Read tsonga Tipisalema 31 Bible Online

Tipisalema 31 - tsonga bible

Tipisalema 31

¹Yehovha, ndzi chavela eka wena: Ndzi nga khomiwi hi tingana ni siku ni rin'we! Ndzi tshunxe eku lulameni ka wena!

²Wa nga ndzi yingisa, u hatlisa ku ndzi ponisa! U va ribye ra mina ra xichavelo, Ni khokholo laha ndzi nga chavelaka kona.

³Hikuva hi wena ribye ra mina ni khokholo ra mina; Hikwalaho ka vito ra wena, u ta ndzi komba ndlela, u ndzi fambisa,

⁴U ta ndzi tshunxa entlhan'wini lowu va ndzi lunghiseleke wona; Hikuva hi wena xichavelo xa mina.

⁵Ndzi nyiketa moya wa mina emavokweni ya wena; U ta ndzi kutsula, wee Yehovha, Xikwembu xa ku tshembeka!

⁶Ndzi venga lava namarhelaka swikwembu swahava; Loko ndzi ri mina, ndzi titshembela Yehovha.

⁷Ndzi ta ba mikulungwana, ndzi tsakela musa wa wena, Wena la langutaka khombo ra mina, u tivaka mahlomulo ya moya wa mina,

⁸A ku ndzi nyiketanga emavokweni ya nala, Kambe u tiyisile mikondzo ya mina erivaleni.

⁹Yehovha, ndzi tsetselele, hikuva ndzi le mahlomulweni; Mahlo ya mina ma herisiwa hi swirilo, swin'we ni moya wa mina, ni marhumbu ya mina;

¹⁰Hikuva vutomi bya mina byi helela eku vavisekeni, Ni malembe ya mina eku konyeni. Matimba ya mina ma tsanile hikwalaho ka ku homboloka ka mina, Kutani marhambu ya mina ma gudlagudla.

¹¹Ndzi xisandzu hikwalaho ka valala va mina hinkwavo; Xisandzu lexikulu eka lava akeke na mina; Lava ndzi vonaka ehandle va tsutsumela ekule na mina.

¹²Ndzi rivariwile etimbilwini kukota mufi, Ndzi fana ni swirhengele.

¹³Hikuva ndzi twa ku sandza ka lavo tala, Ku tshuka ku ndzi rhendzele, Loko va hlamulana kun'we ehenhla ka mina; Va anakanya ku susa vutomi bya mina.

¹⁴Kambe ndzi vekile ku tshemba ka mina eka wena, Yehovha; Ndzi ku: “U Xikwembu xanga!”

¹⁵Mikarhi ya mina yi le vokweni ra wena; Ndzi tshunxe emavokweni ya valala va mina, ni ya lava ndzi xanisaka.

¹⁶Tsuvukisa mombo wa wena ehenhla ka nandza wa wena, U ndzi ponisa hi nsovo wa wena.

¹⁷Yehovha, ndzi nga tshuki ndzi khomiwa hi tingana, hikuva ndzi ku khongele; Lavo homboloka vona a va khomiwe hi tingana, A va xike va miyela exivandleni xa vafi!

¹⁸Milomu leyi hembaka, a yi hundzuke ya mbheveve, Leyi sandzaka la lulameke, Leyi vulavulaka hi ku tikukumuxa ni ku sola!

¹⁹Ku kurile swonghasi ku kateka ka wena. Loku ku vekelaka lava ku chavaka, Loku u tirhaka hakona emahlweni ka vana va vanhu, Ni ku pfuna lava chavelaka eka wena.

²⁰U va fihla exihundleni lexi nga emahlweni ka wena ekule ni lava xanisaka; U va sirhelela entsongeni wa wena; ekule ni tindzimi leti lumaka.

²¹A ku dzuniwe Yehovha! Hikuva u ndzi kombisile nsovo wa yena, Kukotisa loko ngi ndzi vekiwe ekhokholweni.

²²A ndzi hatlisa, ndzi ku: “Ndzi susiwile emahlweni ka wena”; Kambe u yingisile rito ra ku khongela ka mina, Loko ndzi huwelele eka wena.

²³Rhandzani Yehovha, n'wina hinkwenu varhandziwa va yena. Yehovha u hlayisa lava tshembekaka, Kambe u tlherisela eka la tikurisaka, hinkwaswo leswi n'wi faneleke.

²⁴Tiheni matimba; timbilu ta n'wina a ti tiye, N'wina hinkwenu lava langutelaka Yehovha!