Read tsonga Tipisalema 147 Bible Online

Tipisalema 147 - tsonga bible

Tipisalema 147

¹Dzunisani Yehovha, Hikuva swi lulamile, swi va swi nandziha ku dzunisa Xikwembu xa hina; Ku bumabumeriwa, swa n'wi fanela.

²Yehovha u pfuxa Yerusalema, U hlengeleta vahlongoriwa va Israele;

³U horisa lava timbilu leti tlhaviweke, U bohelela timbanga ta vona.

⁴U pima ntsengo wa tinyeleti, U ti vita hinkwato hi mavito ya tona.

⁵Hosi ya hina yi kulukumba; matimba ya yona makulu ngopfu, Vutlhari bya yona a byi na ku pimiwa.

⁶Yehovha u pfuxa lava titsongahataka, U tsongahata lavo biha ku fika ehansi.

⁷Khensani Yehovha, Mi dzunisa Xikwembu xa hina hi haripa!

⁸U eneta tilo hi mapapa, u nisa mpfula emisaveni, U mirisa byanyi etintshaveni.

⁹U nyika swiharhi swakudya swa swona; U phamela mavondlo ya mawukuwuku loko ma rila.

¹⁰A nga vuri nchumu hi matimba ya hanci, A nga tsakisiwi hi milenge ya munhu.

¹¹Yehovha u tsakela lava n'wi chavaka, Lava tshembaka tintswalo ta yena.

¹²Yerusalema, dzunisa Yehovha! Siyoni, vonga Xikwembu xa wena!

¹³Hikuva u tiyisa tinghole ta tinyangwa ta wena, U katekisa vana va wena exikarhi ka wena.

¹⁴U veka ku rhula emindzilekaneni ya wena, U ku xurhisa hi mongo wa koroni.

¹⁵U rhumela misava ku lerisa ka yena; Rito ra yena ri ni rivilo lerikulu.

¹⁶U nisa gamboko lero basa kukota voya bya nyimpfu, U hangalasa xirhami tani hi nkuma.

¹⁷U wisa xihangu xa yena lexi tiyeke; I mani la kotaka ku yima emahlweni ka xirhami xa yena?

¹⁸U rhuma rito ra yena, kutani a swi n'okisa; U hungisa moya wa yena, kutani mati ma khuluka.

¹⁹U hlavutele Yakobo rito ra yena, Na Israele, milawu ya yena ni swileriso swa yena;

²⁰A nga endlanga sweswo eka matiko man'wana, Kambe a ma tivi swileriso swa yena.