Read tsonga Tipisalema 105 Bible Online

Tipisalema 105 - tsonga bible

Tipisalema 105

¹Dzunisani Yehovha khongelani vito ra yena! Tivisani exikarhi ka matiko mitirho ya yena leyi tlakukeke!

²N'wi yimbeleleni, n'wi dzuneni hi tinsimu ta n'wina, Vurisani swihlamariso hinkwaswo swa yena!

³Tikuriseni hi vito leri kwetsimaka ra yena! Timbilu ta lava lavaka Yehovha a ti tsake!

⁴Lavani Yehovha ni matimba ya yena, Mi lava mombo wa yena hi masiku!

⁵Tsundzukani mitirho leyo hlamarisa leyi a nga yi endla, Mahlori ya yena ni ku avanyisa loku humaka enon'wini wa yena.

⁶N'wina, va rixaka ra Abrahama, nandza wa yena, N'wina va Yakobo, vahlawuriwa va yena.

⁷Yehovha, hi yena Xikwembu xa hina; Ku avanyisa ka yena ku eneta misava hinkwayo.

⁸Wa tsundzuka ntwanano wa yena hi laha ku nga heriki, Ni rito leri a ri leriseke etinxakeni ta madzana.

⁹Wu nga ntwanano lowu a nga wu endla na Abrahama, Ni ku hlambanya loku a nga ku hlambanyela Isaka,

¹⁰Lexi a nga xi tiyisa eka Yakobo wu va nawu Ni ntwanano lowu nga heriki eka Israele.

¹¹A ku: “Ndzi ta ku nyika tiko ra Kanana, Ri va ndzhaka ya n'wina.”

¹²Loko va ha ri vatsanana, Va nga talanga, va ri vaendzi etikweni,

¹³Va ri karhi va tsendzeleka ematikweni, Ni le ku fumeni kun'wana ni kun'wanyana,

¹⁴A nga pfumelelanga munhu ku va xanisa, A laya tihosi hikwalaho ka vona,

¹⁵A ku: “Mi nga khumbeni vahlawuriwa va nga, Mi nga tshuki mi endlela vaprofeta va mina swo biha!”

¹⁶A vitanela tiko rero ndlala, A va tsona vuswa lebyi va tiyisaka,

¹⁷A va rhumela munhu ku va rhangela emahlweni: Yena Yosefa a xavisiwa ku va khumbi.

¹⁸Va manya milenge ya yena hi khotso, A hanyisa sweswo etinsimbhini,

¹⁹Ku fikela nkarhi lowu timhaka leti a ti vuleke ti humelelaka, Kutani rito ra Yehovha ri n'wi ringa.

²⁰Hosi ya Egipta yi rhumela ku n'wi tshunxa, Mufumi wa matiko a n'wi pfulela nyangwa ya khotso,

²¹Kutani a n'wi veka ndhuna ya yindlu ya yena, Ni mulanguteri wa rifuwo ra yena hinkwaro.

²²A a ri ni matimba ya ku boha tihosana ta yena, Ni ku dyondzisa vutlhari eka vakulukumba.

²³Kutani Israele a fika eEgipta, Yakobo a tshama etikweni ra Hamu, a ri n'eni.

²⁴Yehovha a andzisa tiko ra yena ngopfu, Ri va ni matimba ku tlula valala va rona.

²⁵A hundzuluxa timbilu ta vona, leswaku va ta venga tiko ra yena, Va dlumama ku lovisa malandza ya yena.

²⁶A rhuma Muxe, nandza wa yena, Na Aroni loyi a nga n'wi hlawula.

²⁷Va tirha exikarhi ka vona swikombiso leswi a va byeleke swona, Ni masingita etikweni ra Hamu.

²⁸A rhuma xingwindze, a endla munyama, Kambe a va alanga rito ra yena.

²⁹A hundzula mati ya vona ngati, A herisa tinhlampfi ta vona.

³⁰Tiko ra vona ri tala mitlambya, Yi nghena ni le tindlwini ta tihosi ta vona.

³¹A vula, kutani ku ta tinsuna, Ni tin'hwala etikweni ra vona hinkwaro.

³²A endla timpfula ta vona xihangu, A rhuma malangavi ya ndzilo etikweni hinkwaro.

³³A ba tivhinya ta vona ni mikuwa ya vona, A tshovelela mirhi ya tiko ra vona.

³⁴A vula, kutani ku ta tinjiya, Tinjiya leti tsandzaka vahlayi,

³⁵Ti dya byanyi hinkwabyo bya tiko, Ti heta mihandzu hinkwayo ya masimu ya vona,

³⁶A ba ni mativula hinkwawo etikweni ra vona, Swirhangana hinkwaswo swa matimba ya vona.

³⁷Kutani a humesa Vaisraele va tekile silivhere ni nsuku, Ku nga ri na munhu la tsekatsekaka etinxakeni ta vona.

³⁸Vaegipta va tsakela ku huma ka vona, Hikuva nchavo wa Israele a wu va khomile.

³⁹U phurumule papa ku va sirhela, Ni ndzilo ku va voningela nivusiku.

⁴⁰Kuteloko va kombele, u va nyike switsatsatsa, Kutani a va xurhisa hi vuswa bya tilo.

⁴¹A handzula ribye, kutani mati ma pfelela, Ma khuluka hi maboboma exikarhi ka mananga.

⁴²Hikuva a tsundzukile rito ra yena leri hlawuriweke, A tsundzuka na Abrahama, nandza wa yena.

⁴³A humesa tiko ra yena hi ku tsaka, Ni vahlawuriwa va yena hi ku tsakisisa.

⁴⁴A va nyika misava ya matiko, Va titekela mitirho ya tinxaka ta vanhu,

⁴⁵Leswaku va ta hlayisa ku lerisa ka yena, Va famba hi milawu ya yena. Dzunisani Yehovha!