Read tsonga Ntirho 33 Bible Online

Ntirho 33 - tsonga bible

Ntirho 33

¹“Kambe sweswi, wee Yobo, wa nga yingisa marito ya mina, U rhiya tindleve eka marito ya mina hinkwawo.

²Vona, ndzi ahlamisile nomu wa mina, Ririmi ra mina ri ndzakambula emalakeni ya mina.

³Ndzi ta vulavula hi ku lulama ka mbilu yanga, Milomu ya mina yi ta vula miehleketo ya mina hi ntiyiso.

⁴I moya wa Xikwembu lowu ndzi endleke, Ku huhutela ka Lowa matimba hinkwawo ka ndzi hanyisa.

⁵Ndzi hlamule, loko u swi kota, Lunghisa marito emahlweni ka mina, u yima la.

⁶Waswivo, ndzi fana na wena emahlweni ka Xikwembu, Na mina ndzi vumbiwe hi vumba;

⁷Ku chava ka mina ku nga ka ku nga ku tshukisi, Ni ku tika ka mina ku nga ka ku nga ku tikeri.

⁸“Kunene u vurile etindleveni ta mina, Ndzi twile mpfumawulo wa marito ya wena, u te:

⁹‘Ndzi basile, a ndzi dyohanga, A ndzi na nandzu, a ndzi hombolokanga.

¹⁰Kambe, Xikwembu xi kumile nandzu eka mina, Xi ndzi languta kukotisa nala wa xona.

¹¹Xi bohile milenge ya mina hi khotso, Xi langutisa tindlela ta mina hinkwato.’

¹²“Vona, ndza ku byela, u hoxile kwalaho, Hikuva Xikwembu xi tlula vanhu hi vukulu.

¹³U xi tengisela yini? Hikuva a xi hlamuli etimhakeni ta xona hinkwato.

¹⁴Hambiswiritano, Xikwembu xi vulavula kan'we, Na kambirhi, kambe a xi tsundzuki hi munhu.

¹⁵Xi vulavula hi milorho ni ku vona ka vusiku, Loko vanhu va khomiwile hi vurhongo lebyo tika, Loko va khutsehela emasangwini ya vona.

¹⁶Hi laha xi hlavutelaka vanhu, Xi tiyisa dyondzo leyi xi va dyondzisaka ha yona.

¹⁷Xi ta tlherisa munhu eku endleni ka yena, Xi papalatisa ku tikurisa eka yena;

¹⁸Xi n'wi sivela leswaku a nga xikeli esirheni, Ni ku dlawa hi fumu lero kariha.

¹⁹“Ku vaviseka, na kona, ka n'wi laya loko a ri emasangwini; A twa marhambu ma pandza, ma nga miyeri.

²⁰Loko malaka ma phiriwa hi vuswa, A nga naveri swakudya leswi xawulaka.

²¹Vumbhurhi bya miri wa yena byi hela, Ku vonaka marhambu lama nga voniwangiki.

²²Moya wa yena wu ri kusuhi ni sirha, Vutomi bya yena byi tshinelela lava lovisaka.

²³Loko ntsumi yi ri kona leyi n'wi khongelelaka, Yi ri yin'we exikarhi ka khume ra madzana, Yi kombisa munhu ndlela leyi lulameke,

²⁴Xikwembu xi n'wi tsetselela, xi ku eka yona: ‘N'wi lamulele, a nga ti tshuka a xikela esirheni; Ndzi kumile lexi nga n'wi kutsulaka.

²⁵Kutani miri wa yena wu hlukela ku tlula evuhlangini. A tlhelela emasikwini ya vuntshwa bya yena.’

²⁶Loko a khongela Xikwembu, xi n'wi endla hi tintswalo, Xi n'wi kombisa mombo wa xona hi ku tsaka, Xi n'wi tlherisela ku lulama ka yena.

²⁷A yimbelela emahlweni ka vanhu a ku: ‘Ndzi dyohile, ndzi homboloxe ku lulama. Kambe a ndzi beriwanga ku dyoha ka mina.

²⁸Xikwembu xi kutsurile moya wa mina leswaku ndzi nga xikeli esirheni, Kutani vutomi bya mina byi tsakela ku vonakala.’

²⁹“Vona, Xikwembu xi endle sweswo hinkwaswo, Kambirhi, ni kanharhu eka munhu,

³⁰Ku tlherisa moya wa yena, wu nga ngheni esirheni, Leswaku a voningiwa hi ku vonakala ka vutomi.

³¹Yingisela, Yobo, u ndzi twa! U miyela, kutani mina ndzi ta vulavula!

³²Loko u ni ku vulavula, ndzi hlamule! Vulavula, hikuva ndzi rhandza ku ku lukela;

³³Loko swi nga ri tano, wena, ndzi yingise! Miyela, ndzi ta ku dyondzisa vutlhari.”