Read tsonga Tipisalema 78 Bible Online

Tipisalema 78 - tsonga bible

Tipisalema 78

¹Yingisa tidyondzo ta mina, tiko ranga; Rhiyani tindleve, mi yingisa marito ya nomu wa mina.

²Ndzi ta ahlamisa nomu wa mina hi marito, Ndzi ta vulavula leswi fihliweke swa mikarhi ya khale.

³Leswi hi nga swi twa, leswi hi swi tivaka, Leswi vatata wa hina va nga hi byela swona,

⁴Hi nga ka hi nga swi fihleri vana va vona; Hi ta hlayela vatukulu swidzuniso swa Yehovha, Swin'we ni matimba ya yena ni mahlori lawa a nga ma endla.

⁵Yena u yimisile vumbhoni eka Yakobo, U vekile nawu eka Israele, Lowu a nga lerisa vatata wa hina ku wu dyondzisa vana va vona.

⁶Leswaku wu ta tiviwa hi rixaka leri tlhandlamaka, Hi vana lava nga ta velekiwa, Vona va ta kula, kutani va ta byela vana va vona,

⁷Leswaku va veka ku tshemba ka vona eka Xikwembu, Va nga tshuki va rivala mitirho ya Xikwembu, Va ta hlayisa ku lerisa ka xona,

⁸Va nga tshuki va fana ni vatata wa vona, Rixaka ra ku tiarisa, ro dzumadzuma, Rixaka leri nga fambiki hi mbilu yo tiya, Leri moya wa rona, wu nga tshembiki Xikwembu.

⁹Vana va Efrayimi, lava hlomeke va tameleke vurha, Va fularhele hi siku ra ku lwa.

¹⁰A va hlayisanga ntwanano wa Xikwembu, Va arile ku famba enawini wa xona.

¹¹Va rivele mitirho ya xona, Ni masingita lawa xi nga va kombisa wona.

¹²Emahlweni ka vatata wa vona xi tirhile mahlori, Etikweni ra Egipta, etimbaleni ta Sowani.

¹³Xi tsemakanyisa lwandle, xi va perisa, Xi yimisa mati ma endla swange i khumbi.

¹⁴Ninhlekanhi xi va fambisa hi papa, Nivusiku hinkwabyo hi ku voninga ka ndzilo.

¹⁵Xi pandzile maribye le mananga, Kutani xi va nwisa swange va nwa eswidziveni swa lwandle.

¹⁶Xi humesile tinseledyana eribyeni, Kutani xi pfelerisa mati eka rona swange i milambu.

¹⁷Kambe va engetile va xi dyohela, Va dzumadzumela La nge henhlahenhla le mananga;

¹⁸Va ringile Xikwembu etimbilwini ta vona. Hi ku kombela swakudya leswi va nga swi navela.

¹⁹Va hleva Xikwembu, va ku: “Xana Xikwembu xi nga hi phamela kwala mananga-ke?

²⁰Maswivo, xi bile ribye, kutani mati ma humile, Ni milambu yi khulukile; Xana xi nga swi kota ku nyika vuswa, Ni ku lunghisela tiko ra xona nyama xana?”

²¹Hikwalaho, Yehovha, loko a swi twa, a kariha, Kutani ndzilo wu pfurhela Yakobo, Ni vukari byi pfukela Israele,

²²Hikuva a va pfumelangi eka Xikwembu, A va tshembanga ku pfuna loku humaka eka xona.

²³Xi lerisile mapapa ehenhla, Kutani xi pfula tinyangwa ta tilo.

²⁴Xi va nisela manna, swi va swakudya swa vona, Xi va nyika koro ya tilo.

²⁵Hinkwavo va dyile swakudya swa tihosi, Xi va rhumele swakudya va kondza va xurha.

²⁶Xi humesa mheho ya vuxa ematilweni, Xi vitana moya wa dzonga hi matimba ya xona;

²⁷Xi va nisela nyama swange ntshuri, Ni tinyanyana le ta timpapa, swange i sava ra lwandle;

²⁸Xi ti wisa exikarhi ka magovela ya vona, Hi matlhelo hinkwawo ya vuako bya vona.

²⁹Va dya va xurha ngopfu: Xi va rhumela leswi va swi naveleke.

³⁰Kavaloko ku navela ka vona ingi loko ka ha ri kona, Loko swakudya swa ha ri kona emilon'wini ya vona,

³¹Ku kariha ka Xikwembu ku va pfukela; Xi dlaya tinhenha ta vona, Xi wisa majaha ya Israele.

³²Hambi swilo leswi hinkwaswo swi humelele va engeta va dyoha, A va pfumelanga masingita ya xona.

³³Xi va tshika, masiku ya vona ma hela hi vuhava, Ni malembe ya vona hi ku hela loku tshukisaka.

³⁴Loko xi ri karhi xi va dlaya, a va xi lava, A va tlhela, a va hatla ku lava, Xikwembu;

³⁵A va tsundzuka leswaku Xikwembu a ri ri ribye ra vona, Ni leswaku Xikwembu lexi nge henhlahenhla a a ri mukutsuri wa vona.

³⁶Kambe a va xi kanganyisa hi milomu ya vona, Va xi hembela hi tindzimi ta vona;

³⁷Timbilu ta vona a ti nga lulamanga emahlweni ka xona, A va nga tshembekanga entwananweni wa xona.

