Read tsonga Eksoda 20 Bible Online

Eksoda 20 - tsonga bible

Eksoda 20

¹Kutani Xikwembu xi vulavula marito walawo hinkwawo, xi ku:

²“Hi mina Yehovha, Xikwembu xa wena la ku humeseke etikweni ra Egipta endlwini ya vukhumbi.

³“U nga tshuki u va ni swikwembu swin'wana emahlweni ka mina.

⁴“U nga tshuki u tiendlela xifaniso lexi vatliweke, ni loko xi ri xifaniso xihi ni xihi xa swilo leswi nga ehenhla etilweni, ni loko xi ri xa swilo leswi nga ehansi emisaveni, ni loko xi ri xa swilo leswi nga ematini, ehansi ka misava;

⁵u nga tshuki u swi khinsamela, ni loko ku ri ku swi tirhela; hikuva hi mina Yehovha, Xikwembu xa wena, xa rilaveta, lexi baka vana hikwalaho ka ku homboloka ka vatswari va vona, ku yisa erixakeni ra vunharhu ni ra vumune eka lava ndzi vengaka;

⁶kambe ndzi tsetselela lava ndzi rhandzaka, lava hlayisaka milawu ya mina ku yisa erixakeni ra khume ra madzana.

⁷“U nga tshuki u tlanga hi vito ra Yehovha Xikwembu xa wena, hikuva Yehovha a nga ka a nga tshiki nandzu wa la tlangaka hi vito ra yena.

⁸“Anakanya siku ra ku wisa ku ri hlawulekisa.

⁹U ta tirha hi masiku ya ntlhanu na rin'we, u tirha ntirho wa wena hinkwawo;

¹⁰kambe siku ra vuntlhanu na mambirhi, i siku ro wisa ra Yehovha, Xikwembu xa wena. U nga tshuki u tirha ntirho ni wun'we hi siku lero, hambi u ri wena, hambi a ri n'wana wa wena wa wanuna, kumbe wa wansati; hambi a ri nandza wa wena wa wanuna, kumbe wa wansati; hambi swi ri swifuwo swa wena, hambi a ri muendzi wa wena la nga emutini wa wena.

¹¹Hikuva hi masiku ya ntlhanu na rin'we, Yehovha u endle tilo ni misava, ni lwandle, ni swilo hinkwaswo leswi nga eka swona; kambe u wisile hi siku ra vuntlhanu na mambirhi. Hikwalaho Yehovha a nga katekisa siku ra ku wisa, a va a ri hlawulekisa.

¹²“Xixima tata wa wena ni mana wa wena, leswaku masiku ya wena ma engeteriwa emisaveni leyi u yi nyikiwaka hi Yehovha, Xikwembu xa wena.

¹³“U nga tshuki u dlaya.

¹⁴“U nga tshuki u oswa.

¹⁵“U nga tshuki u yiva.

¹⁶“U nga tshuki u lumbeta warikwenu hi vumbhoni byo hemba.

¹⁷“U nga tshuki u navela yindlu ya warikwenu, u nga tshuki u navela nsati wa yena, hambi a ri nandza wa yena wa wanuna, kumbe wa wansati hambi yi ri homu ya yena, hambi yi ri mbhongolo ya yena, hambi xi ri xilo xin'wana xa warikwenu.”

¹⁸Tiko hinkwaro ri yingisa ku pfuma ni mpfumawulo wa nanga ri vona ku hatima, ni ntshava loko yi ri karhi yi mbuluka musi. Kuteloko tiko ri vone sweswo, ri rhurhumela ngopfu, ri yimela ekule.

¹⁹Kutani va ku eka Muxe: “Vulavula na hina, hi ta ku yingisa; kambe Xikwembu xi nga tshuki xi vulavula na hina, hi nga ta fa.”

²⁰Kutani Muxe a ku eka tiko: “Mi nga chaveni hikuva Xikwembu xi tile ku ta mi ringa leswaku nchavo wa xona wu va emahlweni ka n'wina leswaku mi nga dyohi.”

²¹Kutani tiko ri yima ekule, kambe Muxe a tshinela emunyameni, laha Xikwembu ingi xi ri kona.

²²Yehovha a ku eka Muxe: “U nge ka vana va Israele: Mi vonile hilaha ndzi nga vulavula na n'wina hakona ndzi ri ematilweni.

²³Mi nga tshuki mi tiendlela swikwembu swa silivhere, ni swa nsuku ehandle ka mina.

²⁴U ta ndzi akela alitari ya misava, laha u nga ta tlhavela kona magandzelo ya wena, ni timhamba ta wena ta tinyimpfu ni ta tihomu. Hinkwako laha ndzi nga ta veka xitsundzuxo xa vito ra mina, ndzi ta ta eka wena kona, ndzi ku katekisa.

²⁵Loko u ndzi akele alitari hi maribye, u nga tshuki u yi aka hi maribye lama vatliweke; hikuva kungakuloko u tlakusa nsimbhi ya wena ehenhla ka wona, u nga yi nyamisa.

²⁶U nga tshuki u khandziya ealitarini ya mina hi phandze, vuhava bya wena byi nga ti vonaka.