Read tsonga Ntirho 30 Bible Online

Ntirho 30 - tsonga bible

Ntirho 30

¹“Kambe sweswi, ndzi xihlekiso eka lava nga vatsongo eka mina, Lava ndzi nga sola ku veka vatata wa vona Exikarhi ka timbyana ta mitlhambi ya mina.

²Xana a ndzi ta endla yini hi matimba ya mavoko ya vona xana? Matimba ma herile eka vona.

³Va omile hi ku pfumala, ni ndlala, Va pepetseka emananga, laha ku tshweke khale ni ku onhaka.

⁴Va tsuvula leswo mila leswi bavaka eswihlahleni, Timitsu ta swimidyana i swakudya swa vona.

⁵Va hlongoriwa exikarhi ka vanhu, Va huweleriwa kukotisa vayivi.

⁶Va tiakele exiweni lexi chavisaka, Ni le malakeni ya misava, ni le maribyeni.

⁷Va kolola exikarhi ka swihlahla, Va etlela swin'we ehansi ka swigatlu.

⁸I vana va swihunguki ni va vanhu lava nga riki na vito. Va hlongoriwa emisaveni ya vanhu.

⁹“Sweswi ndzi hundzukile risimu ra vona. Ni ku vulavula ka vona.

¹⁰Ndzi manyala eka vona, va ndzi sukela, A va chavi ku ndzi tshwutela marhi emahlweni.

¹¹A va ha tikhomi, va ndzi tsongahata, Va tshikile ku tikhoma hinkwako emahlweni ka mina.

¹²Rixaka leri ra ku biha, ri yima evokweni ra mina ra xinene, Va susumeta milenge ya mina ehansi ka mina, Va tiboxela tindlela ku ta ndzi onha.

¹³Va onha ndlela ya mina, va engetela ku onhakeriwa ka mina, Kasi vona va nga ka va nga pfuniwi hi munhu.

¹⁴Va ndzi tela kukotisa loko ngi va nghena hi xipfhanyo lexi anameke, Va tihoxa exikarhi ka marhumbi.

¹⁵Ku chavisa hinkwako ku ndzi kumile, Ku hlongola xidzumo xa mina kukotisa mheho, Ku kateka ka mina ku hundzile kukota papa.

¹⁶“Sweswi, moya wanga wu halakela endzeni ka mina, Masiku ya khombo ma ndzi kumile.

¹⁷Vusiku bya ndzi tlhava, byi tsuvula marhambu ya mina, Vuvabyi bya ndzi phorha, a byi miyeri;

¹⁸Byi hundzurile nguvu ya mina hi matimba ya byona, Byi ndzi kamanyeta kukotisa banci.

¹⁹Xikwembu xi ndzi wisile endzhopeni, Kutani ndzi fana ni ntshuri, ni nkuma.

²⁰Ndzi huwelela eka wena, kambe a ku ndzi hlamuri; Ndzi yimile kwala, kutani a ndzi honolela hi mahlo.

²¹Eka mina u hundzukile nala la levaka, Wa ndzi hlongorisa hi voko ra wena ra matimba.

²²U ndzi tlakula hi mheho, u ndzi fambisa ekule, U ndzi herisa hi mpfumawulo wa xihuhuri.

²³Hikuva ndza swi tiva leswaku u ndzi yisa eku feni, Endlwini yoleyo hinkwavo lava hanyaka va faneleke ku hlengeletana eka yona.

²⁴“Ntsena lava lovaka a va tshambuluti mavoko xana? Lava nga ekhombyeni a va kombeli ku pfuniwa-ke?

²⁵Xana a ndzi rilangi ehenhla ka loyi a tshameke enhlomulweni? Mbilu ya nga a yi tsetselelanga xisiwana-ke?

²⁶A ndzi langutela ku kateka, kutani ndzi tele hi khombo; A ndzi langutela ku vonakala, kambe munyama wu fikele.

²⁷Marhumbu ya mina ma vila, ma nga miyeli; Ndzi kumeriwe hi masiku ya swirilo.

²⁸Ndzi famba ndzi tshwile, kambe ku nga ri hi dyambu; Ndzi yima enhlengeletanweni, ndzi huwelela.

²⁹Ndzi hundzukile makwavo wa goya, Ni nakulobye wa yimbhu.

³⁰Nhlonge ya mina yi dyuhele, yi phumunheka, Marhambu ya mina ma hisa, ma omile.

³¹Haripa ya mina yi hundzukile xirilo, Ni nanga ya mina, rito ra lava rilaka.”