Read tsonga Tipisalema 38 Bible Online

Tipisalema 38 - tsonga bible

Tipisalema 38

¹Yehovha, u nga ndzi bi eku kariheni ka wena, U nga ndzi layi eku holoveni ka wena.

²Hikuva miseve ya wena yi ndzi tlhavile, Voko ra wena ri ndzi tikela ngopfu.

³Ku hanya a ku kona enyameni ya mina hikwalaho ka vukari bya wena. Ku rhula a ku kona emarhambyini ya mina hikwalaho ka xidyoho xa mina.

⁴Hikuva ku homboloka ka mina ku tlule nhloko ya mina; Ku ndzi hlula hi ku tika kukotisa ndzhwalo lowu tikaka ngopfu.

⁵Swilondza swa mina swa nun'hwa, swi ni vuvopfu, Hikwalaho ka vuphukuphuku bya mina.

⁶Ndzi lamele, ndzi vaviseka ngopfu, Siku hinkwaro ndzi famba hi nkosi.

⁷Hikuva xifungha xa mina xi tshwa hi ndzilo, Ku hanya a ku kona enyameni ya mina.

⁸Ndzi heleriwe hi matimba, ndzi tshovatshoviwile ngopfu; Ndzi rila hikwalaho ka ku tsekatseka ka mbilu ya mina.

⁹Hosi, ku navela hinkwako ka mina ku le mahlweni eka wena, Ni mahika ya nga a ma tumbelanga ka wena.

¹⁰Mbilu ya mina ya tlulatlula, matimba ya mina ma ndzi sukela; Ni ku vonakala ka mahlo ya mina a ka ha ri na mina.

¹¹Vanakulorhi ni maxaka ya mina va yimela ekule ni mbanga ya mina, Vamakwerhu va yima hitlhelo.

¹²Lava lavaka vutomi bya mina va ndzi rhiyela mitlhamu; Lava ndzi lavelaka swo biha, va vulavula swa lunya, Va anakanya ku kanganyisa siku hinkwaro.

¹³Kambe mina ndzi kotisa wo fa tindleve, a ndzi twi nchumu; Ndzi fana ni mbheveve la nga ahlamisiki nomu wa yena.

¹⁴Kunene ndzi fana ni munhu la nga twiki nchumu, La nga riki na ku hlamula enon'wini wa yena.

¹⁵Kambe ndzi tshembile wena Yehovha; U ta hlamula, wena Hosi, Xikwembu xa mina.

¹⁶Hikuva ndzi te: “Va nga tshuki va titsakela ha mina, Va nga tshuki va tikurisa ehenhla ka mina loko nenge wa nga wu rhetemuka.”

¹⁷Hikuva ndzi lava ku wa, Kutani ku vaviseka ka mina ku le mahlweni ka mina hi masiku.

¹⁸Hikuva ndzi vula ku dyoha ka mina, Ndzi vaviseka hikwalaho ka ku homboloka ka mina.

¹⁹Kambe valala va mina va hanya va ni matimba; Lava ndzi vengaka ntsena va tele.

²⁰Va ndzi tlherisela swo biha ematshan'weni ya leswinene; Va ndzi pfuka hikuva ndzi landza leswinene.

²¹U nga tshuki u ndzi fularhela, Yehovha! Xikwembu xanga! U nga tshami ekule na mina!

²²Hatlisa u ndzi pfuna, Hosi, wena loyi u nga ku hlayiseka ka mina!