Read tsonga Tipisalema 108 Bible Online

Tipisalema 108 - tsonga bible

Tipisalema 108

¹Oho Xikwembu! Mbilu ya mina yi tiyile! Ndzi ta yimbelela tinsimu, ndzi yimbelela hi haripa Na kona ku kwetsima ka mina ku ta ku dzunisa.

²Pfukani n'wina psalteri ni haripa ya mina, Ndzi ta pfuka ni vurhonga.

³Ndzi ta ku dzunisa, Yehovha, exikarhi ka tinxaka, Ndzi ta ku yimbelela exikarhi ka matiko,

⁴Hikuva tintswalo ta wena ti titlakukile ehenhla ka matilo, Ni ku tshembeka ka wena ku fike emapapeni,

⁵Oho Xikwembu! Titlakuse henhla ka matilo, Ku kwetsima ka wena a ku voninge misava hinkwayo!

⁶Ponisa hi voko ra wena ra xinene, u ndzi yingisa, Leswaku varhandziwa va wena va ta hlayiseka.

⁷Xikwembu xi vurile eku kwetsimeni ka xona xi ku: “Ndzi ta hlula, Ndzi ta pambula Xikeme, ndzi ta pima nkova wa Sukoti.

⁸Giliyadi i wa mina; Manase i wa mina! Efrayimi, i xiseketelo xa nhloko ya mina; Yuda, ndzi n'wi vekile ku lerisa milawu ya mina.

⁹Mowabu i nkambana lowu ndzi hlambelaka eka wona; Ndzi ta hoxela ntanghu ya mina ehenhla ka Edomu; Ndzi ba huwa ya ku tsaka etikweni ra Vafilista.”

¹⁰I mani la nga ta ndzi yisa emutini lowa matimba? I mani la nga ta ndzi fambisa ku ya fika eEdomu?

¹¹A hi wena, Xikwembu lexi hi cukumeteke? U nga ha humi ni tinyimpi ta hina!

¹²U hi pfuna ku ta huma ekhombyeni, Hikuva ku pfuna ka munhu i ka hava!

¹³Ha Xikwembu, hi ta hlula, Hi xona xi nga ta kandziyela valala va hina.