Read tsonga Tipisalema 10 Bible Online

Tipisalema 10 - tsonga bible

Tipisalema 10

¹Oho Yehovha u yimela yini hitlhelo? U tifihlela yini enkarhini wa nhlomulo xana?

²La nga ni khombo u xaniseka hi ku tikurisa ka lavo homboloka; U phasiwa emahirini lama hiriweke hi vona.

³Hikuva lowo biha u tidzunisa hi ku navela ka mbilu ya yena; Ni khamba ri rhukana, kambe ri sandza Yehovha.

⁴Lowo biha, eku tikuriseni ka yena, a ku: A nga ka a nga vutisisi; “Xikwembu a xi kona”; hi kona ku anakanya ka yena hinkwako.

⁵Ku kateka ku le ndleleni ya yena hi masiku; Ku avanyisa ka wena ku n'wi tsandza hi vukulu bya kona; U huhutela eka hinkwavo lava nga valala va yena.

⁶A ku embilwini ya yena: Ndzi nga ka ndzi nga tsekatsekisiwi, Ndzi sirheriwe makhombo hi masiku.

⁷Nomu wa yena wu tele tinhlambha, ni ku xisa, ni mano; Ririmi ra yena ri fihlile lunya ni ku homboloka.

⁸U etlele kusuhi ni swimitana, U dlaya la nga riki na nandzu endhawini ya munyama; Mahlo ya yena ma xiya la nga ni khombo.

⁹Wa rindza emunyameni kukotisa nghala leyi nga ebakweni ra yona; Wa rindza ku khoma la nga enhlomulweni; A n'wi khoma, a n'wi koka hi ntlhamu wa yena.

¹⁰Wa bvutama, wa wonga, Kutani xisiwana xi wela emin'waleni ya yena.

¹¹A ku embilwini ya yena: “Xikwembu xi rivele; Xi fihlile mombo wa xona, a xi languti ni siku ni rin'we.”

¹²Pfuka, Yehovha! Oho Xikwembu, tlakusa voko ra wena! U nga rivali lava nga ekhombyeni!

¹³Xana lowo homboloka a tsan'wela yini Xikwembu? Leswi a nga embilwini ya yena: “U nga ka u nga lavisisi”?

¹⁴Kasi wa swi vona, hikuva u languta khombo ni ku xaniseka, Kutani u swi tekela emavokweni ya wena. La nga ekhombyeni u titshembela wena, Hi wena muyimeri wa xisiwana.

¹⁵Tshova voko ra lowo homboloka, U lavisisa ku homboloka ka yena, u ko u nga ha n'wi voni!

¹⁶Yehovha i hosi hi masiku, hilaha ku nga heriki; Vamatiko va herisiwa emisaveni ya yena.

¹⁷Oho Yehovha! U yingisa mikhongelo ya lava xanisiwaka; U tiyisa timbilu ta vona, u va yingisela hi tindleve ta wena,

¹⁸Ku lulamisa timhaka ta swisiwana ni ta la xanisiwaka, Leswaku munhu wa ku fa a nga ha chavisi la emisaveni.