Read tsonga Tipisalema 21 Bible Online

Tipisalema 21 - tsonga bible

Tipisalema 21

¹Yehovha, matimba ya wena ma tsakisa hosi. Ku ponisa ka wena ka n'wi tsakisa swonghasi!

²U n'wi nyikile hilaha mbilu ya yena yi naveleke hakona, Kambe a ku solanga ku kombela ka milomu ya yena,

³Hikuva u n'wi rhangele hi ku kateka lokunene; U n'wi vekerile enhlokweni harhi ya nsuku lowu tengeke.

⁴U kombele vutomi, kutani u n'wi nyikile byona, Byi ri vutomi lebyi tiyeke, lebyi nga heriki.

⁵Ku kwetsima ka yena kukulu hikwalaho ka ku pfuna ka wena. U n'wi nyikile ku chaviwa ni vukulu;

⁶Hikuva u n'wi endlile wa ku kateka hi masiku, U n'wi tsakisisa hi mombo wa wena.

⁷Hikuva hosi yi titshembele Yehovha, Kutani hi ku tsetselela ka La nge henhlahenhla a nga ka a nga tsekatseki.

⁸Voko ra wena ri ta khoma valala va wena hinkwavo, Voko ra wena ra xinene ri ta kuma lava ku vengaka.

⁹U va endla tani hi hondo leri pfurhaka, Esikwini leri u humelelaka ha rona; Yehovha u ta va herisa hi vukari bya yena, Kutani va ta hisiwa hi ndzilo.

¹⁰U ta herisa rixaka ra vona emisaveni, Ni vatukulu va vona exikarhi ka vana va vanhu,

¹¹Hikuva va ku endlele makungu yo biha, Va lukile mano, kambe va ta pfumala matimba.

¹²Hikuva u ta va tsutsumisa va ku fularhele, Kutani u va copa hi vurha bya wena.

¹³Pfuka Yehovha, hi matimba ya wena, Hi rhandza ku yimbelela ni ku twarisa matimba ya wena.