Read tsonga Tipisalema 50 Bible Online

Tipisalema 50 - tsonga bible

Tipisalema 50

¹Xikwembu xa matimba, yena Yehovha, wa vulavula, u vitana misava, Ku suka evuxeni ku yisa evupeladyambu.

²ESiyoni laha ku sasekeke ngopfu, Xikwembu xi ni ku kwetsima.

³Xikwembu xa hina xa ta, xi nga ka xi nga miyeli; Emahlweni ka xona ku ni ndzilo lowu pfurhaka, Xi rhendzeriwe exikarhi hi xidzedze lexa matimba.

⁴Xi huwelela ematilweni ehenhla, Ni la emisaveni, ku avanyisa tiko ra xona.

⁵Ndzi hlengeleteleni lava ndzi rhandzaka, Lava endleke ntwanano na mina hi magandzelo.

⁶Kutani matilo ma ta vula ku lulama ka xona, Hikuva hi xona Xikwembu lexi avanyisaka.

⁷“Yingisa, tiko ranga, ndzi ta vulavula, Yingisa, Israele, ndzi ta vula vumbhoni exikarhi ka wena. Hi mina Xikwembu, Xikwembu xa wena.

⁸A ndzi ku tshinyi hikwalaho ka magandzelo ya wena; Tiholokosta ti le mahlweni ka mina hi masiku.

⁹Ndzi nga ka ndzi nga teki nkunzi endlwini ya wena, Hambi swi ri swiphongo ematshangeni ya wena;

¹⁰Hikuva swiharhi hinkwaswo swa nhova i swa mina, Ni swiharhi hinkwaswo swa tintshava swa madzanadzana;

¹¹Ndzi tiva tinyanyana hinkwato ta tintshava, Ni hinkwaswo leswi fambafambaka emasin'wini i swa mina.

¹²“Loko ngi ndzi ri ni ndlala ndzi nga ka ndzi nga ku byeli nchumu, Hikuva misava i ya mina, ni hinkwaswo leswi nga eka yona.

¹³Xana ndzi nga dya nyama ya tinkunzi leta matimba xana? Ndzi nga nwa ngati ya swiphongo xana?

¹⁴Humesela Xikwembu ku vonga ri nga gandzelo ra wena, U va u riha ku hlambanya ka wena eka La nge henhlahenhla.

¹⁵Kutani u vitana eka mina hi siku ra mahlomulo, Ndzi ta ku lwela, kutani wena u ta ndzi dzunisa.”

¹⁶Kambe Xikwembu xi ku eka lowo biha: “Xana-ke hi wena la fanelaka ku hlaya milawu ya mina, U va ni ntwanano wa mina enon'wini wa wena xana?

¹⁷Wena la vengaka ku layiwa, La cukumetaka marito ya mina endzhaku ka wena!

¹⁸Loko u vona muyivi, u rhandzana na yena, Kutani ku averiwa ka wena ku ni vaoswi.

¹⁹“U nyiketa nomu wa wena eku biheni, Ni ririmi ra wena ri luka ku kanganyisa ntsena.

²⁰U tshamisa kutani u hleva makwenu; U sandza n'wana wa mana wa wena.

²¹Hi lexi u xi endleke, kutani mina ndzi miyerile. U ringanise leswaku a ndzi fana na wena. Kambe ndzi ta ku laya sweswi, ndzi ta humesa hinkwaswo emahlweni ka wena.

²²“Twisisani-ke swilo leswi, n'wina lava rivalaka Xikwembu, Leswaku kumbe ndzi nga handzula, ku nga ri na mulweri.

²³La humesaka ku vonga ri va gandzelo, wa ndzi dzunisa, Ni loyi a lulamisaka ndlela ya yena, Ndzi ta n'wi kombisa ku hlayiseka ka Xikwembu.”