Read tsonga Tipisalema 59 Bible Online

Tipisalema 59 - tsonga bible

Tipisalema 59

¹Xikwembu xanga! Ndzi lwele eka lava ndzi vengaka! Ndzi veke ekule ni valala va mina.

²Ndzi lamulele eka lava endlaka leswo biha, U ndzi kutsula eka vanhu va ngati!

³Hikuva languta, va rhiyele moya wa mina mitlhamu; Vanhu va matimba va ndzi etlelela; Ku nga ri hikwalaho ka ku homboloka kumbe ka xidyoho xa mina, oho Yehovha!

⁴Hambi ndzi nga ri na nandzu, va tsutsuma va hlomile; Pfuka, u ta eka mina, u languta!

⁵Wena Yehovha, Xikwembu xa tinyimpi, Xikwembu xa Israele! Pfuka u laya matiko hinkwawo! U nga tsetseleli na un'we wa timbabva leti.

⁶Va vuya nimadyambu, va vukula kukota timbyana, Va rhendzelekela muti.

⁷Waswivo, milomu ya vona yi halata leswo biha, Matlhari ma le milon'wini ya vona. Hikuva va ri: “I mani la hi yingisaka?”

⁸Kambe wena Yehovha, wa va hleka, U hleka matiko hinkwawo.

⁹Hikwalaho ka matimba ya vona, ndzi ta languta eka wena; Hikuva Xikwembu i vuchavelo bya mina lebyi tlakukeke.

¹⁰Xikwembu xanga xi ta ta ndzi hlanganisa hi tintswalo ta xona, Xi ta tsakisa mahlo ya mina eku biweni ka valala va mina.

¹¹U nga va dlayi leswaku kumbe tiko ra mina ri swi rivala; U va hangalasa hi matimba ya wena, u va wisela ehansi, Wena Hosi, xitlhangu xa hina!

¹²Loko ku hume rito emilon'wini ya vona, ku hume xidyoho. A va phasiwe eku tikukumuxeni ka vona, Hikwalaho ka tinhlambha ni mavunwa leswi va swi vulaka.

¹³U va heta hi vukari bya wena, u va heta leswaku va nga ha vi kona! A ku tiviwe, ni le makun'wini ya misava, Leswaku Xikwembu xi fuma Yakobo.

¹⁴Va vuya nimadyambu, va vukula kukota timbyana, Va rhendzelekela muti.

¹⁵Va yingayinga, va lava swakudya swa vona, Kutani vusiku byi hundza, va nga si xurha.

¹⁶Kambe mina ndzi ta yimbelela matimba ya wena; Ndzi ta twarisa tintswalo ta wena wa ha ri mixo; Hikuva u ve khokholo ra mina leri tlakukeke, Ni vuchavelo hi siku ra mahlomulo ya mina.

¹⁷Matimba ya mina! Ndzi ta ku twarisa, Hikuva Xikwembu i khokholo ra mina leri tlakukeke, Xikwembu lexi ndzi tsetselelaka.