Read tsonga Tipisalema 148 Bible Online

Tipisalema 148 - tsonga bible

Tipisalema 148

¹Dzunisani Yehovha! Dzunisani Yehovha ematilweni, n'wi dzuniseni ehenhla ka mpfhuka!

²N'wi dzuniseni, n'wina tintsumi ta yena hinkwato! N'wi dzuniseni, mavandla ya yena hinkwawo!

³N'wi dzuniseni, dyambu ni n'weti! N'wi dzuniseni hinkwenu, n'wina tinyeleti to vangama!

⁴N'wi dzuniseni, matilo ya matilo, Na n'wina mati lama nga ehenhla ematilweni!

⁵Hinkwaswo sweswo a swi dzunise vito ra Yehovha! Hikuva u lerisile, kutani swi va kona.

⁶U swi vekile leswaku swi va kona hi laha ku nga yiki helo ni makumu, U swi nyikile milawu, a ku na xin'we lexi yi tlulaka.

⁷Dzunisani Yehovha, la emisaveni, N'wina madragona, na n'wina swidziva hinkwenu.

⁸Ndzilo ni xihangu; gamboko ni tihunguva, Mimoya ya xidzedze leyi hetisaka ku lerisa ka yena.

⁹Tintshava ni switsunga hinkwaswo, Mirhi ya mihandzu, na n'wina tikedari hinkwenu,

¹⁰Swiharhi ni swifuwo hinkwaswo, Leswi kokovaka ni tinyanyana leti nga ni timpapa,

¹¹Tihosi ta misava ni matiko hinkwawo, Tihosana, na n'wina hinkwenu vaavanyisi va misava,

¹²Majaha ni vanhwana, swikoxa ni vana! A va dzunise vito ra Yehovha!

¹³Hikuva vito ra yena hi rona ntsena leri tlakukeke; Vuhosi bya yena byi tlakukile ku tlula misava ni matilo.

¹⁴U tiyisa rimhondzo ra tiko ra yena; U ta dzunisiwa hi hinkwavo lava n'wi rhandzaka, Va nga vana va Israele, tiko leri nga ekusuhi na yena. Dzunisani Yehovha!