Read tsonga Tipisalema 53 Bible Online

Tipisalema 53 - tsonga bible

Tipisalema 53

¹Xihunguki xi ku embilwini ya xona: “A ku na Xikwembu!” Va borile va hundzuluxe ku biha ka vona manyala; A ku na un'we la endlaka leswinene.

²Yehovha u langutisa vana va vanhu a ri ematilweni, Ku vona loko ingi a ri kona la nga ni ku twisisa, La lavaka Xikwembu.

³Hinkwavo va hambukile, hinkwavo va tionhile kun'we; A ku na loyi a endlaka leswinene, hambi a ri un'we.

⁴Xana a va na ku twisisa, lava endlaka leswo biha? Lava dyaka tiko ranga kukotisa loko ingi byi ri vuswa, Lava nga khongeliki Xikwembu.

⁵Va ta rhurhumela hi ku chava, Laha ku nga riki na mhaka ya ku chava; Hikuva Xikwembu xi ta hangalasa marhambu ya lava ku rhendzelaka; U ta va khomisa tingana, hikuva Xikwembu xi va cukumetile.

⁶Aa! Ku kutsula ka Israele ku ta pfa rini eSiyoni xana? Siku Xikwembu xi nga ta tlherisa vabohiwa va tiko ra xona, Yakobo u ta khana, Israele u ta tsaka.