Read tsonga Tipisalema 63 Bible Online

Tipisalema 63 - tsonga bible

Tipisalema 63

¹Oho Xikwembu! U Xikwembu xanga, ndza ku lava, Moya wanga wu ni torha ra wena, nyama ya mina yi ku navela hi mahika, Etikweni leri ra ku oma, ra mananga leri nga riki na mati.

²Ndzi ta ku hlalela evukwetsimelweni, Ndzi ta vona matimba ya wena ni ku kwetsima ka wena.

³Hikuva tintswalo ta wena ti tlula ku hanya. Milomu ya mina yi ta ku twarisa.

⁴Hikwalaho ndzi ta ku khensa eku hanyeni ka mina, Ndzi ta yimisa mavoko ya mina hi vito ra wena.

⁵Moya wanga wu ta xurha swange i mongo ni mafurha. Kutani nomu wa mina wu ta ku twarisa hi marito ya ku tsaka.

⁶Loko ndzi ku tsundzuka ndzi ri ebyetlelweni bya mina, Ndzi anakanya ta wena hi mikarhi ya vusiku.

⁷Hikuva u mupfuni wa mina, Ndzi ta yimbelela, hi ku tsaka endzhutini wa timpapa ta wena.

⁸Moya wa mina wu namarhela wena ku ku landza, Voko ra xinene ra wena ri ndzi seketela.

⁹Kambe lava lavaka ku susa vutomi bya mina, Va ta xikela ehansi, endzeni ka misava;

¹⁰Va ta nyiketiwa evukarini bya matlhari. Va ta va swakudya swa timhisi.

¹¹Kambe hosi yi ta titsakela eka Xikwembu; Un'wana ni un'wana la hlambanyaka ha xona u ta tidzunisa, Hikuva nomu wa lava hembaka wu ta siviwa.