Read tsonga Tipisalema 109 Bible Online

Tipisalema 109 - tsonga bible

Tipisalema 109

¹Oho Xikwembu lexi ndzi xi dzunisaka, u nga tshuki u miyela,

²Hikuva nomu wa lowo biha, ni nomu wa muxisi Wu ndzi ahlamele ku lwa na mina, Va vulavula na mina hi ririmi ra vunwa,

³Va ndzi rhendzele hi marito ya rivengo, Va ndzi hlasela ntsena.

⁴Ematshan'weni ya rirhandzu ra mina, va tivekile valala va mina; Mina, a ndzi tshiki ku khongela.

⁵Va ndzi rihisele vunene hi ku biha, Ni rirhandzu hi rivengo.

⁶Nyiketa munhu lowo tano emavokweni ya lowo biha, Kambe nala a a yime etlhelweni ra yena ra xinene!

⁷Eku avanyisiweni a a kumiwe a ri ni nandzu! Ku khongela ka yena a ku n'wi hundzukele xidyoho!

⁸Masiku ya yena a ma komisiwe, Un'wanyana a a titekele vutshamo bya yena!

⁹Vana va yena a va hundzuke swisiwana, Nsati wa yena a a ve noni!

¹⁰Vana va yena a va tsendzeleke va va vakomberi, Va singila ekule ni yindlu ya vona leyi onhakeke!

¹¹La nga lomba eka yena a a dye hinkwaswo leswi a nga na swona, Mihandzu ya ntirho wa yena a yi phangiwe hi vamatiko!

¹²Ku nga vi na munhu la n'wi endlelaka hi tintswalo; Ku nga tshuki ku va na la tsetselelaka swisiwana swa yena!

¹³Vatukulu va yena a va lovisiwe, vito ra vona a ri love erixakeni leri tlhandlamaka!

¹⁴Ku dyoha ka vatata wa yena a ku vuyele emahlweni ka Yehovha, Ku dyoha ka mana wa yena ku nga hlanguriwi,

¹⁵A ku va emahlweni ka Yehovha hi masiku hinkwawo; Kutani a herisa ku tsundzukiwa ka vona emisaveni!

¹⁶Hikuva a nga anakanyanga ku endla hi tintswalo, Kambe u xanisile munhu wa khombo ni mupfumari, Ni wa mahlomulo, u suse vutomi bya yena.

¹⁷U rhandzile ndzhukano: wu n'wi wele ehenhla! A nga tsakelanga nkateko: a wu ve kule na yena!

¹⁸A a tiambexe ndzhukano kukotisa loko ngi yi ri nguvu, A wu n'wi nghenele endzeni kukotisa mati, Kukotisa mafurha emarhambyini ya yena.

¹⁹A wu ve eka yena kukotisa nguvu ku tifunengeta ha yona, Kukotisa vamba leri munhu a tibohaka ha rona hi masiku!

²⁰Yi va hakelo leyi Yehovha a yi hakelaka valala va mina, Ni lava vulaka swo biha ehenhla ka mina.

²¹Kambe, wena Hosi, Yehovha! U ndzi pfuna hikwalaho ka vito ra wena, Hikuva nsovo wa wena wu nene: Ndzi hanyise!

²²Hikuva ndzi wa khombo ni mupfumari, Mbilu ya mina yi tlhavekile endzeni ka mina.

²³Ndzi tifambela kukotisa ndzhuti lowu ololokaka, Ndzi hungiwa kukotisa njiya,

²⁴Matsolo ya mina ma rhurhumela hi ku titsona swakudya, Nyama ya mina yi herile emirini wa mina hi ku ondza.

²⁵Ndzi nyiketiwile ku va xisandzu xa vona; Loko va ndzi languta, va ninginisa tinhloko ta vona.

²⁶Ndzi pfune, Yehovha, Xikwembu xa mina! Ndzi ponise hi tintswalo ta wena!

²⁷Va ta twa leswaku i voko ra wena. Hi wena, Yehovha, u nga swi endla!

²⁸Vona va nga rhukana, wena u katekisa, Va nga tlakuka, kambe va ta khomiwa hi tingana, Kambe nandza wa wena u ta titsakela.

²⁹Vakaneti va mina va ta funengetiwa hi tingana, Kutani ku tsohoka ka vona ku ta va funengeta kukotisa nguvu.

³⁰Ndzi ta dzunisa Yehovha hi nomu wa mina hi rito leri tlakukeke, Ndzi ta n'wi dzunisa exikarhi ka vunyingi;

³¹Hikuva u yime etlhelweni ra xinene ra xisiwana, Kutani a n'wi kutsula eka lava n'wi avanyisaka.