Read tsonga Ntirho 22 Bible Online

Ntirho 22 - tsonga bible

Ntirho 22

¹Elifasi wa Temani, a tlhela a hlamula, a ku:

²“Xana munhu a nga pfuna Xikwembu hi xilo xin'wana xana? E-e, ni ku ringa; munhu wa vutlhari u tipfuna yena n'wini ntsena?

³Lowa matimba hinkwawo a nga vona vunene bya wena hi ku tsaka-ke? Kumbe xana a nga kuma bindzu hi mikhuva ya wena ya ku lulama-ke?

⁴Xana a ku laya hikuva wa ku chava, Kumbe a yisana na wena ehubyeni xana?

⁵A ndzi ku: Ku biha ka wena ka chavisa, Ni ku dyoha ka wena a ku pfumali ntsengo xana?

⁶Hikuva u tekile ntsena xikhensanandzu eka varikwenu, U hluvule vapfumari, u teke tinguvu ta vona;

⁷A ku nyikanga munhu wa torha mati, U alele la nga ni ndlala vuswa bya wena.

⁸Munhu wa matimba a a fuma tiko, Ni nkulukumba a tiendla muaki wa rona.

⁹A u tlherisa vasati va tinoni, va pfumala, Mavoko ya xisiwana ma tshoviwa.

¹⁰Hikwalaho u rhendzeriwile hi mitlhamu, U khomiwa hi nchavo kan'wekan'we.

¹¹Kumbe a ku voni munyama, Ni ndhambi ya mati layo tala lama ku funengeteke?

¹²“Xana Xikwembu a xi tlakukangi kukota tilo xana? Languta ku tlakuka ka tinyeleti ti tlakukile swonghasi!

¹³U ri: ‘Xikwembu xi nga tiva yini? Xana xi nga avanyisa xi boxa munyama xana?

¹⁴Mapapa ma xi sivekile leswaku xi tsandzeka ku vona, Xi fambafamba emaninginingini ya le tilweni.’

¹⁵Xana u rhandza ku teka ndlela ya khale, Laha ku kandziyeke vanhu va hava xana?

¹⁶Kasi va susiwile wu nga si va nkarhi, Vuako bya vona byi fana ni nambu lowu khulukaka.

¹⁷A va ku eka Xikwembu: ‘Tshinela kule! Xana Lowa matimba hinkwawo a nga hi endlela yini xana?’

¹⁸Hambiswiritano, u tatile tindlu ta vona hi xuma, Makungu ya timbabva a ma ve ekule na mina!

¹⁹Lavo lulama va vona sweswo, va tsaka, La pfumalaka nandzu u hleka vona, a ku:

²⁰‘Valala va hina va herisiwile, Ndzilo wu hisile rifuwo ra vona!’

²¹“Hikwalaho u endla ntwanano na Xikwembu, u ta vona ku tsaka; Hi mukhuva wulowo rihleko ri ta ta eka wena;

²²Wa nga amukela dyondzo leyi humaka enon'wini wa xona, U nghenisa marito ya xona embilwini ya wena.

²³Loko u tlhelela eka Lowa matimba u ta tlhela u pfuxiwa, Ntsena u hlongola ku homboloka entsongeni wa wena;

²⁴U cukumeta nsuku entshurini, Ni nsuku wa Ofiri emaribyeni ya milambyana;

²⁵Hi kona Lowa matimba hinkwawo a nga ta va nsuku wa wena, Ni silivhere ya wena ya nkoka.

²⁶Hikuva hi kona u nga ta kuma ku tsaka eka Lowa matimba hinkwawo. U ta yimisa mombo wa wena eka Xikwembu.

²⁷U ta xi khongela, xi ta ku yingisa, U ta heta ku hlambanya ka wena.

²⁸Loko u kanela mhaka yin'wana yi ta humelela eka wena, Ku vonakala ku ta vangama etindleleni ta wena.

²⁹Hambi u famba eku titsongahateni, u ta tikombelela matimba ya ku tipfuxa, Xikwembu xi ta pfuxa munhu la titsongahataka,

³⁰Swi tsandza ni la nga pfumariki nandzu, U ta n'wi lamulela hi ku basa ka mavoko ya wena.”