Read tsonga Eksoda 16 Bible Online

Eksoda 16 - tsonga bible

Eksoda 16

¹Nhlengeletano hinkwayo ya vana va Israele yi suka eElimi, kutani va fika emananga ya Sina, la nga exikarhi ka Elimi na Sinayi, hi siku ra khume na ntlhanu ra n'hweti ya vumbirhi, ya ku huma ka vona etikweni ra Egipta.

²Kutani nhlengeletano hinkwayo ya vana va Israele yi karihela Muxe na Aroni emananga.

³Vana va Israele va ku: “Nge hi dlayiwe hi voko ra Yehovha etikweni ra Egipta, hi ri karhi hi titshamele xikarhi ka timbita ta nyama, hi dya ni vuswa, hi xurha. Hikuva mi hi humesile hi fika la mananga leswaku mi dlaya tiko leri hinkwaro hi ndlala.”

⁴Kutani Yehovha a ku eka Muxe: “Waswivo, ndzi ta mi nisela vuswa lebyi humaka etilweni, tiko ri ta huma ri tihlengeletela leswi ringanaka siku rin'wana ni rin'wana, leswaku ndzi va ringa loko va ta famba hi nawu wa mina, kumbe loko swi nga ri tano.

⁵Kutani hi siku ra ntlhanu na rin'we va ta sweka leswi ringanaka swa masiku mambirhi.”

⁶Kutani Muxe na Aroni va ku eka vana va Israele hinkwavo: “Nimadyambu mi ta tiva leswaku i Yehovha la mi humeseke etikweni ra Egipta.

⁷Nimixo mi ta vona ku kwetsima ka Yehovha, hikuva u yingisile hilaha mi dzumadzumeleke Yehovha: xana hina hi va mani leswi mi hi karihelaka?”

⁸Muxe a engeta a ku: “Kunene Yehovha u ta mi nyika nyama nimadyambu mi dya, nimixo a mi nyika vuswa mi xurha, hikuva u yingisile ku dzumadzuma ka n'wina, hilaha mi n'wi kariheleke hakona. Hikuva hina ho va swini-ke? A mi karihelanga hina, mi karihele Yehovha.”

⁹Kutani Muxe a ku eka Aroni: “Byela nhlengeletano hinkwayo ya vana va Israele, u ku: ‘Tshinelani ekusuhi na Yehovha, hikuva u yingisile ku dzumadzuma ka n'wina.’ ”

¹⁰Kutani loko Aroni a ri karhi a vulavula ni nhlengeletano ya vana va Israele, a va languta tlhelo ra mananga, kutani ku kwetsima ka Yehovha ku vonaka epapeni;

¹¹kutani Yehovha a vulavula na Muxe, a ku:

¹²“Ndzi yingisile ku dzumadzuma ka vana va Israele; u va byela, u ku: ‘Nimadyambu mi ta dya nyama, nimixo mi ta xurha vuswa; mi ta tiva leswaku hi mina Yehovha, Xikwembu xa n'wina.’ ”

¹³Nimadyambu switsatsatsa swi huma swi tata mixaxa; nimixo mberha a yi wile, yi rhendzele mixaxa.

¹⁴Kuteloko mberha yi hlanhlekile, a ku ri ni swilo leswo nge tindzhohonyana laha erivaleni, swi fana ni gamboko ehenhla ka misava.

¹⁵Vana va Israele loko va swi vona, va vutisana, va ku: “I swini leswi?” hikuva a va nga tivi leswaku i swini. Kutani Muxe a ku: “Hi byona vuswa lebyi Yehovha a mi nyikaka byona leswaku mi dya.

¹⁶Hi yona mhaka leyi Yehovha a mi leriseke, a ku: ‘Un'wana ni un'wana a tihlengeletele hi ku ringanisa ku dya ka yena, mpimo wa homere hi nhloko yin'wana ni yin'wana hi ku hlaya ka vanhu, un'wana ni un'wana u ta hlengeletela lava nga entsongeni wa yena.’ ”

¹⁷Vana va Israele va endlisa sweswo van'wana va tihlengeletela ngopfu van'wana switsongo.

