Read tsonga Eksoda 39 Bible Online

Eksoda 39 - tsonga bible

Eksoda 39

¹Hi xivunguvungu ni scarlet, ni crimson, va endla tinguvu ta ntirho ku tirha ntirho endlwini leyo kwetsima, va endla ni tinguvu leto kwetsima leti nga ta Aroni, hilaha Yehovha a nga lerisa Muxe hakona.

²Va endla efodi hi nsuku, ni xivunguvungu ni scarlet ni crimson ni ntsembyana lowo saseka, leyi swuriweke.

³Va koka timpapa ta nsuku, va endla tingotinyana ha tona ku ti hlanganisa ni xivunguvungu, ni scarlet, ni crimson, ni ntsembyana, wu va ntirho lowu endliwaka hi vutlhari.

⁴Va endlela efodi tingubyana timbirhi leti veheriwaka emakatleni, yi hlanganisiwa hi tona emakun'wini ka yona.

⁵Vamba ra yona, leri bohiwaka henhla ka yona, a ri ri ra rixaka ra yona, a ri lukiwa swin'we na yona hi nsuku, ni xivunguvungu ni scarlet, ni crimson, ni ntsembyana lowo saseka, leyi swuriweke, hilaha Yehovha a nga lerisa Muxe hakona.

⁶Kutani va teka maribye ya onikisi, va ma nameka etifukweni ta nsuku, va tsala eka wona mavito ya vana va Israele, hi mukhuva wa lava tsalaka emaribyeni.

⁷Kutani va ya veka emakatleni ya efodi, leswaku ma va maribye ya xitsundzuxo eka vana va Israele, hilaha Yehovha a nga lerisa Muxe hakona.

⁸Va endla nguvu ya xifuva hi ntirho wa vutlhari, kukotisa ntirho wa efodi, hi nsuku, ni xivunguvungu ni scarlet ni crimson ni ntsembyana lowo saseka leyi swuriweke;

⁹a yi ri ni mune wa matlhelo, va yi endla yi petsiwile; ku leha ka yona a ku ri ku leha ka xandla xin'we, ni ku anama ka yona, xandla xin'we, loko yi petsiwile.

¹⁰Va yi nameka hi maribye ya mune wa tinxaxa, erixaxeni ro rhanga ku vekiwe rubi, ni topazi ni emeralda;

¹¹erixaxeni ra vumbirhi: karbunkele, ni safiri, ni dayimani;

¹²erixaxeni ra vunharhu: opali, ni agata, ni ametisita;

¹³erixaxeni ra vumune: krisolita, ni onikisi, ni yaspere. Maribye lawa a ma namekiwile ensukwini, etifukweni ta wona.

¹⁴Maribye lawa ya khume na mambirhi ma vekiwile hi ku tlhandlamana ka mavito ya vana va Israele; rin'wana ni rin'wana ri tsariwile vito ra rixaka rin'we ra vona hi mukhuva wa ku tsariwa ka mfungho.

¹⁵Engubyeni ya xifuva, va lunghelela tiketananyana leti lukiweke hi mukhuva wa ngoti, hi nsuku lowunene.

¹⁶Va endla na swona swovetana swimbirhi, ni swingwavila emakun'wini mambirhi ya nguvu ya xifuva.

¹⁷Kutani va khweketa tiketana letimbirhi eswingwavileni leswimbirhi emakun'wini ya nguvu ya xifuva.

¹⁸Va khweketa emakun'wini mambirhi ya tiketana swovetana swimbirhi, swi ve makatleni ya efodi, tlhelo ra le mahlweni.

¹⁹Va endla ni swingwavila swin'wana swimbirhi hi nsuku, va swi veka emakun'wini mambirhi ya nguvu ya xifuva, ekusuhi ni laha ku rhungiweke tlhelo ra efodi, endzeni.

²⁰Va endla kambe swingwavila swimbirhi swa nsuku, kutani va swi veka makatleni mambirhi ya efodi, ehansi, hitlhelo ra le handle ekusuhi ni laha yi hlanganisiweke ehenhla ka vamba ra efodi.

²¹Kutani va boha nguvu ya xifuva hi swingwavila swa yona eswingwavileni swa efodi, hi ngoti ya xivunguvungu, leswaku xi ve henhla ka vamba ra efodi, leswaku nguvu ya xifuva yi nga tshunxeki eka efodi, hilaha Yehovha a nga lerisa Muxe hakona.

