Read tsonga Eksoda 4 Bible Online

Eksoda 4 - tsonga bible

Eksoda 4

¹Kutani Muxe a hlamula a ku: “Kambe va nga ka va nga pfumeri, va nga ka va nga yingisi rito ra mina, hikuva va ta ku: ‘Yehovha a nga tikombisangi eka wena.’ ”

²Yehovha a ku eka yena: “Ncini lexi xi nga evokweni ra wena xana?” A ku: “I nhonga.”

³Kutani Yehovha a ku: “Yi hoxe hansi,” a yi hoxa ehansi, kutani yi hundzuka nyoka, kutani Muxe a yi balekela.

⁴Kavaloko Yehovha a ku eka Muxe: “Tshambuluta voko ra wena, u yi khoma hi ncila.” (Kutani Muxe a tshambuluta voko a yi khoma, kutani yi hundzuka nhonga evokweni ra yena.)

⁵“U ta endlisa sweswo va ko va pfumela leswaku Xikwembu xa vatata wa vona, Xikwembu xa Abrahama, Xikwembu xa Isaka, Xikwembu xa Yakobo, xi tikombisile eka wena.”

⁶Yehovha a engeta, a ku eka yena: “Nghenisa voko ra wena exifuveni xa wena, kutani a nghenisa voko ra yena exifuveni,” loko a ri humesa, a vona voko ra yena ri basile hi nhlokonho, kukota gamboko.

⁷Kutani Xikwembu xi ku: “Tlherisa voko ra wena exifuveni,” kutani a ri tlherisa exifuveni; loko a ri humesa a ri vona ri hundzukile, ri fana ni miri wa yena.

⁸“Kungakuloko va nga pfumeri ka wena, va nga yingisi timhaka ta xikombiso lexo rhanga, va ta pfumela timhaka ta xikombiso xa vumbirhi.

⁹Kutani loko va nga pfumeri swikombiso leswimbirhi, va nga yingisi ni rito ra wena, u ta ya u ka mati ya nambu, u ma halatela ehansi, mati lawa u ma keke enambyeni, ma ta hundzuka ngati emisaveni.”

¹⁰Kutani Muxe a ku eka Yehovha: “Yo! Wena Hosi, a ndzi munhu la tivaka ku vulavula swinene, hambi ku ri tolo, ni le tolweni, hambi ku ri loko u sungurile ku vulavula ni nandza wa wena; hikuva ndzi munhu wa nomu wo tika, ni ririmi ro nonon'hwa.”

¹¹Kutani Yehovha a ku eka yena: “I mani la endleke nomu wa munhu? Kumbe i mani la endlaka munhu mbheveve, kumbe lowo fa tindleve, kumbe la vonaka, kumbe lowo fa mahlo? Xana a hi mina Yehovha?

¹²Famba sweswi, ndzi ta va ni nomu wa wena, ndzi ku dyondzisa leswi u nga ta swi vulavula.”

¹³Muxe a ku: “Aa! Hosi, rhuma loyi u rhandzaka ku n'wi rhuma.”

¹⁴Kutani Yehovha a karihela Muxe, a ku: “A u na makwenu Aroni, wa Mulevhi xana? Ndzi tiva leswaku yena u vulavula swinene; ni sweswi hi loyi a taka ku hlangana na wena, kutani loko a ku vona u ta tsaka embilwini ya yena.

¹⁵U ta vulavula na yena, u veka marito enon'wini wa yena, kutani ndzi ta va ni milomu ya n'wina, ndzi mi dyondzisa leswi mi nga ta swi endla.

¹⁶U ta va muvulavuleri wa wena eka tiko, ni nomu wa wena, wena u va ematshan'weni ya Xikwembu eka yena.

¹⁷Kutani u ta tamela nhonga leyi evokweni ra wena, u endla xikombiso ha yona.”

¹⁸Muxe a famba a tlhelela eka Yetro, mukon'wana wa yena, a ku eka yena: “Ndzi pfumelele ndzi tlhelela eka rikwerhu, eEgipta, ku ya va kamba loko va ha hanya.” Yetro a ku eka Muxe: “Famba hi ku rhula.”

¹⁹Kutani Yehovha a ku eka Muxe, le tikweni ra Midiyani: “Famba u tlhelela eEgipta hikuva vanhu lava ngi va lave ku ku dlaya va file.”

²⁰Kavaloko Muxe a teka nsati wa yena, ni vana va yena, a va khandziyisa embhongolweni, a tlhelela etikweni ra Egipta. Kutani Muxe a teka nhonga ya Xikwembu evokweni ra yena.

²¹Kambe Yehovha a ku eka Muxe: “Eku tlheleleni ka wena eEgipta, vona masingita hinkwawo lawa ndzi vekeke wona emavokweni ya wena u ta ma endla emahlweni ka Faro; kambe mina ndzi ta nonon'hwisa mbilu ya yena leswaku a nga pfumeleli tiko ku famba.

²²Kutani u ta ku eka Faro: ‘Yehovha u te: Israele i n'wananga wa mativula,

²³ndzi ri eka wena: Tshika n'wananga, a ya ndzi tirhela; kambe loko u ala ku n'wi tshika a famba, ndzi ta dlaya n'wana wa wena wa mativula.’ ”

²⁴Kute endleleni loko va ri endlwini ya vaendzi, Yehovha a hlangana na Muxe, a lava ku n'wi dlaya.

²⁵Hilaha Sipora a tekaka ribye ro kariha, a yimbisa n'wana wa yena, a khumba hi nyama ya yena milenge ya Muxe, a ku: “Kunene, eka mina u nuna wa ngati.”

²⁶Kutani Yehovha a n'wi tshika; hikwalaho Sipora a ku: “Nuna wa ngati,” hikwalaho ka ku yimba.

²⁷Kutani Yehovha a ku eka Aroni: “Famba, u ya hlangana na Muxe emananga.” Aroni a suka a ya n'wi kuma entshaveni ya Xikwembu, a n'wi ntswontswa.

²⁸Kavaloko Muxe a rungulela Aroni marito hinkwawo ya Yehovha hilaha a n'wi rhumeke hakona, ni swikombiso hinkwaswo leswi a n'wi leriseke swona.

²⁹Kutani Muxe na Aroni va famba, va ya hlengeleta vakulukumba hinkwavo va vana va Israele.

³⁰Aroni a va byela marito hinkwawo lawa Yehovha a ma byeleke Muxe, a endla ni swikombiso emahlweni ka tiko.

³¹Kutani tiko ri pfumela; va twa leswaku Yehovha u endzele vana va Israele, ni leswaku u langutile ku xaniseka ka vona; kavaloko va khinsama, va korhame hansi.