Read tsonga Eksoda 30 Bible Online

Eksoda 30 - tsonga bible

Eksoda 30

¹“U ta endla alitari ya ku hisa mirhi ya risuna; u yi endla hi murhi wa munga.

²Ku leha ka yona xi ta va xisungunhu xin'we, ni ku anama ka yona xisungunhu xin'we. Yi ta va ni matlhelo ya mune lama ringanaka; kambe xiyimo xa yona swi ta va swisungunhu swimbirhi; timhondzo ti ta huma eka yona.

³U ta yi nameka hi nsuku lowo saseka ehenhla, ni matlhelo hinkwawo, ni le timhondzweni; u ta yi endlela xirhendzevutana xa nsuku lexi yi rhendzelekelaka.

⁴U yi endlela ni swingwavila swimbirhi swa nsuku ehansi ka xirhendzevutana hi matlhelo mambirhi: u swi veka ematlhelweni mambirhi leswaku mimpingu yi nghena eka swona ku yi pinga.

⁵U ta endla ni mimpingu ya murhi wa munga, u yi nameka ni nsuku.

⁶U ta yimisa alitari, yi lavana ni nguvu leyi nga emahlweni ka areka ya vumbhoni, ni xikhongelelo lexi nga ehenhla ka vumbhoni, laha ndzi nga ta hlengeletana kona na wena.

⁷Aroni u ta hisela ka yona mirhi ya risuna hi masiku hinkwawo, nimixo loko a lunghisa timboningo;

⁸nimadyambu, kakuloko a lumeka timboningo, u ta hisa mirhi ya risuna; yi va mirhi ya risuna leyi nga heriki emahlweni ka Yehovha etinxakeni ta n'wina.

⁹Mi nga tshuki mi hisela kona mirhi ya rixaka rin'wana, kumbe magandzelo, kumbe ku nyika kun'wana, hambi ku ri ku chela xilo xin'wana kona.

¹⁰Aroni u ta endla mhamba etimhondzweni ta alitari siku rin'we hi lembe hi ngati ya gandzelo ra xidyoho. Kan'we hi lembe, u ta endla ealitarini mhamba etinxakeni ta tinxaka. Alitari leyi, yi ta va leyi hlawuriweke ngopfu emahlweni ka Yehovha.”

¹¹Kutani Yehovha a vulavula na Muxe, a ku:

¹²“Kutakuloko u hlaya vana va Israele hi vunyingi bya vona un'wana ni un'wana u ta kutsula vutomi bya yena emahlweni ka Yehovha siku leri va hlayiwaka, leswaku va nga tshuki va humeleriwa hi vuvabyi siku va hlayiwaka.

¹³Hinkwavo lava nga ta hlayiwa va ta humesa hafu ya xikele (hi mpimo wa xikele ya vukwetsimelo lexi nga ni makume mambirhi ya tiobola), hafu ya xikele yi ta nyikiwa Yehovha.

¹⁴Un'wana ni un'wana la hlayiwaka, ku sungula hi va malembe ya makume mambirhi, ni lava hundzaka, va ta humesa nhlengo wa Yehovha.

¹⁵Mufumi a nga tshuki a engeta, ni xisiwana xi nga tshuki xi hunguta eka hafu ya xikele, loko va humesa nhlengo wa Yehovha, ku endla mhamba ya ku kutsula vutomi bya n'wina.

¹⁶U ta teka mali ya ku tikutsula, leyi humesiwaka hi vana va Israele, u ta tirha ha yona ntirho wa yindlu ya nhlengeletano; xi ta va xitsundzuxo eka vana va Israele emahlweni ka Yehovha, ku endla mhamba yo kutsula vutomi bya n'wina.”

