Read tsonga Ntirho 24 Bible Online

Ntirho 24 - tsonga bible

Ntirho 24

¹“Mikarhi leyi vekiweke a yi hlayisiwi hi Lowa matimba hinkwawo xana? Lava n'wi chavaka a va tivi ha yini masiku ya yena xana?

²Ku risiwa mitlhambi leyi yiviweke; Ku tshinetiwa maribye ya mindzilekana,

³Va byisa mbhongolo ya xisiwana, Homu ya nsati wa noni yi vekiwa ku languteriwa.

⁴Vapfumari va tshinetiwa endleleni, Swisiwana hinkwaswo swa tiko swi fanela ku tumbela.

⁵Vona, kukotisa timbhongolo ta nhova, Va humele swakudya swa vona wa ha ri mpundzu; Emananga ntsena va ta kumela vana va vona swakudya.

⁶Va tsemela byanyi lebyi seleke emasin'wini, Va nkun'hula dzumba evhinyeni ya lowo homboloka.

⁷Va tshama nivusiku va nga ri na tinguvu, Hi xirhami, va pfumala xifunengelo.

⁸Va neriwa hi timpfula ta tintshava, Va namarhela maribye hi ku pfumala vuako.

⁹Ku tekiwa swisiwana emaveleni ya vamana wa swona, Vapfumari va tekeriwa swa vona, swi vekiwa ku languteriwa.

¹⁰Va famba va swerile va nga ri na tinguvu; Va rhwexiwa tinyandza leto tala va ri ni ndlala.

¹¹Va kandletela mafurha eswivaveni swa lavo homboloka, Va khuvuta exikhuvutweni xa vona, va ri ni torha.

¹²Mikosi ya lava faka yi twakala emitini; Mimoya ya lava tlhaviweke ya huwelela, Hambiswiritano, Xikwembu a xi chawuki manyala ya vanhu!

¹³“Van'wanyana va venga ku vonakala, A va tivi tindlela ta kona, A va yi hi mitila ya kona.

¹⁴Mudlayi u pfuka nimixo, A dlaya xisiwana ni mupfumari, Nivusiku wa huma ku ya yiva.

¹⁵Mahlo ya muoswi ma langutela mpimavayeni, U ri: ‘A ku na tihlo leri ndzi vonaka,’ Kambe u tifunengeta mombo hi xisirhelo.

¹⁶Nivusiku va boxa tindlu. Ninhlekanhi va tipfalela; A va vuli nchumu hi ku vonakala.

¹⁷Hikuva kuteloko byi xile, eka vona i ndzhuti wa rifu; Va tiva ku chavisa ka ndzhuti wa rifu.

¹⁸“Lavo biha va hatla ku khaluta kukota swilo leswi rhetemukaka ehenhla ka mati; Ndzhaka ya vona yi rhukaniwile laha emisaveni, A va ha languti tlhelo ra tivhinya!

¹⁹Kukota loko mati ya gamboko ma lahleka, ma munyeka hi ku oma ka dyandza, Vaendlaswivi va munyisiwa sweswo hi xivandla xa vafi!

²⁰Va rivala hi nyimba leyi va velekeke, Va dyiwa hi swivungu, a va anakanyiwi! Mbabva yi susiwa kukota murhi lowu omeke.

²¹“A ri loyi a dyaka swa mhika leyi nga velekiki, Loyi a nga endlangiki nsati wa noni swinene ni kan'we! ...

²²Xikwembu xi lehisa masiku ya vamatimba hi matimba ya xona, Va pfuka, hambi va nga tshembi leswaku va ta hanya;

²³Va hiwa ku tsaka, va ta tiya, Kutani mahlo ya xona ma languta tindlela ta vona.

²⁴Va kurisiwile; kambe hi mikarhi yi nga ri yingani, a va ha ri kona: Va wa, va tekiwa kukota vanhu hinkwavo, Va tshoveriwa kukota swidzumba.

²⁵Loko swi nga ri tano, i mani la nga ndzi landzulaka, Ku vulavula ka mina ku ta endliwa swahava hi mani-ke?”