Read tsonga Tipisalema 62 Bible Online

Tipisalema 62 - tsonga bible

Tipisalema 62

¹Kunene, moya wa mina wu wisa eka Xikwembu; Ku hlayiseka ka mina ku huma eka xona.

²Kunene hi xona xi nga ribye ra nga ni ku hlayiseka ka mina! I vuchavelo bya nga lebyi tlakukeke, ndzi nga ka ndzi nga tsekatsekisiwi ngopfu.

³Xana mi ta wela munhu ku yisa kwihi-ke, Mi hlangana hinkwenu ku n'wi wisela ehansi, Kukotisa khumbi leri voyameke, Kukotisa rirhangu leri va ri susumetelaka ehansi?

⁴Va endla makungu ku n'wi wisa ehansi a ri eku tlakukeni ka yena; Va titsakela hi mavunwa; Va vonga hi milomu ya vona, Kasi va rhuketela etimbilwini ta vona.

⁵Hakunene, moya wanga wu wisa hi ku tshemba Xikwembu, Hikuva ku tshemba ka mina ku pfa eka xona.

⁶Kunene hi xona ribye ranga ni ku hlayiseka ka mina; Vuchavelo byanga lebyi tlakukeke, ndzi nga ka ndzi nga tsekatsekisiwi.

⁷Ku hlayiseka ka mina ni ku kwetsima ka mina ku tshamisa eka Xikwembu; Ribye ra matimba ya mina, ni vuchavelo bya mina swi le ka Xikwembu.

⁸N'wina vanhu, tshembani Xikwembu hi masiku hinkwawo, Halatani timbilu ta n'wina emahlweni ka xona; Xikwembu i vuchavelo bya hina.

⁹Vana va vanhu i swahava ntsena; Vana va vakulukumba i mavunwa ntsena; Loko ngi va vekiwa exikalweni, a va ta vevuka ntsena; Hinkwavo i swahava ntsena.

¹⁰Mi nga tshuki mi tshemba mahlundzu; Mi nga tikuriseni hi ku vutla; Loko mi andzeriwe hi rifuwo, mi nga vekeni timbilu ta n'wina eka rona.

¹¹Xikwembu xi vulavurile kan'we; Ndzi swi yingisile kambirhi hi leswaku: “Matimba i ya Xikwembu.”

¹²Ni tintswalo ti na wena, Hosi; Hikuva u tlherisela un'wana ni un'wana hi ku ringana ka mitirho ya yena.