Read tsonga Tipisalema 19 Bible Online

Tipisalema 19 - tsonga bible

Tipisalema 19

¹Matilo ma vula ku kwetsima ka Xikwembu, Ni mpfhuka wu tivisa ntirho wa mavoko ya xona.

²Siku ri vulavula ni siku rin'wana, Ni vusiku byi dyondzisa byin'wana.

³A hi mhaka, a hi marito Lawa mpfumawulo wa wona wu nga twakariki;

⁴Ku twakala ka swona ku hangalakile emisaveni hinkwayo, Marito ya swona ma yile emakun'wini ya misava. Xi akele dyambu ntsonga wa rona kona.

⁵Rona ri huma kukotisa muteki endlwini ya yena; Ri tsaka kukota nhenha leyi tsutsumaka eku siyisaneni;

⁶Ri suka emakun'wini ya matilo, Kutani riendzo ra rona ri helela emakun'wini man'wana; A ku na nchumu lowu fihlekaka eku hiseni ka rona.

⁷Nawu wa Yehovha wu hetisekile, wu wisisa moya; Vumbhoni bya Yehovha bya tshembeka, byi tlharihisa xihunguki.

⁸Ku letela ka Yehovha ku lulamile ku tsakisa mbilu; Ku lerisa ka Yehovha ku basile, ku hanyanyisa mahlo;

⁹Xichavo xa Yehovha xi tengile, xi kona hi masiku; Ku avanyisa ka Yehovha ku nene, ku lulamile hinkwako.

¹⁰Swi naveriwa ngopfu ku tlula nsuku ku tlula nsuku lowu tengeke wa ku tala. Swi tlula ni vulombe hi ku nandziha, ni leswi tshonaka eswihlengeni swa byona.

¹¹Hikwalaho nandza wa wena u dyondzisiwa ha swona; La hlayisaka swona u ni hakelo leyikulu.

¹²I mani la tivaka ku hoxa ka yena xana? U ndzi khomela milandzu leyi ndzi yi rivaleke.

¹³Kambe u hlayisa nandza wa wena eka lava tikurisaka; Va nga tshuki va ndzi fuma! Hi laha ndzi nga ta tenga, ndzi va ndzi pfumala milandzu leyikulu.

¹⁴Wa nga amukela marito ya nomu wa mina, Ni ku anakanya ka mbilu ya mina, Wena Yehovha, ribye ra mina ni mulweri wa mina!