Read tsonga Tipisalema 25 Bible Online

Tipisalema 25 - tsonga bible

Tipisalema 25

¹Yehovha! Ndzi tlakusa moya wa mina eka wena.

²Xikwembu xanga! Ndzi vekile ku tshemba ka mina eka wena; Ndzi nga tshuki ndzi khomiwa hi tingana. Lava nga valala eka mina, va nga tshuki va tsaka ha mina!

³Hinkwavo lava ku tshembaka va nga ka va nga khomiwi hi tingana. Tingana i ta lava endlaka swo biha ha vomu ntsena.

⁴Yehovha! Ndzi kombe tindlela ta wena, U ndzi dyondzisa mikhuva ya wena.

⁵Ndzi fambise entiyisweni wa wena u ri karhi u ndzi dyondzisa; Hikuva hi wena Xikwembu xa ku hlayiseka ka mina; Hi masiku, ndzi ku tshembile.

⁶Oho Yehovha! Anakanya tintswalo ta wena ni nsovo wa wena, Hikuva i swa masiku hinkwawo,

⁷U nga anakanyi swidyoho swa vuntshwa bya mina, ni ku tlula ka mina; U ndzi anakanya hi nsovo wa wena, Hikwalaho ka tintswalo ta wena, oho Yehovha!

⁸Yehovha u ni vunene, u lulamile: Hikwalaho a kombisaka vadyohi ndlela;

⁹A fambisa eku lulameni lava olovaka etimbilwini, A dyondzisa lava titsongahataka ndlela ya yena.

¹⁰Tindlela hinkwato ta Yehovha i tintswalo ni ku tshembeka, Eka hinkwavo lava hlayisaka ntwanano wa yena ni swileriso swa yena.

¹¹Hikwalaho ka vito ra wena, Yehovha, U ndzi khomele ku homboloka ka mina, hikuva kukulu.

¹²Xana munhu hi wihi la chavaka Yehovha? U ta n'wi komba ndlela leyi a fanelaka ku yi hlawula.

¹³Moya wa yena wu ta tshama endzalweni, Kutani vatukulu va yena va ta fuma misava.

¹⁴Makungu ya Yehovha i ya lava n'wi chavaka, Ku va dyondzisa ntwanano wa yena.

¹⁵Mahlo ya mina ma languta Yehovha hi masiku, Hikuva u tshunxile milenge ya mina entlhan'wini.

¹⁶Rhendzelekela eka mina, u ndzi tsetselela, Hikuva ndzi ri swanga, ndzi le khombyeni.

¹⁷Mahlomulo ya mbilu ya mina ma engetelelekile; U ndzi humesa emakhombyeni ya mina!

¹⁸Languta nhlomulo ni ku vaviseka ka mina, U va u ndzi khomela ku dyoha hinkwako ka mina.

¹⁹Languta valala va mina, hikuva va tele, Va ndzi venga hi rivengo lero leva.

²⁰Hlayisa moya wa mina, u ndzi kutsula; Ndzi nga khomiwi hi tingana, hikuva ndzi ku tshembile!

²¹Ku tenga ni ku lulama a swi ndzi tiyise, Hikuva ndzi ku langutele.

²²Oho Xikwembu! Ponisa Israele emapfalweni ya yena hinkwawo!