Read tsonga Tipisalema 30 Bible Online

Tipisalema 30 - tsonga bible

Tipisalema 30

¹Yehovha, ndza ku kurisa hikuva u ndzi tshunxile; A ku tshikanga valala va mina va tsaka ha mina.

²Yehovha, Xikwembu xa mina, Ndzi huwelele eka wena, kutani u ndzi horisile.

³Yehovha, u humesile moya wa mina exivandleni xa vafi, U ndzi hanyisile exikarhi ka lava xikelaka esirheni.

⁴Yimbelelani Yehovha, n'wina lava n'wi rhandzaka, Mi dzunisa vito ra yena leri kwetsimaka, mi ri tsundzuka.

⁵Hikuva vukari bya yena i bya nkarhinyana ntsena, Kambe tintswalo ta yena, i ta vutomi hinkwabyo; Swirilo swi nga hambukela eka munhu nimadyambu, Kambe nimixo i ku tsaka.

⁶Eku tiphineni ka mina, a ndzi ku: “Ndzi nga ka ndzi nga tsekatseki, ni siku ni rin'we?”

⁷Yehovha! Hi tintswalo ta wena, u tiyisile ntshava ya mina; Kambe u fihle mombo wa wena, kutani ndzi kanakana.

⁸Oho Yehovha! Ndzi huwelele eka wena; Ndzi khongerile Yehovha, ndzi ku:

⁹“Xana u nga fuwa yini hi ngati ya mina, Loko ndzi xikela esirheni? Xana ntshuri wu nga ku dzunisa? Xana wu nga vula ku tshembeka ka wena xana?

¹⁰Yehovha, ndzi yingise, u va u ndzi twela vusiwana; Yehovha, u va mupfuni wa mina!”

¹¹U hundzuluxile mihloti ya mina ku tsaka, U tshunxile nguvu ya mina leyo khwaxa, kutani u ndzi ambexe ku tsaka,

¹²Leswaku mbilu ya mina yi ku yimbelela yi nga miyeli. Yehovha, Xikwembu xa mina, ndzi ta ku dzunisa hi masiku.