Read tsonga Tipisalema 85 Bible Online

Tipisalema 85 - tsonga bible

Tipisalema 85

¹Oho Yehovha, u katekisile tiko ra wena! U vuyisile vakhomiwa va Yakobo,

²U rivalele ku dyoha ka tiko ra wena, U funengetile swidyoho swa vona hinkwaswo;

³U miyetile vukari hinkwabyo bya wena, U timile ndzilo wa mahlundzu ya wena.

⁴Hi vuyise, Xikwembu xa ku hlayiseka ka hina! U tshika ku hi hlundzukela!

⁵Xana u ta hi holovela hi masiku xana? U ta tiyisa vukari bya wena hi mikarhi ni mikarhi xana?

⁶Xana u nge hi tlheriseri eku hanyeni xana? Leswaku tiko ra wena ri ku tsakela?

⁷Oho Yehovha, hi kombise vunene bya wena, U hi nyika ku hlayiseka ka wena!

⁸Ndzi ta yingisa leswi vuriwaka hi Yehovha Xikwembu; Hikuva u vula ku rhula ka tiko ra yena, ni ka vahlawuriwa va yena; Kambe va nga tshuki va ha vuyela eku hungukeni ka vona.

⁹Kunene, ku hlayiseka ka yena ku le kusuhi ni lava n'wi chavaka, Leswaku ku kwetsima ku ta aka etikweni ra hina.

¹⁰Vunene ni ku lulama swi hlanganile, Ku lulama ni ku rhula ku ntswontswanile;

¹¹Ku tshembeka ku ta mila emisaveni, Ku lulama ka le henhla etilweni ku ta languta ehansi.

¹²Hakunene Yehovha u ta nyika nkateko wa yena; Tiko ra hina ri ta humesa mihandzu ya rona.

¹³Ku lulama ku ta famba emahlweni ka yena Ku lulamisa ndlela hi mikondzo ya yena.