²²Va endla ni nguvu ya efodi; yi lukiwa hinkwayo hi xivunguvungu ntsena.

²³Nguvu leyi, yi boxiwile exikarhi ka yona, laha ku nghenisiwaka nhloko kona, kukota nguvu ya vanhu va nyimpi; yi swonyiwile hi ku rhendzeleka hinkwako leswaku yi nga handzuki.

²⁴Kutani va rhungela ehansi ka nguvu magirenada ya xivunguvungu, ni scarlet, ni crimson, ni tiharhani ta ntsembyana.

²⁵Va endla swingelengele hi nsuku lowunene kutani va rhungelela swona exikarhi ka magirenada, ehansi ka nguvu, eku rhendzelekeni hinkwako:

²⁶xingelengele ni girenada, xingelengele ni girenada, emakumu ka nguvu, eku rhendzelekeni hinkwako, hilaha Yehovha a nga lerisa Muxe hakona.

²⁷Kutani va endlela Aroni ni vana va yena tinguvu leti lukiweke hi ntsembyana lowo saseka;

²⁸ni swihuku swa ntsembyana lowo saseka, ni swihuku swo bomba swa ntsembyana ni maburuku ya ntsembyana lowo saseka, leyi swuriweke,

²⁹ni vamba ra ntsembyana lowu swuriweke, ni xivunguvungu, ni scarlet, ni crimson, swi lukiwile hi mukhuva wa ntirho wa vutlhari, hilaha Yehovha a nga lerisa Muxe hakona.

³⁰Va endla hi nsuku lowonene xiphepherhele, lowu nga musingasoro wo kwetsima, kutani va tsala henhla ka xona, hi mukhuva wa ku tsala mafungo, mhaka leyi: Ku kwetsima ka Yehovha.

³¹Va vehela eka xona ngotinyana ya xivunguvungu ku xi tiyisa ehenhla ka xihuku, hilaha Yehovha a nga lerisa Muxe hakona.

³²Va hetisa sweswo ntirho hinkwawo wa Yindlu leyi nga Tabernakela ya nhlengeletano. Vana va Israele va endla hinkwaswo hilaha Yehovha a nga lerisa Muxe hakona, va endlisa sweswo.

³³Va tisa yindlu eka Muxe, ntsonga, ni mitirho ya wona hinkwayo, swovetana swa yona, ni mapulangi ya yona, ni timbalelo ta yona, ni timhandze ta yona, ni switshamo swa yona;

³⁴ni xifunengeto xa madzovo ya tinyimpfu lama petiweke eka leswo tshwuka, ni xifunengeto xa madzovo ya ntini, ni nguvu leyi hayekiwaka;

³⁵ni areka ya vumbhoni, ni timhandze; ta yona, ni vukhongelelo;

³⁶ni tafula, ni swibya swa rona hinkwaswo, ni vuswa bya xikombiso;

³⁷ni kandelari ya nsuku lowo tenga, ni mavoningo ya yona, ni timboningo leti lunghisiweke, ni swibya swa yona hinkwaswo, ni mafurha ya rivoni;

³⁸ni alitari ya nsuku, ni mafurha ya ku tota, ni mirhi ya risuna, ni nguvu ya nyangwa ya tabernakela;

³⁹ni alitari ya koporo, ni roster ya yona ya koporo, ni mimpingu ya yona, ni swibya hinkwaswo swa yona;

⁴⁰ni nkamba ni xitshamo xa wona, ni tinguvu ta xivava, ni timhandze ta tona, ni switshamo swa tona, ni nguvu ya nyangwa ya xivava, ni tingoti ta yona, ni timhingu ta yona ni swibya hinkwaswo swa ntirho wa yindlu, leyi nga tabernakela ya nhlengeletano.

⁴¹Va tisa ni tinguvu ta ntirho, ku tirha ha tona ntirho wa yindlu yo kwetsima, ni tinguvu leto kwetsima ta muprista Aroni ni tinguvu ta vana va yena ku tirha ntirho wa vuprista.

⁴²Vana va Israele va endla ntirho hinkwawo hilaha Yehovha a nga lerisela hinkwaswo eka Muxe.

⁴³Kutani Muxe a vona ntirho hinkwawo, kutani maswivo, a va wu endlile hilaha Yehovha a nga lerisa hakona, va wu hetisile sweswo. Kutani Muxe a va katekisa.