Read tsonga Eksoda 13 Bible Online

Eksoda 13 - tsonga bible

Eksoda 13

¹Yehovha a vulavula na Muxe, a ku: “U ndzi hlawulela mativula hinkwawo;

²hinkwaswo leswi tivulaka exikarhi ka vana va Israele, hambi va ri vanhu, hambi swi ri swifuwo, i swa mina.”

³Kutani Muxe a ku eka tiko: “Anakanyani siku leri mi humesiweke ha rona Egipta, endlwini ya vukhumbi; hikuva Yehovha u mi humesile kona hi voko ra matimba; kambe mi nga tshuki mi dya leswi dzungaka hi siku lero.

⁴Mi humile hi siku rero ra n'hweti ya Abibi.

⁵Kutakuloko Yehovha a mi fikisile etikweni ra Vakanana, ni ra Vahiti, ni ra Vaamori, ni ra Vahivhi, ni ra Vayebusi, leri a nga hlambanyela vatata wa n'wina ku mi nyika rona, tiko ra ntswamba ni vulombe; hi n'hweti leyi, mi ta hlayisa ku lerisa loku.

⁶Mi ta dya vuswa lebyo kala comela hi ntlhanu wa masiku ni masiku mambirhi; kutani hi siku ra ntlhanu na mambirhi, ku ta va nkhuvo wa Yehovha.

⁷Va ta dya vuswa lebyo kala comela hi ntlhanu wa masiku ni masiku mambirhi. Ku nga tshuki ku voniwa vuswa lebyi nga ni comela; ni comela xi nga tshuki xi voniwa etikweni ra wena hinkwaro.

⁸Hi kona u nga ta byela n'wana wa wena, u ku: ‘Lexi, i xitsundzuxo xa leswi Yehovha a ndzi endleleke swona loko ndzi huma eEgipta.’

⁹Xi ta va xikombiso evokweni ra wena, ni xitsundzuxo exikarhi ka mahlo ya wena. Nawu wa Yehovha wu ta va enon'wini wa wena, hikuva Yehovha a ku humesile eEgipta hi voko ra matimba.

¹⁰U ta hlayisa ku lerisa kuloku hi nkarhi wa kona hi malembe hinkwawo.

¹¹“Kutakuloko Yehovha a ku fikisile etikweni ra Vakanana hilaha a hlambanyeleke wena ni vatata wa wena, a va a ku nyika rona,

¹²u ta avela Yehovha mativula hinkwawo, ni mativula hinkwawo ya swifuwo swa wena; swa matsune hinkwaswo swi ta va swa Yehovha.

¹³Kambe mativula hinkwawo ya timbhongolo ma ta kutsuriwa hi swinyimpfana; kambe loko u nga ma kutsulanga, u ta tshova nhamu. Kutani mativula hinkwawo ya vanhu exikarhi ka vana va wena, u ta ma kutsula.

¹⁴Kutakuloko n'wana wa wena a ku vutisa emikarhini yin'wana, a ku: ‘Mhaka leyi i yihi?’ U ta ku eka yena: ‘Yehovha u hi humesile hi voko ra matimba endlwini ya vukhumbi;

¹⁵kuteloko Faro a arile ku hi tshunxa, Yehovha u dlayile mativula hinkwawo ya tiko ra Egipta, ku sungula hi mativula ya vanhu ku fikela eka mativula ya swifuwo; hikwalaho ndzi tlhavelaka Yehovha mativula hinkwawo ya matsune, kutani vana va mina hinkwavo va mativula, ndza va kutsula.’

¹⁶Xi ta va xikombiso evokweni ra wena, ni le mombyeni wa wena; hikuva Yehovha u hi humesile eEgipta hi voko ra matimba.”

¹⁷Kuteloko Faro a tshunxe tiko, Xikwembu a xi ri fambisanga hi ndlela ya tiko ra Vafilista leyi hatlisaka, hikuva Xikwembu a xi ku: “Kumbe tiko ri nga tlhela loko ri vona nyimpi, kutani ri vuyela eEgipta.”

¹⁸Kambe Xikwembu xi hambukise tiko hi ndlela ya mananga ya Lwandle ro Tshwuka. Vana va Israele va hume etikweni ra Egipta va hlomile.

¹⁹Muxe a teka na yena marhambu ya Yosefa; hikuva Yosefa a hlambanyele vana va Israele, a ku: “Kunene Xikwembu xi ta mi endzela kutani mi ta suka halenu mi tekile; marhambu ya mina.”

²⁰Kutani va suka eSukoti, va ya fika eEtamu, va aka mitsonga kona, emaaveni ya mananga.

²¹Yehovha a va rhangela emahlweni hi ku nembelela ka papa ninhlekanhi, ku va komba ndlela, ni ku pfurha ka ndzilo nivusiku ku va voningela leswaku va famba nhlekanhi ni vusiku.

²²Ku nembelela ka papa ninhlekanhi, ni ku pfurha ka ndzilo nivusiku, a ku sukanga emahlweni ka tiko.