Read tsonga Tipisalema 34 Bible Online

Tipisalema 34 - tsonga bible

Tipisalema 34

¹Ndzi ta twarisa Yehovha hi masiku hinkwawo; Ku dzunisa ka yena ku ta va enon'wini wa mina hi masiku.

²Moya wanga wu ta tidzunisa ha Yehovha; Lava nga ni khombo va ta swi yingisa, va tsaka.

³Dzunisani Yehovha kun'we na mina! A hi kuriseni swin'we vito ra yena!

⁴Ndzi lavile Yehovha, kutani u ndzi hlamurile; A ndzi kutsula eku chaveni hinkwako ka mina.

⁵La langutaka eka yena wa voningiwa, Kutani tingana ti nga ka ti nga vi kona emombyeni wa yena.

⁶Munhu loyi wa nhlomulo u khongerile, kutani Yehovha u n'wi yingisile, A va a n'wi ponisa enhlomulweni wa yena hinkwawo.

⁷Ntsumi ya Yehovha yi rhendzela lava n'wi chavaka, Kutani yi va kutsula.

⁸Nantswani, mi va mi vona leswaku Yehovha hi lonene swonghasi! Ku katekile munhu la chavelaka eka yena.

⁹Chavani Yehovha, n'wina vahlawuriwa va yena! Hikuva lava n'wi chavaka a va pfumari nchumu.

¹⁰Swinghalana swi nga pfumala, swi nga va ni ndlala, Kambe lava lavaka Yehovha a va nga kiyeriwi hi leswinene.

¹¹Tanani vana, mi ndzi yingisela, Ndzi ta mi dyondzisa xichavo xa Yehovha.

¹²I mani la rhandzaka ku hanya, La navelaka ku vona masiku ya ku kateka?

¹³Chavisa ririmi ra wena eka leswo biha, Ni milomu ya wena eka marito ya ku kanganyisa.

¹⁴Fularhela leswo biha, u endla leswinene; Lava ku rhula, u ku landzelela.

¹⁵Mahlo ya Yehovha ma languta lava lulameke, Ni tindleve ta yena ti pfulekela ku huwelela ka vona.

¹⁶Mombo wa Yehovha wu honolela lava endlaka swo biha Ku susa ku tsundzuka ka vona emisaveni.

¹⁷Lava lulameke va huwelela, kutani Yehovha a va yingisa, U va wisisa emapfalweni hinkwawo ya vona.

¹⁸Yehovha u kusuhi ni lava nga ni timbilu leti tshovekeke, U ponisa va mimoya leyi khinyekeke.

¹⁹Makhombo ya la lulameke ma tele ngopfu, Kambe Yehovha u n'wi humesa eka wona hinkwawo.

²⁰U hlayisa marhambu ya yena hinkwawo, A ku na rin'we leri tshovekaka.

²¹Khombo ri ta dlaya lowo biha, Kutani lava nga valala eka la lulameke va ta avanyisiwa.

²²Yehovha u kutsula mimoya ya malandza ya yena, Kutani hinkwavo lava chavelaka eka yena, va nga ka va nga avanyisiwi.