Read tsonga Ntirho 9 Bible Online

Ntirho 9 - tsonga bible

Ntirho 9

¹Kutani Yobo a hlamula, a ku:

²“Ndzi tiva swinene leswaku swi tano! Munhu la faka a nga lulama hi ku yini emahlweni ka Xikwembu xana?

³Ni loko a rhandza ku tenga na xona, A nga ka a nga hlamuli mhaka na yin'we, ni ka leta madzanadzana.

⁴Vutlhari ni matimba hinkwawo swi na xona: I mani la nga kanetanaka na xona, a vuya a hanya?

⁵U tshineta tintshava, ti nga swi tivi Leswaku u ti phyandlasa hi vukari bya xona.

⁶U tsekatsekisa misava emasungulweni ya yona, Timhandze ta yona ta dzedzemela.

⁷U lerisa dyambu leswaku ri nga humi, U sirhela tinyeleti hi fungu.

⁸Hi yena ntsena la anekaka matilo, A famba emitsungeni ya lwandle.

⁹U endlile Gongomela na Mahlahle na Xirimela, Ni leswi enteke swa le dzongeni.

¹⁰U endlile swilo leswikulu leswi nga tiviwiki, Swilo leswi hlamarisaka leswi nga hlayiwiki.

¹¹Vona, u hundza eka mina, a ndzi n'wi voni, Wa hundza emahlweni ka mina, a ndzi n'wi tsundzuki.

¹²Vona, wa susa; a nga siveriwa hi mani? I mani la nga ta ku eka yena: ‘U endla yini?’

¹³“Xikwembu a xi tlherisi vukari bya xona, Lava tikurisaka va tikerisiwa ehansi ka xona.

¹⁴Mina ndzi mani leswaku ndzi xi hlamula xana? Ndzi nga hlawurisa ku yini timhaka ta ku xi hlamula?

¹⁵Hambi ndzi lulamile, ndzi nga ka ndzi nga hlamuli nchumu; Ndzi ta tikombelela tintswalo eka muavanyisi wa mina.

¹⁶Hambi a hlamula, loko ndzi n'wi vita, Ndzi nga tsandzeka ku pfumela leswaku u yingisile rito ra mina,

¹⁷Xona lexi ndzi khandlaka hi xidzedze, Xi engetela timbanga ta mina ntsena,

¹⁸A xi ndzi nyiki nkarhi wa ku hefemula, Hikuva xi ndzi xurhisa hi leswo bava.

¹⁹Loko ndzi tivitela matimba! U ri, hi mina wa matimba, Kumbe ku lulama! U ri, i mani la nga ta ndzi vitana ehubyeni?

²⁰Hambi ndzi lulamile, nomu wa mina wu fanele ku ndzi vula lowo biha; Loko ndzi nga ri na nandzu, u ta ndzi vula ndzi ri mbabva.

²¹Hambi ndzi lulamile, a ndzi tivi mbilu ya mina, Ndzi phiriwa hi vutomi bya mina.

²²Ku ni mhaka yin'we ntsena leyi ndzi yi tiyisaka, Ndzi ri: Xi onha la nga tiki na nandzu ni lowa nandzu.

²³Loko ngi fumu ri nga dlaya kan'we! ... Kambe xi hleka hi miringo ya loyi a nga riki na nandzu.

²⁴Misava yi nyikiwile emavokweni ya lavo biha; Xi sirhela mahlo ya vaavanyisi va yona; Loko xi nga ri xona la endleke sweswo, a nga va mani xana?

²⁵“Masiku ya mina ma hatlisa ma hundza, ma tlula vatsutsumi; Ma balekile, ma nga si vona ku kateka.

²⁶Ma hundza kukota mabyatso ya rihlanga, Kukota gama leri vutlaka xiharhi xa rona.

²⁷Loko ndzi ku: ‘Ndzi ta rivala ku dzumadzuma ka mina, Ndzi tshika ku khwanyanisa mombo,’

²⁸Ndzi chavisiwa hi ku vaviseka ka mina hinkwako, Ndzi karhi ndzi tiva leswaku u nga ka u nga ndzi vuli la pfumalaka nandzu.

²⁹Loko ndzi ri ni nandzu, Ndza ha tikarhatela yini mahala?

³⁰Hambi ndzi tihlantswa ematini ya gamboko, Kumbe ndzi hlamba mavoko hi xisibi;

³¹Hambiswiritano, u ta ndzi puluvundzisa endzhopeni, Ndzi va ndzi phiriwa hi tinguvu ta mina.

³²Hikuva a hi munhu wo kota mina, ndzi nga hlamulana na xona, Hi yisana ehubyeni na xona;

³³A ku na mulamuleri exikarhi ka hina, La nga hi lamulelaka hi voko ra yena.

³⁴A xi suse nhonga ya xona eka mina, Ni mavoko ya xona a ma tshike ku ndzi hungukisa;

³⁵Hilaha ndzi nga ta vulavula ndzi nga xi chavi, Kambe a swi tano na mina.