³⁸Kambe xona hi tintswalo ta xona xi va rivalele ku dyoha, a xi va hetanga. Hakanyingi xi tlhelele evukarini bya xona, A xi pfumelangi vukari hinkwabyo bya xona ku pfuka.

³⁹Xi tsundzuka leswaku a va ri nyama ntsena, Ni moya lowu hundzaka, lowu nga vuyiki.

⁴⁰Hakanyingi va xi dzumadzumela emananga, Ni ku xi karihisa!

⁴¹A va tshikanga ku ringa Xikwembu, Ni ku pfuxa Mukwetsimi wa Israele.

⁴²A va ha tshamanga va anakanya voko ra xona, Ni loko ri ri siku leri xi va tshunxeke eka nala ha rona,

⁴³Siku xi endleke mahlori etikweni ra Egipta, Ni swihlamariso emabanyini ya Sowani.

⁴⁴Xi hundzula milambu ya vona ngati, Kutani va hluleka ku nwa mati ya yona.

⁴⁵Xi va rhumela tinxaka ta mabawa lama va heteke, Ni mitlambya leyi va loviseke.

⁴⁶Kutani xi nyiketa swivungu masimu ya vona, Ni tinjiya mihandzu ya ntirho wa vona.

⁴⁷Xi herisa tivhinya ta vona hi xihangu, Ni mikuwa ya vona hi xirhami.

⁴⁸Kutani xi nyiketa xihangu tihomu ta vona, Ni ndzilo wa le henhla mitlhambi ya vona.

⁴⁹Xi va rhumela ndzilo wa vukari bya xona, Byi ri vukari, ni nhlundzuko, ni mahlomulo, Ni vandla ra tintsumi ta makhombo.

⁵⁰Xi ri karhi xi nyika vukari bya xona nkarhi, Kutani a xi alelanga rifu mimoya ya vona, Kambe xi nyika vutomi bya vona swi va swakudya swa ntungu;

⁵¹Xi ba mativula hinkwawo etikweni ra Egipta, Ni mativula ya matimba ya vona emitsongeni ya Hamu.

⁵²Xi humesa tiko ra xona tani hi tinyimpfu, Kutani xi va fambisa emananga tani hi ntlhambi.

⁵³Xi va byisa hi ku lulama, kutani a va tshukangi nchumu, Kambe lwandle ri funengeta valala va vona.

⁵⁴Kutani xi va fikisa emindzilekaneni ya xona leyi hlawuriweke, Entshaveni yoleyo leyi tshumbiweke hi voko ra xona ra xinene.

⁵⁵Xi hlongorisa matiko emahlweni ka vona, Xi va avanyisela ku averiwa ka ndzhaka ya vona hi pindza, Kutani xi akisa tinxaka ta Israele emitsongeni ya vona.

⁵⁶Kambe va ringa Xikwembu Lexi nge henhlahenhla, va xi dzumadzumela, Kutani a va hlayisangi ku lerisa ka xona.

⁵⁷Va tlhela ndzhaku, va va ni mano kukota vatata wa vona, Va va tani hi vurha lebyi kanganyisaka.

⁵⁸Va vanga vukari bya xona hi swivandla leswi tlakukeke swa vona, Ni rilondzo ra xona hi swifaniso swa swikwembu swa vona.

⁵⁹Kutani Xikwembu, loko xi vona sweswo, xi kariha, Xi phirweka ngopfu hi Vaisraele;

⁶⁰Xi tshika vuako bya Xilo, Ntsonga lowu ngi xi tshame eka wona exikarhi ka vanhu,

⁶¹Kutani xi tshika ku kwetsima ka xona ku yisiwa eku bohiweni, Ni ku twala ka xona ku wela emavokweni ya valala.

⁶²Kutani xi nyiketa fumu tiko ra xona, Xi va xi karihela ndzhaka ya xona.

⁶³Xi herisa majaha ya vona hi ndzilo, Ni vanhwana va vona a va tamanga va dzunisiwa.

⁶⁴Vaprista va vona va wisiwa hi tlhari, Kutani tinoni ta vona a ti vanga ti rila.

⁶⁵Hosi yi phaphama tani hi munhu la etleleke, Tanihi nhenha leyi baka huwa, leyi vulavurisiwaka hi vhinyo.

⁶⁶Xi tlhava valala va xona endzhaku, Xi va byarisa tingana leti nga heriki.

⁶⁷Hambiswiritano, xi lahlile ntsonga wa Yosefa, Kutani a xi hlawulanga rixaka ra Efrayimi.

⁶⁸Kambe xi hlawula rixaka ra Yuda, Ni ntshava ya Siyoni leyi xi yi rhandzaka.

⁶⁹Kutani xi aka vukwetsimelo bya xona tani hi tindhawu leti tlakukeke. Tanihi misava leyi xi nga yi tiyisa hi laha ku nga heriki.

⁷⁰Kutani xi hlawula Davhida, nandza wa xona, Xi n'wi teka ematshangeni ya tinyimpfu;

⁷¹Xi n'wi susa eka tinyimpfu ta matswele, A ta va murisi wa Yakobo, tiko ra xona, Na Israele, ndzhaka ya xona.

⁷²Kutani Davhida a va risa hi mbilu leyi tengeke, A va fambisa hi mavoko layo tlhariha.