Read tsonga Ntirho 11 Bible Online

Ntirho 11 - tsonga bible

Ntirho 11

¹Kutani Sofara wa Naama, a hlamula, a ku:

²“Marito layo tala lawa, ma ta pfumala ku hlamuriwa xana? Ni munhu wa rivulavulo u ta vuriwa la lulameke xana?

³Xana timhaka ta wena ta hava ti nga miyeta vavanuna? Xana u ta sola, ku nga ri na la ku khomisaka tingana xana?

⁴U ri: ‘Mikhuva ya mina yi lulamile, Ndzi basile emahlweni ka wena.’

⁵Loko ngi Xikwembu xi nga vulavula! Xi ahlamisa nomu wa xona, xi vulavula na wena,

⁶Ku ku boxela xihundla xa vutlhari bya xona lebyi enteke, Ku tlula ku twisisa ka wena, U ta swi vona leswaku Xikwembu xi rivele vukulu bya xidyoho xa wena.

⁷“Xana u fikele eku tlakukeni ka Xikwembu, U twisisile ku enta ka Lowa matimba hinkwawo xana?

⁸I ku tlakuka loku kotaka ka le tilweni, u ta endla yini? Ku entile ku tlula xivandla xa vafi, u ta tiva yini?

⁹Ku leha ka kona ku tlula misava, Ku anama ka kona ku tlula lwandle.

¹⁰Loko xi hundza, ni loko xi khoma, Loko xi vitana vanhu eku avanyisiweni xi ta siveriwa hi mani xana?

¹¹Hikuva xi tiva vumbabva bya vanhu, Xi vona swidyoho hambi xi nga swi chavuki.

¹²Kambe munhu la nga riki na ku twisisa, loko a kumile miehleketo, Ximbhongolwana xa nhova xi ta fanana na yena.

¹³“Kambe wena loko u yisa mbilu ya wena eka xona, Loko u tlakusa mavoko ya wena eka xona,

¹⁴Loko u tshineta ku biha ekule na wena, U nga tshiki ku homboloka ku tshama entsongeni wa wena.

¹⁵U ta tiva ku yimisa nhloko ya wena u nga ri na xivati. U ta tiya matimba, u nga chavi nchumu;

¹⁶U ta rivala ku vaviseka ka wena, U ta ku anakanya ku kota mati lama hundzeke.

¹⁷Vutomi bya wena byi ta tlhavela byi tlula dyambu ra nhlekanhi, Loko wu ri munyama, wu ta fana ni loko wu ri mixo.

¹⁸U ta tiya mbilu, hikuva ku tshemba ku ta va kona. U ta hiteka, kutani u ta etlela vurhongo lebyinene.

¹⁹Ku wisa ka wena a ku nga karhatiwi hi munhu, Lavo tala va ta tsakela mombo wa wena.

²⁰Kambe mahlo ya timbabva ma ta herisiwa; Va ta pfumala vuchavelo, Ku langutela ka vona ri ta va rifu ntsena.”