya teka marhavi ya mutlhwari lowu velekaka mafurha, ni marhavi ya mutlhwari wa nhova, ni marhavi ya mirta, ni marhavi ya micindzu, ni marhavi ya mirhi leyi teleke matluka, mi ta endla mitsonga ha wona, hilaha ku tsariweke hakona.”

¹⁶Hi kona tiko ri sukaka, ri ya lava marhavi kutani va tiendlela mitsonga, un'wana ni un'wana ehenhla ka yindlu ya yena, kumbe erivaleni ra yona, ni le rivaleni ra yindlu ya Xikwembu, ni le ntsendzeleni wa nyangwa ya Mati, ni le ntsendzeleni wa nyangwa ya ka Efrayimi.

¹⁷Nhlengeletano hinkwayo ya lava tlheleke eku bohiweni, va endla mitsonga, kutani va tshama emitsongeni yeleyo; hikuva vana va Israele a va nga si endla sweswo, ka ha ri mpfhuka Yoxuwa, n'wana Nuni, a ri kona, ku fikela sweswi. Ku tsaka ku va lokukulu ngopfu.

¹⁸Ku hlayiwa buku ya milawu ya Xikwembu, siku rin'wana ni rin'wana, ku sungula hi siku ro rhanga, ku fika ro hetelela; va endla nkhuvo hi masiku ya ntlhanu na mambirhi; hi ra ntlhanu na manharhu ku endliwa nhlengeletano leyikulu ngopfu, hilaha ku lerisiweke hakona.