Read tsonga Tipisalema 73 Bible Online

Tipisalema 73 - tsonga bible

Tipisalema 73

¹Kunene Xikwembu xi ni tintswalo eka Israele, Eka lava nga ni timbilu to basa.

²Hambiswiritano, milenge ya mina a yi lava ku ndzi wisa; Mikondzo ya mina a yi lava ku rhetemuka;

³Hikuva a ndzi navela lava tidzunisaka, Loko ndzi vona ku tsaka ka lavo biha.

⁴Kunene a va na ku xaniseka, ku fika eku feni ka vona, Va hanya, miri wa vona wu kulukile,

⁵A va tivi ku karhateka ka van'wana vanhu, A va biwi swin'we ni van'wana vanhu,

⁶Hikwalaho-ke, ku tikurisa ka vona i sindza eka vona. Ku vutla ku va rhendzele tani hi nguvu;

⁷Lunya ri huma etimbilwini ta vona leti noneke; Va tshika mihahamo ya timbilu ta vona yi halaka,

⁸Va sandza, va vulavula hi lunya ku xanisa; Marito ya vona hi lama tlakukeke,

⁹Va yisa milomu ya vona ku fika etilweni, Kutani tindzimi ta vona ti fambafamba emisaveni.

¹⁰Hikwalaho tiko ra vona ri languta tlhelo ra vona, Kutani mati ya ku tala ma nwiwa ngopfu eka vona;

¹¹Va ri: “Xikwembu xi nga tivisa ku yini? La nge henhlahenhla a nga swi tiva xana?”

¹²Vonani, lavo biha va tano Va tsakile hi masiku, va hlengeleta xuma.

¹³Kunene mbilu ya mina ndzi yi basisele swahava, Hambi ku ri ku hlamba mandla ya mina eku baseni,

¹⁴Ndzi biwa hi masiku hinkwawo, Hi siku rin'wana ni rin'wana ku layiwa ka mina ku kona nimixo.

¹⁵Loko a ndzi ku: “Ndzi ta vulavula tani hi vona,” Waswivo a swi ta va ku xenga rixaka ra vana va wena.

¹⁶Kambe loko ndzi anakanyile timhaka leti, ku ti twisisa, A swi nonon'hwa ngopfu emahlweni ka mina,

¹⁷Ndzi kondza ndzi nghena evukwetsimelweni bya Xikwembu, Kutani ndzi ehleketa ku hela ka vona.

¹⁸Kunene u va veka etindleleni to rhetemuka, U va wisa ehansi eku onhakeni.

¹⁹Aha! Va herise ku yini kan'wekan'we, Va susiwa, va herisiwa hi ku chava?

²⁰Swange i norho, loko va pfukile, Wee Hosi, loko u pfuka, u ta sola xivumbeko xa vona.

²¹Loko mbilu ya mina yi ri karhi yi dyiwa hi mbitsi, Loko ndzi tlhaviwa exisutini,

²²A ndzi ri xiphukuphuku, a ndzi nga twisisi nchumu; Emahlweni ka wena a ndzi fana ni xiharhi.

²³Hambiswiritano, ndzi na wena hi masiku, U ndzi khomile hi voko ra xinene;

²⁴U ta ndzi fambisa hi ku tsundzuxa ka wena, Kutani u ta ndzi amukela eku kwetsimeni.

²⁵Ndzi na mani etilweni, loko a nga ri wena? Ni la emisaveni ndzi tsakela wena ntsena.

²⁶Nyama ya mina, ni mbilu ya mina swi nga hela, Kambe Xikwembu i ribye ra mbilu yanga, I ndzhaka ya mina hi laha ku nga heriki.

²⁷Hikuva, waswivo lava tshinelaka ekule na wena va ta fa. U herisa hinkwavo lava ku fularhelaka.

²⁸Loko ndzi ri mina, ku tshinelela Xikwembu, i rifuwo ra mina. Ndzi vekile vuchavelo bya mina eka Hosi Yehovha, Leswaku ndzi ta amba mitirho ya wena hinkwayo.