Read tsonga Tipisalema 74 Bible Online

Tipisalema 74 - tsonga bible

Tipisalema 74

¹Oho Xikwembu, u hi cukumetele makumu ha yini-ke? U karihele ntlhambi lowu u wu risaka hikwalaho ka yini?

²Tsundzuka tiko leri u nga titekela rona khale, Leri u nga ri kutsula tani hi rixaka ra ndzhaka ya wena! Tsundzuka ntshava ya Siyoni, leyi u nga titshamela eka yona.

³Yisa milenge ya wena etindhawini letiya lama nga marhumbi hi masiku: Nala u herisile hinkwaswo evukwetsimelweni bya wena.

⁴Valala va wena va dzumadzumile etempeleni ya wena; Va vekile swikombiso swa vona swi va swikombiso swa kona.

⁵Va voniwile swange i vanhu lava tlakusaka swihloka Exihlahleni xa mirhi yo tala.

⁶Kutani kan'wekan'we va fayile leswi vatliweke hinkwaswo, Hi ku ba hi swihloka ni tinyundzu.

⁷Va hisile vukwetsimelo bya wena hi ndzilo; Va yi wisile va yi sandzile yindlu ya vito ra wena.

⁸A va ku etimbilwini ta vona: “A hi swi heriseni hinkwaswo xikan'we.” Va hisile swivandla hinkwaswo swo gandzela kona etikweni.

⁹A ha ha voni swikombiso swa hina, A ka ha ri na muprofeta; Exikarhi ka hina, a ku na la tivaka leswaku ku ta yisa kwihi.

¹⁰Oho Xikwembu! Muxanisi u ta sandza ku yisa kwihi? Xana nala u ta sola vito ra wena hi masiku ni masiku?

¹¹U khondlela yini voko ra wena, voko ra wena ra xinene xana? Ri humese exifuveni xa wena, u va heta.

¹²Xikwembu i Hosi ya nga ku sukela emikarhini ya khale, Xona lexi ponisaka la emisaveni.

¹³Hi wena la nga avanyisa lwandle hi matimba ya wena, U fayile tinhloko ta madragona ematini,

¹⁴U pyanyeterile tinhloko ta tingwenya, U ti nyikile swi va swakudya swa swivandzana swa le mananga.

¹⁵U pfelerisile swihlovo ni milambu, U omisile milambu leyi nga tiviki ku phya.

¹⁶Nhlekanhi i wa wena, na byona vusiku i bya wena; U vumbile ku vonakala, na rona dyambu.

¹⁷U vekile mindzilekana hinkwayo ya misava; U tiyisile ximumu ni vuxika.

¹⁸Tsundzuka leswaku nala wa sandza, Yehovha, Tiko leri nga riki na mano ri sola vito ra wena.

¹⁹U nga nyiketi eswivandzaneni moya wa gugurhwana wa wena; U nga rivali hi masiku ntlhambi wa wena wa lava xanisekaka!

²⁰Anakanya ntwanano wa wena, Hikuva swivandla swa tiko leswi nga etlhelweni, swi tele mabako ya vaxanisi.

²¹Loyi a xanisiwaka a nga tshuki a muka a ri ni tingana; Loyi a hluphekaka, ni loyi a pfumalaka a va tlangele vito ra wena!

²²Pfuka, oho Xikwembu, lwela mhaka ya wena. Tsundzuka ku sandziwa loku nala a ku sandzaka hakona hi masiku!

²³U nga rivali ku huwelela ka valala va wena, Ni pongo leri engetelekaka hi masiku ra lava ku pfukelaka!