Read tsonga Ntirho 20 Bible Online

Ntirho 20 - tsonga bible

Ntirho 20

¹Kutani Sofara wa Naama a hlamula, a ku:

²“Meehleketo ya mina yi ndzi hlohlotela ku hlamula, Na kona ndzi hluleka ku tikhoma eku anakanyeni ka mina.

³Ndzi twile ku tshinya loku ndzi teriseke tingana; Kambe moya wa mina wu ndzi hlamurisa hi ku twisisa ku mina.

⁴Xana a ku tivi leswaku khalekhale, Ka ha ri mpfhuka munhu a vekiwa emisaveni,

⁵Xichavo xa timbabva xi hatle ku hela, Ni ku tsaka ka lowo biha i ka nkarhinyana ntsena?

⁶Hambi a nga kula, a ya fika etilweni, Ni loko nhloko ya yena yi fika emapapeni,

⁷U ta hela kukota vulongo bya yena hilaha ku nga heriki. Lava n'wi voneke va ta ku: ‘U kwihi?’

⁸U ta hela kukota norho, a nga ka a nga kumiwi, U ta tlhaka kukota mahlori ya vusiku.

⁹Mahlo lama tshamaka ma n'wi vona, a ma nga ha tlheli ma n'wi vona, Ni vutshamo bya yena a byi nga ha tlheli byi n'wi tiva.

¹⁰Vana va yena va ta lava ku tsetseleriwa hi swisiwana, Mavoko ya yena ma ta vuyisela rifuwo leri a ri tekeke.

¹¹Marhambu ya yena a ma tele matimba ya vuntshwa, Kasi sweswi, ma ta etlela na yena entshurini.

¹²“Vumbabva a byi nandziha enon'wini wa yena, A byi fihliwile ehansi ka ririmi ra yena;

¹³U byi hlayisile, a ri na byona, U byi hlayisile emalakeni ya yena.

¹⁴Swakudya swa yena swi ta hundzuka emarhumbyini ya yena, Byi va vuhlungu bya mhiri endzeni ka yena.

¹⁵U mitile ku nona, u fanele ku tlhela a hlanta, Xikwembu xi ta swi humesa ekhwirini ra yena.

¹⁶U an'wile vuhlungu bya mamba, Ririmi ra mhiri ri ta n'wi dlaya.

¹⁷Mahlo ya yena a ma nga ha tsakeli swinambyana, Hambi yi ri milambu, hambi yi ri milambyana ya vulombe ni ntswamba.

¹⁸U ta tlherisa bindzu ra yena, a nga ka a nga ha fuwi nchumu, U ta tlherisa leswi a swi tekeke, a nga ha swi tsakeli.

¹⁹Hikuva u karhatile swisiwana, u va cukumetile, Kambe u onhile tindlu, a nga ti pfuxi.

²⁰“Hikuva a nga tivanga ku kolwa embilwini ya yena, U ta hluleka ku tiponisa hi leswi a swi rhandzisisaka.

²¹A ku na nchumu wa leswi chupukeke eka yena, Hikwalaho ku tsaka ka yena ku nga ka ku nga tiyi.

²²U ta pfumala, hambi rifuwo ra yena ri n'wi andzele ngopfu, Mavoko ya lava xanisiweke ma ta n'wi wela ehenhla.

²³Hi nkarhi lowu a xurhisaka khwiri ra yena, Xikwembu xi ta n'wi ba hi ku hisa ka ku kariha ka xona, Xi ta n'wi nisela emarhumbyini ya yena ematshan'weni ya vuswa.

²⁴Hambi a nga balekela matlhari ya nhumbu, Vurha bya koporo byi ta n'wi tlhava,

²⁵U ta hlomula nseve emirini wa yena, Nhumbu leyo hatima yi huma exivindzini xa yena; U khomiwile hi ku chavisa ka rifu.

²⁶Makhombo hinkwawo ma vekeriwile evuhlayiselweni bya yena, Ndzilo lowu nga pfurhetiwiki hi munhu wu ta n'wi hisa, Wu ta hisa ni leswi nga ta sala entsongeni wa yena.

²⁷Tilo ri ta nyanyula ku homboloka ka yena, Misava yi ta pfuka yi n'wi kaneta.

²⁸Rifuwo ra yindlu ya yena ri ta lova, Ri hela hi dyambu ra vukari bya Xikwembu.

²⁹Hi kona ku averiwa ka mbabva loku humaka eka Xikwembu, Ni ndzhaka leyi yi vekeriweke yona hi Xikwembu.”