¹⁷Kutani Yehovha a vulavula na Muxe, a ku:

¹⁸“U ta endla nkamba hi koporo, lowu nga ni tshako ra koporo, ku hlamba eka wona; u ta wu veka exikarhi ka yindlu ya nhlengeletano ni alitari, kutani u ta chela mati ka wona,

¹⁹leswaku Aroni ni vana va yena va hlambela kona mavoko ni milenge.

²⁰Kutakuloko va nghena endlwini ya nhlengeletano, va ta hlamba hi mati, va nga ti tshuka va fa; va ta hlamba kambe loko va tshinela ealitarini ku tirha ntirho wa magandzelo lama hiseriwaka Yehovha;

²¹va ta hlamba mavoko ni milenge va nga ti fa. Ku ta va ku lerisa loku nga heriki ka Aroni ni vatukulu va yena etinxakeni ta vona.”

²²Yehovha a engeta a byela Muxe, a ku:

²³“U ta teka mirhi ya risuna leyo saseka, yi ri mirha yo saseka, ku tika kantlhanu wa madzana ya tixikele, ni sinamoni, u ta teka hafu, hileswaku tixikele ta 250, ni rihlanga leri nun'hwelaka, tixikele ta 250;

²⁴ni tixikele ta ntlhanu wa madzana ya kasiya, hi mpimo wa xikele ya vukwetsimelo, ni mpimo wa hini wa mafurha ya mitlhwari.

²⁵U ta endla ha swona mafurha ya ku tola loku hlawuriweke, u swi hlanganisa hi mukhuva lowu va hlanganisaka ha wona swa risuna, ma ta va mafurha ya xitolelo lexi hlawuriweke.

²⁶U ta tota ha wona yindlu ya nhlengeletano ni areka ya vumbhoni,

²⁷ni tafula, ni mitirho hinkwayo ya rona, ni kandelari, ni mitirho ya yena, ni alitari ya mirhi ya risuna,

²⁸ni alitari ya magandzelo lama hisiwaka, ni mitirho hinkwayo ya yona; ni nkamba ni ntshako ra wona.

²⁹U ta swi hlawula, kutani swi ta va swilo leswi hlawuriweke ngopfu; hinkwaswo leswi nga ta swi khumba swi ta hlawuriwa.

³⁰Kutani u ta tota Aroni ni vana va yena u va hlawula leswaku va tirha vuprista emahlweni ka mina,

³¹kutani u ta byela vana va Israele, u ku: ‘Hi wona mafurha ya ku tola loku hlawuriweke, ma ta va ya mina etinxakeni hinkwato ta n'wina.

³²Ma nga tshuki ma toriwa hi munhu un'wana; mi nga tshuki mi hlanganisa man'wana lama fanaka na wona, ma hlawuriwile; ni le ka n'wina ma ta va lama hlawuriweke.

³³Mani na mani la lunghisaka mirhi leyo tano, kumbe, la totaka wamatiko ha wona, u ta humesiwa exikarhi ka varikwavo.’ ”

³⁴Yehovha a engeta, a ku eka Muxe: “U ta teka mirhi ya risuna, sitakita, ni galibanumi, ni leswi nun'hwelaka ngopfu, u ta ringanisa hinkwaswo hi mpimo wu ri wun'we;

³⁵u swi endla mirhi ya risuna hi mukhuva wa mupfanganisi wa leswo nun'hwela, swi lungiwa, swi va leswi sasekeke, leswi hlawuriweke.

³⁶U ta swi sila, kutani u swi veka emahlweni ka vumbhoni, endlwini ya nhlengeletano laha ndzi nga ta hlengeletana na wena kona. Xi ta va eka n'wina xilo lexi hlawuriweke ngopfu.

³⁷Loko wu ri murhi lowu u nga ta wu endla, mi nga tshuki mi tiendlela leswi pfanganisiweke hi mukhuva lowo; swi ta va ka n'wina xilo lexi hlawuleriweke Yehovha.

³⁸Mani na mani la endlaka sweswo ku swi nun'hwetela, u ta humesiwa exikarhi ka varikwavo.”