Read tsonga Tipisalema 77 Bible Online

Tipisalema 77 - tsonga bible

Tipisalema 77

¹Rito ra mina ri tlhandlukela eka Xikwembu, kutani ndzi huwelela; Rito ra mina ri tlhandlukela eka Xikwembu, leswaku xi ta ndzi yingisa.

²Hi siku ra nchavo wa mina, ndzi lava Hosi, Mavoko ya mina ma tshambulutiwa ni vusiku, ndzi nga wisi; Moya wa mina wu ala ku chaveleriwa.

³Loko ndzi ringeta ku tsundzuka Xikwembu, ndza konya; Ndzi anakanya, kutani moya wa mina wu karhala.

⁴U khoma tinxiyi ta mina ti pfulekile; Ndza karhateka, ndzi kondza ndzi tsandzeka ku vulavula.

⁵Ndzi tsundzuka masiku ya khale, Ni malembe lama hundzeke.

⁶Ndzi anakanya risimu ra mina nivusiku. Ndzi vulavula hi mbilu ya mina, Na wona moya wa mina wu anakanya.

⁷“Xana Hosi yi ta cukumetela makumu xana? A yi nga ha tweli vusiwana xana?

⁸Xana rirhandzu ra yona ri herile kunene? Xana rito ra yona ri hele matimba hi masiku ni masiku?

⁹Xana Xikwembu xi rivele ku twela vusiwana? Kumbe evukarini bya xona xi pfarile xihlovo xa tintswalo ta xona xana?”

¹⁰Kutani mina ndzi ri: “Leswi ndzi vavisaka, Hi leswi voko ra La nge henhlahenhla ri nga ha riki rona.”

¹¹Ndzi ta tsundzuka mitirho ya Yehovha, Kunene ndzi anakanya mahlori ya wena ya khale.

¹²Ndzi ta vula mitirho ya wena hinkwayo, Ndzi ta anakanya mitirho ya wena leyikulu.

¹³Oho Xikwembu! Ndlela ya wena ya kwetsima! Xi kwihi Xikwembu lexi nga lexikulu tani hi Xikwembu xana?

¹⁴Hi wena Xikwembu lexi tirhaka mahlori, U kombisile exikarhi ka matiko matimba ya wena.

¹⁵Hi voko ra wena u kutsurile tiko ra wena Vana va Yakobo ni va Yosefa.

¹⁶Mati ma ku vonile, oho Xikwembu! Mati ma ku vonile, ma rhurhumerile, Ni swidziva swi tsekatsekile.

¹⁷Mapapa ma halake mpfula hi maboboma ku pfuma ku twakele exibakabakeni, Na yona miseve ya wena yi haha hi matlhelo hinkwawo.

¹⁸Ku pfuma ka wena ku twakele exihuhurini, Tihati ti voningile misava, Misava yi tsekatseka, yi rhurhumela.

¹⁹U tiboxele gondzo exikarhi ka lwandle, Ni ndlela ya wena exikarhi ka mati lamakulu; Kutani mitila ya wena a yi tiviwanga.

²⁰U fambisile tiko ra wena tani hi ntlhambi, Hi voko ra Muxe ni ra Aroni.