Read tsonga Ntirho 2 Bible Online

Ntirho 2 - tsonga bible

Ntirho 2

¹Kambe hi siku rin'wana loko vana va Xikwembu va ya humelela emahlweni ka Yehovha, Satana na yena, a humelela na vona emahlweni ka Yehovha.

²Kutani Yehovha a ku eka Satana: “U huma kwihi?” Satana a hlamula, a ku eka Yehovha: “Ndzi huma emisaveni, a ndzi valanga kona.”

³Yehovha a ku eka Satana: “Xana u tsundzukile Yobo nandza wa mina-ke? Hikuva a ku na la fanaka na yena emisaveni, la fambaka hi ku lulama ni ku tenga, la chavaka Xikwembu, la fularhelaka swo biha. Wa ha tiyisile eku lulameni ka yena, hambi u ndzi phikelerile ku n'wi lovisa ntsena.”

⁴Satana a hlamula a ku eka Yehovha: “Dzovo ri ringana ni dzovo! Hinkwaswo leswi munhu a nga na swona, a nga swi humesela vutomi bya yena.

⁵Wa nga tlakusa voko ra wena, u khumba marhambu ya yena ni nyama ya yena u vona loko a nga ku rhukani erivaleni xana?”

⁶Yehovha a ku eka Satana: “U le mavokweni ya wena, ntsena u tsetselela vutomi bya yena.”

⁷Kutani Satana a suka emahlweni ka Yehovha.

⁸Kutani a ba Yobo hi marhumba layo vavisa, ku suka emikondzweni ku fika enhlokweni. Yobo a lava xirhengele ku tinwaya ha xona, a tshamile enkumeni.

⁹Kutani nsati wa yena a ku eka yena: “Xana wa ha tiyisile eku lulameni ka wena-ke? Rhukana Xikwembu, u fa!”

¹⁰Yobo a ku eka yena: “U vulavula kukotisa xihunguki loko xi vulavula. Xana hi ta amukela leswo saseka emavokweni ya Xikwembu, hi nga amukeri swo biha-ke?” Etimhakeni toleto hinkwato Yobo a nga dyohanga hi nomu wa yena.

¹¹Vanakulobye va Yobo ha vanharhu, va twa khombo leri n'wi weleke, kutani un'wana ni un'wana a suka eka rikwavo, Elifasi wa ka Temani, Bilidada wa ka Xuwaka, na Sofara wa ka Naama, va hlangana marito, va ta swin'we ku ta tsetsa Yobo ni ku n'wi chavelela.

¹²Kuteloko va tlakuse mahlo va ha ri kule, a va n'wi tivanga; kutani va tlakusa marito, va rila, va handzula tinguvu ta vona va tikhuva hi ntshuri etinhlokweni ta vona, va wu tsutsuxa ehenhla.

¹³Kutani va tshama na yena ehansi, hi masiku ya ntlhanu na mambirhi, ni vusiku bya ntlhanu na byimbirhi, va nga vulavuli na yena, hi ku vona leswaku ku vaviseka ka yena ku kurile ngopfu.