Read tsonga Tipisalema 106 Bible Online

Tipisalema 106 - tsonga bible

Tipisalema 106

¹Dzunisani Yehovha! Dzunisani Yehovha, hikuva u lulamile, Hikuva tintswalo ta yena hi leti nga heriki.

²I mani la tivaka ku vula mitirho leyi tlakukeke ya Yehovha? La nga ta twarisa ku dzuna ka yena hinkwako xana?

³Ku katekile lava hlayisaka milawu, Lava endlaka swinene hi mikarhi hinkwayo!

⁴Yehovha, ndzi tsundzuke, hikwalaho ka rirhandzu ra wena eka tiko ra wena! U ndzi tela hi ku hlayiseka ka wena,

⁵Leswaku ndzi ta vona ku kateka ka vahlawuriwa va wena, Ndzi va ndzi titsakela hi ku tsaka ka tiko ra wena, Ndzi tidzunisa swin'we ni vadyandzhaka va wena.

⁶Hi dyohile kukota vatata wa hina, Hi fambile hi ku homboloka, hi endlile leswo biha.

⁷Vatata wa hina a va tsundzukanga mahlori ya wena eEgipta, A va anakanyanga ku tala ka mikateko ya wena, Kambe va tiarisa ekusuhi ni lwandle, eLwandle-ro-Tshwuka.

⁸Hambiswiritano, a va ponisa hikwalaho ka vito ra yena, Leswaku a ta kombisa matimba ya yena.

⁹A tshinya Lwandle ro Tshwuka kutani ri oma; A va fambisa exikarhi ka swidziva, kukotisa exikarhi ka mananga.

¹⁰A va lamulela evokweni ra loyi a va vengeke, Kutani a va lwela evokweni ra nala.

¹¹Mati ma khubumeta vaxanisi va vona: A ku salanga na un'we.

¹²Kwalaho va pfumela marito ya yena, Va yimbelela ku twala ka yena.

¹³Kambe va hatlisa va rivala mitirho ya yena, A va tshembanga makungu ya yena.

¹⁴Va ngheniwa hi ku navela emananga, Va ringa Xikwembu laha ku nga akiwiki.

¹⁵Kutani xi va nyika hi ku kombela ka vona, Kambe xi va rhumela ku vabya.

¹⁶A va tshohoka Muxe emixaxeni, Na Aroni, muhlawuriwa wa Yehovha.

¹⁷Misava yi handzuka, yi mita Datani, Yi funengeta ntlawa wa Abirama.

¹⁸Ndzilo wu pfurha exikarhi ka nhlengeletano ya vona, Kutani malangavi ma lovisa lavo biha.

¹⁹Va tiendlele rhole eHorebe, Va khinsamela xifaniso lexi chuluriweke,

²⁰Ku kwetsima ka vona, va ku hundzula Xifaniso xa homu leyi dyaka byanyi.

²¹Va rivarile Xikwembu, mukutsuri wa vona, Lexi endleke swilo leswikulukumba eEgipta,

²²Ni swihlamariso emisaveni ya Hamu, Ni swikombiso leswi chavisaka eLwandle-ro-Tshwuka.

²³Xi vurile leswaku xi ta va herisa, Kambe Muxe, muhlawuriwa wa yena, a va lamulela, Leswaku vukari bya xona byi miyela, va nga ti herisiwa.

²⁴Va nyenya tiko lero nandziha; A va pfumelanga rito ra xona,

²⁵Kambe va dzumadzuma emitsongeni ya vona, Va nga yingisanga rito ra Yehovha.

²⁶Hikwalaho xi tlakusile voko ra xona ehenhla ka vona, Xi hlambanya leswaku xi ta va wisa emananga;

²⁷Xi cukumeta rixaka ra vona exikarhi ka vamatiko, Xi va hangalasela ematikweni hinkwawo.

²⁸Va namarhela Baala-Peyori. Va dya tinyama ta swifuwo leswi tlhaveriweke vafi.

²⁹Va karihisa Xikwembu hi mitirho ya vona leyo biha, Ku fikela ntungu wu nghena exikarhi ka vona.

³⁰Hi loko Finiyasi a humelela, a rihisela Yehovha, Kavaloko ntungu wu yima;

³¹Kutani hi mhaka yoleyo a vuriwa la lulameke, Exikarhi ka tinxakaxaka hi laha ku nga heriki.

³²Va hlundzukisa Xikwembu ematini ya Meriba; Hikwalaho ka vona Muxe a humeleriwa hi khombo,

³³Hikuva va karihisile moya wa yena, Na yena a vulavula hi nomu hi ku hatlisa.

³⁴Kambe a va herisangi matiko Hi laha Yehovha a va leriseke hakona;

³⁵Kambe va hlanganile na vona, Va dyondza mikhuva ya vona.

³⁶Va tirhela swikwembu swahava swa vona, Leswi va khunguvanyiseke.

³⁷Va tlhavela swikwembu swa mavunwa Vana va vona va vavanuna ni vanhwanyana va vona,

³⁸Va halata ngati leyi nga riki na nandzu, Ngati ya vana va vona ni vanhwanyana va vona, Lava va va tlhaveleke swifaniso swa Kanana, Kutani misava yi nyamisiwa hi ngati leyi halatiweke.

³⁹Na vona va tichela hi thyaka hi mitirho ya vona, Ni mitirho ya vuoswi bya vona.

⁴⁰Vukari bya Yehovha byi pfurhela tiko ra yena, Ndzhaka ya yena yi hundzuka xilo lexa manyala.

⁴¹A va nyiketa emavokweni ya vamatiko, Kutani va fumiwa hi vavengi va vona,

⁴²Va xanisiwa hi valala va vona, Va tsongahatiwa ehansi ka mavoko ya vona.

⁴³Hakanyingi Yehovha u va kutsurile, Kambe vona va tiarisa hi ku tirhandzela makungu ya vona, Kutani va tilahla hi ku biha ka vona.

⁴⁴Hambiswiritano a va languta loko va ri eku xanisekeni, A yingisa swirilo swa vona.

⁴⁵Kutani a tsundzuka ntwanano wa yena hikwalaho ka vona, A va tsetselela hikwalaho ka tintswalo ta yena letikulu.

⁴⁶A va pfuxela tintswalo eka hinkwavo lava va va boheke, Lava ngi va ri vakhomiwa eka vona.

⁴⁷Yehovha, Xikwembu xa hina, hi kutsule! Hi hlengelete exikarhi ka matiko, Leswaku hi ta yimbelela vito ra wena leri kwetsimaka, Hi ta tikurisa hi ku ku dzunisa!

⁴⁸A ku khensiwe Yehovha, Xikwembu xa Israele, Ku suka eku sunguleni, ku yisa laha ku nga heriki! Tiko hinkwaro a ri vule: “Amen!” Dzunisani Yehovha!