¹⁸Kutani va pima hi homere; loyi ngi a hlengeletile ngopfu, a nga tlulanga van'wana, ni loyi ngi a hlengelete switsongo a nga pfumalanga. Un'wana ni un'wana a tihlengeletela hilaha a dyaka hakona.

¹⁹Kutani Muxe a ku eka vona: “Ku nga vi na munhu la tivekelaka swa nimixo.”

²⁰Kambe a va yingisanga Muxe, van'wana va tivekele swa nimixo, kambe ku hume swivungu, swi nun'hwa; kutani Muxe a va karihela.

²¹Masiku hinkwawo, nimixo, un'wana ni un'wana a a tihlengeletela hilaha a dyaka hakona; kutani loko dyambu ri tlhava, a swi n'oka.

²²Hi siku ra ntlhanu na rin'we va hlengeleta swakudya kambirhi, mipimo mimbirhi hi munhu un'wana ni un'wana. Kavaloko vakulukumba hinkwavo va nhlengeletano va ta tivisa Muxe.

²³Kutani Muxe a ku eka vona: “Hi yona mhaka leyi lerisiweke hi Yehovha. Mundzuku i siku ra ku wisa, i Savata leri hlawuleriweke Yehovha; leswi mi swi swekaka, swekani namuntlha, mi oxa leswi oxiwaka, kutani hinkwaswo leswi salaka, mi swi hlayisela mundzuku.”

²⁴Va swi hlayisa ku fika nimixo, hilaha Muxe a leriseke hakona; kambe a swi bolanga, a swi humangi swivungu.

²⁵Kutani Muxe a ku: “Namuntlha dyanani swona, hikuva i ku wisa ka Yehovha; namuntlha mi nga ka mi nga kumi nchumu enhoveni.

²⁶Mi ta tihlengeletela swona hi masiku ya ntlhanu na rin'we, kambe hi siku ra ntlhanu na mambirhi i Savata, swi nga ka swi nga vi kona.”

²⁷Hi siku ra ntlhanu na mambirhi, van'wana va tiko va huma ku ya hlengeleta swona, kambe a va kumanga nchumu.

²⁸Kutani Yehovha a ku eka Muxe: “Mi ta ala ku yisa kwihi ku hlayisa ku lerisa ka mina ni milawu ya mina?

²⁹Anakanyani leswaku Yehovha u mi nyikile Savata, hikwalaho a mi nyikaka vuswa bya masiku mambirhi hi siku ra ntlhanu na rin'we. Un'wana ni un'wana a a tshame ekaya, ku nga tshuki ku va na munhu la humaka ekaya hi siku ra ntlhanu na mambirhi.”

³⁰Kutani tiko ri wisa hi siku ra ntlhanu na mambirhi.

³¹Kutani va yindlu ya Israele va thya vuswa lebyi vito ra manna (hileswaku i yini); a yi fana ni tindzhoho leto basa ta khoriyanda, swi nandziha kukota swimbundzu leswi pfuviweke ni vulombe.

³²Kutani Muxe a ku: “Mhaka leyi lerisiweke hi Yehovha hi leyi: A ku hlayisiwe homere leyi teleke hi manna exikarhi ka tinxaka ta n'wina ti ta vona vuswa lebyi ndzi mi phameleke byona emananga loko ndzi mi humesa etikweni ra Egipta.”

³³Kutani Muxe a ku eka Aroni: “Teka mbita, u yi chela homere leyi teleke hi manna, u yi veka emahlweni ka Yehovha ku yi hlayisela tinxaka ta n'wina.”

³⁴Hilaha Yehovha a leriseke Muxe hakona, Aroni a yi veka emahlweni ka Vumbhoni leswaku yi hlayisiwa kona.

³⁵Vana va Israele va dya manna hi mune wa makume ya malembe va kondza va nghena etikweni leri akiweke va dya manna va kondza va fika emaaveni ya tiko ra Kanana.

³⁶Mpimo wa homere, loko wu hlayiwa eka khume, wu endla efa.