Read tsonga Eksoda 19 Bible Online

Eksoda 19 - tsonga bible

Eksoda 19

¹Kuteloko ku hundzile tin'hweti tinharhu, mpfhuka vana va Israele va humile etikweni ra Egipta, hi siku rero, va fika emananga ya Sinayi.

²Kuteloko va sukile eRefidimi, va fika emananga ya Sinayi, va aka mitsonga ya vona mananga; Israele a aka mitsonga yi langutene ni ntshava.

³Kutani Muxe a tlhandlukela eka Xikwembu, Yehovha a n'wi vitana a ri entshaveni, a ku: “Vulavula ni yindlu ya Yakobo, u byela vana va Israele u ku:

⁴‘Mi vonile leswi ndzi swi endleke eka Vaegipta, hilaha ndzi mi velekeke ehenhla ka timpapa ta gama, ndzi mi tisa eka mina.

⁵Kutani sweswi, loko mi yingisa rito ra mina, mi hlayisa ntwanano wa mina, mi ta va rifuwo ra mina kunene ehenhla ka matiko man'wana hinkwawo, hikuva misava hinkwayo i ya mina.

⁶Mi ta va tiko ra vaprista, tiko leri hlawuriweke.’ ” Hi wona marito lawa u nga ta ma vula eka vana va Israele.

⁷Kutani Muxe a vitana vakulukumba va tiko, a va humesela marito hinkwawo lawa Yehovha a n'wi leriseke wona.

⁸Kutani tiko hinkwaro ri hlamula swin'we ri ku: “Hinkwaswo leswi Yehovha a swi vuleke, hi ta swi endla.” Kutani Muxe a yisa marito hinkwawo ya tiko eka Yehovha.

⁹Kavaloko Yehovha a ku eka Muxe: “Languta, ndzi ta ta eka wena epapeni lero tsindziyela, leswaku tiko ri switwa loko ndzi vulavula na wena ri va ri ku yingisela hi masiku.” Kutani Muxe a tshama a byela Yehovha marito ya tiko.

¹⁰Yehovha a ku eka Muxe: “Yana eka tiko, u ri basisa namuntlha ni mundzuku, va hlantswa tinguvu ta vona;

¹¹va tilunghisela siku ra vunharhu; hikuva hi siku ra vunharhu Yehovha u ta xikela entshaveni ya Sinayi emahlweni ka tiko hinkwaro.

¹²Kambe u ta byela tiko ndzilakana lowu rhendzelaka ntshava, u ku: ‘Mi nga tshuki mi khandziya entshaveni, mi nga khumbi matlhelo ya yona,’ munhu la nga ta khumba ntshava u ta dlawa.

¹³Va nga ka va nga n'wi khomi hi voko, kambe u ta khandliwa hi maribye, kumbe a dlawa hi tlhari; hambi xi ri xifuwo, hambi a ri munhu, a nga ka a nga hanyi. Kutakuloko nanga yi rila, va ta khandziya entshaveni.”

¹⁴Kutani Muxe a ngirimela entshaveni, a ya eka tiko, a basisa tiko, vona va hlantswa tinguvu ta vona.

¹⁵Muxe a ku ta tiko: “Tilunghiseleni siku ra vunharhu; mi nga tshuki mi vundzamana ni vavasati.”

¹⁶Hi siku ra vunharhu, loko byi xa, ku pfuma ku va kona ni ku hatima, ni papa lera ntima ri va ehenhla ka ntshava, ni ku pfuma lokukulu ka nanga; kutani vanhu hinkwavo lava ngi va ri emixaxeni, va rhurhumela.

¹⁷Kutani Muxe a humese tiko emixaxeni, ri ya hlangana ni Xikwembu, va yime hansi ka ntshava.

¹⁸Kutani ntshava ya Sinayi a yi mbuluka musi hi matlhelo hinkwawo, hikuva Yehovha a a xikile ka yona a ri endzilweni; musi wa yona wu mbulukele henhla kukota musi wa xitiko; kutani ntshava hinkwayo a yi tsekatseka ngopfu.

¹⁹Mpfumawulo wa nanga a wu twakala ku tlurisa; Muxe a a ri karhi a vulavula, kutani Xikwembu a xi n'wi hlamula hi rito.

²⁰Sweswo Yehovha a rhelele entshaveni ya Sinayi, enhlohlorhini ya ntshava; kutani Yehovha a vitana Muxe enhlohlorhini ya ntshava, kutani Muxe a khandziyela kona.

²¹Yehovha a ku eka Muxe: “Ngirimela, u lerisa tiko leswaku ri nga tshuki ri tshinela ku ta vona Yehovha; ku nga fa vanhu lavo tala exikarhi ka vona.

²²Hambi va ri vaprista lava tshinelelaka Yehovha, va fanele ku tikwetsimisa na vona, leswaku Yehovha a nga va dlayi.”

²³Kutani Muxe a ku eka Yehovha: “Tiko ri nga ka ri nga khandziyi entshaveni ya Sinayi, hikuva u hi byerile leswaku: Rhendzelekela ntshava hi ndzilakana, u ri kwetsimisa.”

²⁴Kutani Yehovha a ku eka yena: “Rhelela, u ta khandziya na Aroni kambe vaprista ni tiko va nga tshuki va ringeta ku tlhandlukela eka Yehovha; va nga ti dlawa.”

²⁵Muxe a rhelela, a ya byela tiko mhaka leyi.