Read tsonga Ntirho 16 Bible Online

Ntirho 16 - tsonga bible

Ntirho 16

¹Kutani Yobo a hlamula, a ku:

²“Timhaka leto tano, ndzi xurhile tona; Hinkwenu mi vachaveleri lava ndzi karhataka.

³Marito ya swahava ma herile xana? Kumbe leswi ku hlamurisaka ngopfu, i yini-ke?

⁴Na mina a ndzi ta vulavula kukotisa n'wina, Loko ngi mi ri exitshan'weni xa mina, A ndzi ta luka timhaka ehenhla ka n'wina, Ndzi nonon'hwisa nhloko eka n'wina,

⁵A ndzi ta va muhlamuri hi nomu wa mina, A ndzi ta mi tiyisa hi ku ndzakambula ka milomu ya mina.

⁶“Hambi ndzi vulavula, ku vaviseka ka mina a ku nga miyeli; Hambi ndzi nga tshika, ndzi nga vona ku pfuniwa kwihi?

⁷Oho! Sweswi, u ndzi hete matimba, U hangalasile yindlu ya mina hinkwayo;

⁸U ndzi khomile ku ndzi endla vumbhoni; Ku ondza ka mina ku yimile ku ndzi kaneta emahlweni.

⁹Vukari bya yena byi ndzi handzula, byi ndzi landzelela; U ndzi getselela meno. Loyi a nga nala eka mina, u ndzi tlhava hi mahlo layo kariha.

¹⁰Va ahlamisile milomu ya vona ngopfu ehenhla ka mina ku ndzi hlota, Va ndzi rhukana, va ndzi phakata marhama, Va hlangene ku lwa na mina.

¹¹Xikwembu xi ndzi nyiketile emavokweni ya timbabva, Xi ndzi hoxile emandleni ya lavo biha.

¹²A ndzi hanya swinene, kambe xi ndzi hlakahlile, Xi ndzi khoma hi nhamu, xi ndzi pulukanya hi le xikarhi, Xi ndzi veka evuvekweni bya ku hoxa ka xona.

¹³Miseve ya xona yi ndzi tele hi le henhla, yi huma ematlhelo hinkwawo; Xi ndzi tlhavile xi nga ri na tintswalo; Xi chululela nyongwa ya mina ehansi,

¹⁴Xi ndzi boxela mbanga ehenhla ka mbanga, Xi ndzi wele ehenhla kukotisa nhenha.

¹⁵Ndzi funengetile nhlonge ya mina hi nguvu leyo khwaxa, Ndzi nyamise mombo wa mina hi ntshuri;

¹⁶Mombo wa mina wu pfimbisiwa hi swirilo! Ndzhuti wa rifu wu funengeta tinxiyi ta mina.

¹⁷Hambiswiritano, a ku na ku homboloka emavokweni ya mina, Xikhongelo xa mina xi basile.

¹⁸“Wena misava, u nga tshuki u fihla ngati ya mina, Mikololo ya mina a yi twakale hinkwako.

¹⁹Ni sweswi, vona, mbhoni ya mina yi le matilweni, Mulandzuleri wa mina u le tlhelweni ra le henhlahenhla.

²⁰Hambi vanakulorhi va hundzukile va ndzi hleka, Mahlo ya mina ma halatile mihloti eka Xikwembu.

²¹Ngi ku ri ni muyimeri wa munhu emahlweni ka Xikwembu, Ni wa n'wana wa munhu emahlweni ka nakulobye.

²²Hikuva malembe lama hlayiweke ma hundza, Ndzi tifambela hi ndlela leyi ndzi nga tiki tlhelaka ha yona.