Read tsonga Estere 1 Bible Online

Estere 1 - tsonga bible

Estere 1

¹Emikarhini ya Ahasuwerusi. (I Ahasuwerusi loyi ingi a fuma ehenhla ka matiko ya 127, ku suka eIndiya ku ya fika eEtiyopiya),

²ndzi ri, emikarhini leyo, kuteloko hosi Ahasuwerusi a tshamisile exitshan'weni xa vuhosi bya yena, eXuxani, wu nga ntsindza,

³elembeni ra vunharhu ra ku fuma ka yena, a endla nkhuvo, a wu endlela tihosana hinkwato ta yena, ni malandza hinkwawo ya yena; ni nyimpi ya Peresi ni ya Mediya, ni tihosana, ni vakulukumba va matiko ya yena, lava hlengeletaneke emahlweni ka yena.

⁴A va kombisa xuma ni ku kwetsima ka ku fuma ka yena, ni ku saseka ni vubombi bya vukulu bya yena, hi masiku lamanyingi, ma nga masiku ya 180.

⁵Masiku lawa loko ma hundzile, hosi yi endlela vanhu hinkwavo ku sungula hi lavakulu ku fika eka lavatsongo lava nga eXuxani, ntsindza, nkhuvo wa masiku ya ntlhanu na mambirhi, exikarhi ka rivala ra masimu ya yindlu ya hosi.

⁶Kona, a ku ri ni tinguvu ta ntsembyana lowo basa, ni ta rihlaza, ni ta ribungu, ingi ti hayekiwile hi tingoti ta ntsembyana lowa ribungu eswingwavileni swa silivhere, ni le timhandzeni ta mabulu lowo basa; kambe, a ku ri ni swilawu swa nsuku ni silivhere evukandziyweni bya porfira, ni bya mabulu lowo basa, ni bya tinkatla, ni bya maribye laya ntima.

⁷Ku nweriwa emikambaneni ya nsuku; mikambana yi ri ya tinxakaxaka; vhinyo ya hosi a yi tele hilaha hosi yi rhandzeke ku nyika hakona.

⁸Ku lerisa ku va kona leswaku munhu a nga sindzisiwi ku nwa, hikuva hosi a yi lerisile tindhuna hinkwato ta yindlu ya yona, leswaku ku endleriwa un'wana ni un'wana hi ku rhandza ka yena.

⁹Loko yi ri nkosikazi Vhasiti, yena a endlela vavasati nkhuvo endlwini ya vuhosi, yi nga ya hosi Ahasuwerusi.

¹⁰Hi siku ra ntlhanu na mambirhi, kuteloko mbilu ya hosi yi tsakile hi vhinyo, yi lerisa Mehumani, na Bizita, na Harabona, na Bigita, na Abagita, na Zetara, na Karakasi, ti nga tindhuna ta ntlhanu na timbirhi leti yimaka emahlweni ka hosi Ahasuwerusi ku n'wi tirhela,

¹¹leswaku ti tisa emahlweni ka hosi nkosikazi Vhasiti, a rhwele harhi ya vuhosi enhlokweni ya yena leswaku a ta ta kombisa vumbhurhi bya yena eka vanhu ni tihosana hinkwato ta yena; hikuva a a ri munhu wa nghohe leyo saseka ngopfu.

¹²Kambe nkosikazi Vhasiti a ala ku ta hi nomu wa hosi lowu yisiweke eka yena hi tindhuna; hosi yi kariha ngopfu ha swona, kutani vukari bya yena byi pfurha endzeni ka yena.

¹³Hilaha hosi yi vulavulaka ni lava vutlhari lava tivaka mikarhi (hikuva mhaka yihi ni yihi ya hosi a yi vulavurisiwa xisweswo emahlweni ka hinkwavo lava tivaka ku lerisa ni timfanelo);

¹⁴kambe lava ingi va ri ekusuhi na yena a a ri Karixena, na Xetara, na Adimata, na Tarxixi, na Merese, na Marisena na Memukana, ti nga tihosana ta ntlhanu na timbirhi ta Peresi na Mediya, leti ngi ti vona nghohe ya hosi, kambe a ti ri leti ngi ti tshama eswitshan'weni leswi tlakukeke evuhosini. A ku eka vona:

¹⁵“Hi ta endla yini eka nkosikazi Vhasiti hilaha milawu yi nga kona, hikuva a nga endlanga hi rito ra hosi Ahasuwerusi leri yisiweke eka yena hi tindhuna?”

¹⁶Hilaha Memukana a hlamulaka emahlweni ka hosi ni tihosana, a ku: “Nkosikazi Vhasiti a nga dyohelenga hosi swakwe, u dyohele ni tihosana hinkwato, ni vanhu hinkwavo va le matikweni hinkwawo ya hosi Ahasuwerusi.

¹⁷Hikuva ku endla loko ka nkosikazi ku ta twala exikarhi ka vavasati hinkwavo, kutani vanuna va vona va ta soriwa emahlweni ka vona va ta ku: ‘Hosi Ahasuwerusi a lerisile leswaku ku tisiwa nkosikazi Vhasiti emahlweni ka yena, kambe u arile ku ta.’

¹⁸Loko swi ri tano, ku suka esikwini leri, tinkosikazi ta Peresi na Mediya leti tweke ku endla ka nkosikazi, ti ta vulavula mhaka yi ri yin'we eka tihosana, kutani xisolo ni vukari lebyo tala swi ta va kona.

¹⁹Hikwalaho, loko hosi yi pfumela, ku lerisa ka ku fuma a ku endliwe hi yena, kutani ku tsariwa ebukwini ya milawu ya Peresi na Mediya, ku va loku nga riki na ku hundzuka, leswaku, Vhasiti a nga ha tshuki a ta emahlweni ka hosi Ahasuwerusi, kutani hosi a yi nyike vukosikazi bya yena eka un'wana la n'wi tlulaka hi ku lulama.

²⁰Ku lerisa loku endliwaka hi hosi ku ta twiwa eku fumeni ka yena hinkwako (hambi ku kurile), kutani vavasati hinkwavo va ta chava vanuna va vona ku sungula hi lonkulu ku yisa ka lontsongo.”

²¹Marito walawo ma tsakisa hosi ni tihosana, kutani hosi yi endla hi marito ya Memukana.

²²A rhumela matsalwa ematikweni hinkwawo ya hosi, etikweni rin'wana ni rin'wana hi matsalele ya rona, ni vanhu van'wana ni van'wana hi ku vulavula ka vona, va ku, wanuna un'wana ni un'wana a a ve hosi endlwini ya yena, kutani a vulavula hi ririmi ra varikwavo.