Read tsonga Ntirho 29 Bible Online

Ntirho 29 - tsonga bible

Ntirho 29

¹Yobo a engeta a vula marito ya vutlhari bya yena, a ku:

²“Loko ndzi nga vona kambe tin'hweti ta khale, Ni masiku lawa Xikwembu xi nga ndzi hlayisa exikarhi ka wona,

³Enkarhini wolowo rivoningo ra xona ri voningeke nhloko ya mina, Eku vonakaleni ka xona, a ndzi tiva ku famba exikarhi ka munyama.

⁴Ingi loko ndzi ri kukotisa emasikwini ya ku tiya ka mina, Loko Xikwembu xa ha tshamile entsongeni wa mina kukota nakulorhi.

⁵Loko Lowa matimba a a ri na mina, Ni loko vana va mina va ndzi rhendzele;

⁶Loko mikondzo ya mina yi hlantsweka entswambeni, Ni loko ribye ri ndzi humesela swinambyana swa mafurha!

⁷Loko ndzi ri karhi ndzi huma ku ya ehubyeni ya muti, A ndzi veka xitshamo xa mina erivaleni,

⁸Lavantshwa, loko va ndzi vona, va ndzi kendlukela, Lava kuleke a va suka va yima.

⁹Tihosana a ti tshika ku vulavula, Ti khoma milomu ya tona hi mavoko.

¹⁰Rito ra valerisi a ri miyela, Kutani ririmi ra vona ri namarhela emalakeni ya vona.

¹¹Ndleve leyi ngi yi ndzi twa a yi ku ndzi katekile, Na rona tihlo leri ngi ri ndzi vona ri ndzi dzunisa.

¹²Hikuva a ndzi lwela lava xanisekaka loko va kombela ku pfuniwa, Ni xisiwana lexi pfumalaka mupfuni;

¹³A ndzi katekisiwa hi loyi a lavaka ku fa, Ndzi nghenisa ku tsaka embilwini ya wansati wa noni.

¹⁴A ndzi funengela ku lulama, kutani ku lulama ku tifunengeta ha mina; Ku tenga ka mina a yi ri nguvu ya mina ni xihuku xa nuna.

¹⁵A ndzi ri mahlo ya lavo fa mahlo, Ni milenge ya lava khwitaka.

¹⁶A ndzi ri tata wa swisiwana, Kambe a ndzi vutisisa mhaka ya la nga tiviwiki;

¹⁷A ndzi faya meno ya mbabva, A ndzi tlatlambuta emenweni ya yena lexi a xi vutleke.

¹⁸A ndzi ku: ‘Ndzi ta fa exisakeni xa mina, Ndzi ta andzisa masiku ya mina kukotisa sava;

¹⁹Rimitsu ra mina ri ta nava ematini, Kutani mberha yi ta wa nivusiku emarhavini ya mina.

²⁰Ku vonakala ka mina ku ta hluka hi masiku, Vurha bya mina byi ta tiyisiwa evokweni ra mina.’

²¹“A va rhiya tindleve va langutisisa, Kuteloko ndzi vulavurile va miyela.

²²A ku nga ri na loyi a hlamulaka loko ndzi vulavurile, Timhaka ta mina a yi ri mberha ehenhla ka vona.

²³Va ndzi langutela kukotisa mpfula, Va ahlamisa milomu ya vona kukotisa loko va amukela mpfula ya munakan'we.

²⁴A ndzi va hleka loko va kanakana, A va tivanga ku susa ku tsaka enghoheni ya mina,

²⁵Loko ndzi hlawula ku ya eka vona, a ndzi tshama emahlweni ka vona, Ndzi kotisa hosi exikarhi ka vunyingi, Ni la chavelelaka lava rilaka.”