Read tsonga Tipisalema 55 Bible Online

Tipisalema 55 - tsonga bible

Tipisalema 55

¹Oho Xikwembu! Rhiyela xikhongelo xa mina ndleve, U nga fularheli ku kombela ka mina! Ndzi yingise, u ndzi hlamula.

²Ndza yingayinga eku vavisekeni ka mina, ndza tikarhata,

³Hikwalaho ka rito ra nala ni ku xanisa ka lowo biha; Hikuva va ndzi vangela khombo, va ndzi hlongorisa hi ku leva.

⁴Mbilu ya mina yi rhurhumela endzeni ka mina, Nchavo wa rifu wu ndzi khomile;

⁵Ku chava ni ku rhurhumela swi ndzi wele ehenhla, Ku tsekatseka ku ndzi khomile hinkwako.

⁶Hi laha-ke ndzi nge: “Aa! Ingi loko ndzi ri ni timpapa ta tuva, A ndzi ta haha ndzi ya wisa kun'wana;

⁷Ndzi ta tsutsumela ekule, Ndzi ya chavela emananga.

⁸A ndzi ta phonyoka hi ku hatlisa. Ndzi rhangela matsamba ya mheho leyi hungaka, ni ya xidzedze.”

⁹U va mita, wee Hosi, hambanyisa tindzimi ta vona! Hikuva ndzi vone ku pfukelana ni ku hlundzukelana emutini.

¹⁰Nhlekanhi ni vusiku swi tshama swi hiteka emakhokholweni ya wona; Ku homboloka ni ku xaniseka swi tshama exikarhi ka wona.

¹¹Vumbabva byi le ndzeni ka wona, Ku xanisa ni ku kanganyisa a swi sukeli tihuvo ta wona.

¹²Hikuva a hi nala la ndzi solaka, a ndzi ta n'wi byarha, A hi loyi a ndzi vengaka la ndzi pfukeleke matimba, A ndzi ta ya tumbela ekule na yena.

¹³Kambe hi wena, wanuna la ringanaka na mina, La nga nakulorhi ni murhandziwa wa mina!

¹⁴Hina lava ngi hi hlamulana hi timhaka leto nandziha, Lava ngi hi ya endlwini ya Xikwembu kun'we ni vunyingi!

¹⁵Rifu a ri va khome hi xipuku, A va ngirimele exivandleni xa vafi va ha hanya! Hikuva ku homboloka ku le tindlwini ta vona, ni le xikarhi ka vona.

¹⁶Loko ndzi ri mina, ndzi tshama ndzi huwelela eka Xikwembu, Kutani Yehovha u ta ndzi ponisa.

¹⁷Nimadyambu, nimixo, ninhlekanhi, ndza konya, ndzi ni mahika; Kambe u ta yingisa rito ra mina.

¹⁸U ta kutsula moya wa mina hi ku rhula enyimpini leyi va yi lwaka na mina; Hikuva va tele lava lwaka na mina.

¹⁹Xikwembu xi ta yingisa, Xi va hlamula, Xona lexi tshamaka exiluvelweni xa xona hi masiku. Hikuva a ku na ku hundzuka eka vona, A va chavi Xikwembu.

²⁰[Lowo biha] u tshambuluta voko, a khoma lava hanyeke hi ku rhula na yena, A onha xinakulobye xa yena.

²¹Nomu wa yena wu tlula phehlwa hi ku nandziha; Kambe ku lwa ku kona embilwini ya yena; Marito ya yena ma tlula mafurha hi ku olova, Kambe i mabanga lama hlomuriweke.

²²Nyiketa Yehovha timhaka ta wena, u ta ku seketela; A nga ka a nga pfumeli ni siku ni rin'we leswaku la lulameke a tsekatsekisiwa.

²³Wena Xikwembu u ta va xikisa ekheleni ra ku lova; Vanhu lava va nga va ngati ni va ku xisa, Va nga ka va nga fiki exikarhi ka masiku ya vona; Kambe mina ndzi tshembile wena.